အမ်းမြို့နယ်တွင် ကလေးနှစ်ဦးမိခင်အား ကျေးရွာအုပ်ချုပ်ရေးမှူးမှ အဓမ္မပြုကျင့်ရန်ကြံစည်၊ ULAထံသို့ တိုင်ကြားထားသော်လည်း ထိထိရောက်ရောက် အရေးယူဆောင်ရွက်ခြင်းမရှိဟုဆို

နိရဉ္စရာ၊ ဒီဇင်ဘာ ၂၆/၂၀၂၂

ရခိုင်ပြည်နယ်၊ အမ်းမြို့နယ် ညောင်ချောင်းကျေးရွာတွင် ပြီးခဲ့သည့် နိုဝင်ဘာလက ကလေးနှစ်ဦး မိခင်အား ကျေးရွာအုပ်ချုပ်ရေးမှူးမှ အဓမ္မပြုကျင့်ရန် ကြံစည်မှုဖြစ်ပွားခဲ့ပြီး အဆိုပါဖြစ်စဉ်အား ULAထံသို့ တိုင်ကြားထားသော်လည်း ထိထိရောက်ရောက်ဆောင်ရွက်ခြင်းမရှိဟု ကာယကံရှင်က ပြောသည်။

အဓမ္မပြုကျင့်ရန် ကြံစည်ခံရသူမှာ အမ်းမြို့နယ် ညောင်ချောင်းကျေးရွာနေ အသက် ၁၉ နှစ်အရွယ် ကလေးနှစ်ယောက်မိခင် *** ဖြစ်သည်။

သူမသည် ညောင်ချောင်းကျေးရွာတွင် ၄ နှစ်အရွယ်သားဖြစ်သူနှင့် ၁ နှစ်အရွယ် သမီးဖြစ်သူတို့နှင့်အတူ နေထိုင်သူဖြစ်ပြီး ၎င်း၏ခင်ပွန်းဖြစ်သူမှာ ထိုင်းနိုင်ငံတွင် အလုပ်လုပ်ကိုင်နေသဖြင့် သားသမီးနှစ်ယောက်နှင့်အတူ သုံးဦးတည်း အတူနေထိုင်ရခြင်းဖြစ်ကြောင်း သိရသည်။

၎င်းအား အဓမ္မပြုကျင့်ရန် ကြံစည်သည့် ကျေးရွာအုပ်ချုပ်ရေးမှူးမှာ ULA/AAမှ တာဝန်ပေး ခန့်အပ်ထားသည့် ကျေးရွာအုပ်ချုပ်ရေးမှူး****  (၅၀ ကျော်အရွယ်) ဖြစ်ကြောင်းသိရသည်။

၎င်းတို့နှစ်ဦးသည် ရင်းနှီးသည့် ဆက်ဆံရေးလည်းမဟုတ်ကြောင်း သိရသည်။

ပြီးခဲ့သည့်နိုဝင်ဘာလ ၁၃ ရက်၊ ညည့် ၂ နာရီဝန်းကျင်အချိန်ခန့်က ၎င်းနှင့်ကလေးနှစ်ယောက် အတူနေထိုင်သည့် အိမ်သို့ အဆိုပါအုပ်ချုပ်ရေးမှူးရောက်ရှိလာပြီး သူမ၏ လက်မောင်းများအား ဖမ်းချုပ်လိုက်သဖြင့် သူမမှာ အိပ်ရာမှ လန့်နိုးလာခဲ့ပြီး ထိုအချိန်တွင် အုပ်ချုပ်ရေးမှူးက လက်မောင်းများကိုချုပ်ကိုင်ထားသည့် လက်တစ်ဖက်ဖြင့် ၏အဝတ်များကို ချွတ်ရန်ကြံစည်နေရာတွင်  ၎င်းအား "အိမ်ပေါ်မှဆင်း"ဟု အော်ဟစ်ကာ မောင်းထုတ်လိုက်သဖြင့် ၎င်းအုပ်ချုပ်ရေးမှူးသည် ဆင်းပြေးသွားကြောင်း သူမက နိရဉ္စရာသတင်းဌာနကို ပြောသည်။

သူမအနေဖြင့် ဆင်းရဲသော မိသားစုဖြစ်၍ အမှန်တရားကို ဖော်ထုတ် အရေးယူပေးစေလိုသည်ဟု ပြောကြားသည်။

အဆိုပါ ကိစ္စနှင့် ပတ်သက်ပြီး ရက္ခိုင့်တပ်တော် ပြောရေးဆိုခွင့်ရှိသူ ဦးခိုင်သုခက စွပ်စွဲခံရသူ ကျေးရွာအုပ်ချုပ်ရေးမှူးအား နိုဝင်ဘာ ၁၉ ရက်က ထိန်းသိမ်ထားပြီး ဒီဇင်ဘာ ၁၈ ရက်နေ့တွင် တရားရုံး လုပ်ထုံးလုပ်ထုံးနှင့် အညီ တရားစွဲဆိုထားပြီး စစ်ဆေးနေကြောင်း၊ ဒီဇင်ဘာ ၂၃ ရက်နေ့က တစ်ကြိမ်းရုံးထုတ် စစ်ဆေးခဲ့ပြီဖြစ်ကြောင်း၊ လုံး၀ အရေးယူမှု မရှိဟု ပြောဆိုခြင်းမှာ မဟုတ်မှန်ကြောင်း ပြောကြားသည်။