ဘူးသီးတောင်မြို့တည်နှစ်(၁၁၄) ပြည့်အထိမ်းအမှတ် ပထမဆုံးအကြိမ် ကဗျာရွတ်ပွဲပြုလုပ်မည်

နိရဥ္စရာ၊ ဒီဇင်ဘာ ၂၉/၂ဝ၂၂

ရခိုင်ပြည်နယ်၊ ဘူးသီးတောင်မြို့တည် နှစ် ၁၁၄ ပြည့်အထိမ်းအမှတ် ပထမဆုံးအကြိမ်အဖြစ် ကဗျာရွတ်ပွဲတစ်ခုကို ယနေ့ညတွင်ပြုလုပ်သွားမည်ဟု သိရသည်။

အဆိုပါကဗျာရွတ်ပွဲကို ယနေ့ ဒီဇင်ဘာလ ၂၉ ရက်၊ ည ၇ နာရီတွင် ဘူးသီးတောင်မြို့၊ (၅)ရပ်ကွက်ရှိ ရွှေကျင်ဘုန်းတော်ကြီးကျောင်းတွင် မြို့နယ်စာရေးဆရာအသင်းကဦးဆောင်၍ပြုလုပ်သွားမည်ဟု အသင်းမှ အထွေထွေအတွင်းရေးမှူး မောင်မေယု (ဘူးသီးတောင်)က နိရဥ္စရာကိုပြောသည်။

“အဓိကတော့ ဘူးသီးတောင်မြို့တည်နှစ်ကို ဂုဏ်ပြုတဲ့အနေနဲ့ပေါ့။ မြို့တည်နှစ်ကို မှတ်မှတ်ရရပွဲလုပ်တယ်ဆိုတာ တစ်ခါမှမရှိသေးဘူး ဘူးသီးတောင်မှာ။ ကျနော်တို့က facebook မှာပဲ ဂုဏ်ပြုရုံလောက်ပဲရှိတယ်။ ပွဲတွေဘာတွေလုပ်တာမရှိတဲ့အတွက် ကျနော်တို့ကနေပြီးတော့ အမှတ်တရတစ်ခုဖြစ်စေချင်တယ်။ ဒါကြောင့် ဒီနှစ်မှာ ကဗျာရွတ်ပွဲလေးတစ်ခုနဲ့ စလိုက်မယ်ဆိုတဲ့အဲလိုပုံစံမျိုး။ အဓိကတော့ မြို့ရဲ့သက်တမ်းကို ဒီလောက်သက်တမ်း ရှိပြီဆိုတာကို သိစေချင်ပါတယ်။ တခြားမြို့တွေမှာဆိုရင် မြို့တည်နှစ်ဆိုပြီး အထိမ်းအမှတ်တွေလုပ်ကြတယ်လေ။ ဒီမှာက မရှိသေးတော့ လူတွေနည်းနည်း အသိလေး၊ သတိလေးရသွားအောင်လုပ်မယ်ဆိုတဲ့အစီအစဉ်ပါ”ဟု ပြောသည်။

 အဆိုပါကဗျာရွတ်ပွဲသို့ ဘူးသီးတောင်မြို့နယ်အတွင်းမှ စာပေဝါသနာရှင်များ၊ စာပေပညာရှင်များနှင့် စိတ်ပါဝင်စားသူများကို လက်လှမ်းမီသလောက် ဖိတ်ခေါ်ထားပြီး အခမ်းအနားတွင် လူဦးကန့်သတ်ထားခြင်းမရှိဟုလည်း ပြောသည်။

 ဘူးသီးတောင်မြို့ကို ၁၉ဝ၈ ခုနှစ်၊ ဒီဇင်ဘာလ ၂၉ ရက်တွင် စတင်ဖွဲ့စည်းခဲ့ပြီး လက်ရှိတွင် မြို့ပေါ်တွင် ရပ်ကွက် (၇)ခုရှိသည်။

 မြန်မာနိုင်ငံ၏အနောက်ဘက်နယ်စပ်ဖြစ်သော မောင်တောခရိုင်အတွင်း ပါဝင်သည့်မြို့တစ်မြို့ဖြစ်ပြီး နယ်စပ်မြို့တစ်မြို့လည်း ဖြစ်သည်။