ALP စွပ်စွဲချက်အခြေအမြစ်မရှိဟု AA တုံ့ပြန်၊ အခြားအင်အားစုတစ်ခုက ပြဿနာရှုပ်ထွေးအောင်ဖန်တီးခြင်းဖြစ်နိုင်ဟုဆို

နိရဥ္စရာ၊ ဇန်နဝါရီ ၅/၂ဝ၂၃

ရခိုင်ပြည်နယ်၊ စစ်တွေမြို့တွင် ရခိုင်ပြည်လွတ်မြောက်ရေးပါတီ(ALP)မှ စစ်ဦးစီးချုပ်နှင့် တပ်မှူး ၂ ဦးတို့ကို ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော်(AA)က သတ်ဖြတ်သွားသည်ဟု ALP က ကြေညာချက်ထုတ်ပြန်မှုမှာ အခြေအမြစ်မရှိသောစွပ်စွဲချက်သာဖြစ်သည်ဟု ULA/AA ပြောခွင့်ရသူ ဦးခိုင်သုခက နိရဥ္စရာကိုပြောသည်။

“အခုလို ကျနော်တို့ကို နာမည်ထုတ်ပြီးတော့ အခြေအမြစ်မရှိ စွပ်စွဲတယ်ဆိုတာက နာမည်သေနေတဲ့ သူတို့ ALP ကို နာမည်ကြီးအောင်လုပ်ချင်လို့ လုပ်တာလည်း ဖြစ်နိုင်ပါတယ်”ဟု ပြောသည်။

လုပ်ကြံသတ်ဖြတ်ခြင်းခံရသူ ၃ ဦးမှာ ALP မှ စစ်ဦးစီးချုပ် ဗိုလ်ချုပ်ခိုင်စိုးမြ (၅၃)နှစ်၊ တပ်ရင်းမှူး ဒုတိယဗိုလ်မှူးကြီး ခိုင်ကျော်စိုး (၃၄)နှစ်နှင့် ဗိုလ်ကြီး ကျော်မင်းစိုး(ခ)ခိုင်သူရိန္ဒ(၃၁)နှစ်တို့ဖြစ်ကြသည်။

သူတို့ဦးသည် ယမန်နေ့ ဇန်နဝါရီလ ၄ ရက်၊ နံနက် ၇ နာရီကျော်တွင် စစ်တွေမြို့၊ စက်ရုံစုရပ်ကွက်ရှိ ဆီတန်းအနီး၌ အိမ်စီးကားတစ်စီးအတွင်း သေနတ်ဖြင့်ပစ်ခတ်ခံရ၍ ပွဲချင်းပြီးသေဆုံးသွားခြင်း ဖြစ်သည်။

သူတို့လုပ်ကြံခံရမှုကို ULA/AA က  လုပ်ကြံသတ်ဖြတ်ခြင်းဖြစ်ကြောင်း ALP က ယနေ့ ဇန်နဝါရီလ ၅ ရက်တွင် သတင်းထုတ်ပြန်ထားသည်။

ALP ၏စွပ်စွဲထုတ်ပြန်မှုနှင့်ပတ်သက်ပြီး ULA/AA ပြောခွင့်ရသူ ဦးခိုင်သုခကို နိရဥ္စရာက မေးမြန်းရာ ယခုကဲ့သို့ တုံ့ပြန်ပြောဆိုလာခြင်းဖြစ်သည်။

ယင်းအပြင် ဦးခိုင်သုခက ALP ပါတီအတွင်း အုပ်စုကွဲမှုများဖြစ်ပေါ်နေပြီး အာဏာဆိုင်ရာ၊ ငွေကြေးဆိုင်ရာ ပဋိပက္ခများကြောင့်လည်း ယခုကဲ့သို့ လုပ်ကြံခံရခြင်းဖြစ်နိုင်သလို အခြားအင်အားစုတစ်ခုကလည်း ပြဿနာရှုပ်ထွေးအောင် ဖန်တီးချင်၍ လုပ်ကြံခြင်းဖြစ်နိုင်သည်ဟု ဆက်ပြောသည်။

“နောက်တစ်ခု စဉ်းစားစရာကတော့ တခြားအင်အားစုတစ်ခုခုကလည်း ပြဿနာရှုပ်ထွေးအောင် ဖန်တီးချင်လို့ ဒီလို သတ်ဖြတ်တာတွေလည်း ရှိနိုင်ပါတယ်။ ဒီလို အရှုပ်ထုပ်တွေကြားမှာ ဘယ်သူက ဘာလုပ်သွားမှန်းမသိတဲ့အတွက် ကျနော်တို့အနေနဲ့ကတော့ ဒီကိစ္စကို မှတ်ချက်ပေးစရာမရှိဘူး”ဟု ပြောသည်။

ယမန်နေ့က လုပ်ကြံခံရမှုကြောင့် ALP စစ်ဦးစီးချူပ် ဗိုလ်ချုပ်ခိုင်စောမြတွင် မေးစေ့နှင့် ဦးခေါင်းထိပ်တို့ ပွင့်ထွက်သွားပြီး ခန္ဓာကိုယ်ညာဘက်ခြမ်းအပါအဝင် ပေါင် ၂ ချောင်းတို့တွင် ဖောက်ထွက်ဒဏ်ရာများနှင့် လက်တို့တွင် သေနတ်ဒဏ်ရာများရရှိခဲ့သည်ဟု သိရသည်။

အလားတူ တပ်ရင်းမှူး ဒုတိယဗိုလ်မှူးကြီး ခိုင်ကျော်စိုးတွင်လည်း ဦးခေါင်းပွင့်ထွက်သွားပြီး ညာဘက်ဂျိုစောင်း၊ ညာဘက် နားအောက်နှင့် ဘယ်ဘက် နားထင်အထက်တို့တွင် သေနတ်ဒဏ်ရာများရရှိခဲ့သည်။

ယင်းအပြင် ဗိုလ်ကြီး ကျော်မင်းစိုး(ခ) သူရိန္ဒတွင် နားနှစ်ဘက်အောက်နှင့် ရင်အုံတို့၌ သေနတ်ကျည်ဖောက်ဝင်ဒဏ်ရာနှင့် လက်တို့တွင် သေနတ်ဒဏ်ရာများရရှိကာ သေဆုံးသွားကြခြင်းဖြစ်သည်ဟု မျက်မြင်များက ပြောသည်။

ယခုကဲ့သို့ လုပ်ကြံခံရသည့်ကိစ္စနှင့်ပတ်သက်ပြီး ALP ပါတီ၏ ဒုတိယဥက္ကဋ္ဌ ဒေါ်စောမြရာဇာလင်းကိုဆက်သွယ်မေးမြန်းရာ သူမက "ထုတ်ပြန်ချက်ရေးထားပြီးပါပြီ။ အဲ့ဒီကိစ္စနဲ့ပတ်သက်ပြီးတော့တော့ တခြားဘာမှမရှိတော့ဘူး။ အဲ့ဒီလောက်ပါပဲ"ဟု ပြောသည်။