ဘူးသီးတောင်တွင် ပေါက်ကွဲသံအချို့ ကြားခဲ့ရဟုဆို

ရေးသူ: Web Master
| ရက်စွဲ: ၂၇ ဒီဇင်ဘာ ၂၀၂၂
| ကြည့်ရှုသူ: 3.1k

နိရဥ္စရာ၊ ဒီဇင်ဘာ ၂၇ /၂၀၂၂

အပစ်အခတ်ရပ်စဲထားပြီး တစ်လခန့်အကြာတွင် ဘူးသီးတောင်မြို့နယ်တွင် လက်နက်ကြီးသံများနှင့် အတူ ပေါက်ကွဲသံအချို့ကို ကြားခဲ့ရကြောင်း ဒေသခံများက ပြောကြားသည်။

ဒီဇင်ဘာ ၂၆ ရက် နံနက်ပိုင်းက ဘူးသီးတောင်မြို့နယ်၊ နွားရုံတောင်ကျေးရွာအနီး စစ်တပ် တပ်စွဲထားသည့် တောင်အနီးမှ ပေါက်ကွဲသံတစ်ချက်ကြားခဲ့ရကြောင်း ဒေသခံများက ပြောသည်။

နွားရုံတောင်ကျေးရွာသားတစ်ဦးက "သူတို့ရှိတဲ့ တောင်ဘက်က ပေါက်ကွဲသံတစ်ချက်ကြားရတယ်။ ဒါပေမယ့် တခြား ဘာမှတော့ မကြားရတော့ဘူး။ မိုင်းလား၊ လက်နက်ကြီးလား မသဲကွဲဘူး" ဟု ပြောသည်။

ဒီဇင်ဘာ ၂၅ ရက်နေ့ ညနေ ၃ နာရီခွဲခန့်တွင်လည်း ဘူးသီးတောင် တပ်မမှ လက်နက်ကြီးသံ (၄) ချက်ကြားခဲ့ရကြောင်း ဘူးသီးတောင် ဒေသခံများက ပြောသည်။

"မနေ့က ညနေ ၃ နာရီခွဲလောက်က ဘူးသီးတောင်တပ်မကနေ လက်နက်ကြီးသံနှစ်ချက်စကြားရတယ်၊ မကြာဘူး နောက်ထပ် နှစ်ချက်ကြားရတယ်။ လေ့လာကြည့်တော့ လက်နက်ကြီးကျည်တွေ ဖျက်ဆီးတာလို့ ပြောပါတယ်။ သေချာတော့ မသိဘူး"ဟု ဘူးသီးတောင်ဒေသခံတစ်ဦးက ပြောသည်။

ယခုကဲ့သို့ အပစ်အခတ်ရပ်စဲထားချိန်တွင် လက်နက်ကြီးသံများကြားနေရသည့်အတွက် ဒေသခံများကြား စစ်ရေးနှင့်ပတ်သက်၍ စိုးရိမ်မှုများရှိနေရကြောင်း ၎င်းက ဆက်ပြောသည်။

"လက်နက်တွေဖျက်ဆီးမယ်ဆိုလည်း ကြိုတင်သတိပေးထားတာမျိုးတော့ လုပ်သင့်တယ်ထင်တယ်။ တိုက်ပွဲတွေ ဖြစ်ခဲ့ကြတာလည်းမကြာသေးဘူးလေ။ အပစ်ခတ်ရပ်ထားတယ်ပြောပြီး အခုလို လက်နက်ကြီးသံတွေကြားရတော့ စိုးရိမ်တယ်။ ပြန်ဖြစ်ကြတာလား။ ဘယ်လိုဖြစ်တာလဲပေါ့"ဟု ပြောသည်။

ဒီဇင်ဘာ (၈) ရက်နေ့ ကလည်း မင်းပြားမြို့နယ်မှာရှိ အမှတ် (၉)တပ်မတော် တန်းမြင့်လေ့ကျင့်ရေး သင်တန်းကျောင်းမှ လက်နက်ကြီး၊လက်နက်ငယ်များ အချက်ပေါင်းများစွာ ပစ်ခတ်မှုရှိခဲ့ကြောင်း သိရသည်။(NN-7)