မောင်တောမြို့တွင်းသို့ AA တပ်ဖွဲ့ဝင် ၇ ဦး ကားဖြင့်ဝင်ရောက်လာ၊ ရဲတပ်ဖွဲ့က တားရာမှ အခြေအနေတင်းမာမှုဖြစ်ပေါ်ခဲ့

နိရဥ္စရာ၊ ဇန်နဝါရီ ၆ /၂ဝ၂၃

ရခိုင်ပြည်နယ် အနောက်ဘက်နယ်စပ် မောင်တောမြို့တွင်းသို့ ရက္ခိုင့်တပ်တော် (AA) တပ်ဖွဲ့ဝင် ၇ ဦးကားဖြင့် ဝင်ရောက်လာမှုကို  ရဲတပ်ဖွဲ့က တားဆီးရန်ကြိုးစားရာမှ အချေအတင်စကားများပြီး တစ်ဘက်နှင့်တစ်ဘက် သေနတ်များဖြင့် ချိန်ရွယ်ခဲ့ရသည်အထိ အခြေအနေ တင်းမာမှု ဖြစ်ပွားခဲ့သည်ဟု မြို့ခံများက ပြောသည်။

ယနေ့ ဇန်နဝါရီလ ၆ ရက်၊ နံနက် ၈ နာရီခန့်တွင် ရက္ခိုင့်တပ်တော်(AA)တပ်ဖွဲ့ဝင် ၇ ဦးသည် လက်နက်များဖြင့် မောင်တောမြို့တွင်းသို့ ဝင်ရောက်လာခဲ့ကြောင်း၊ မောင်တော မြို့လယ်ရှိ Lucky တည်းခိုခန်းရှေ့အရောက်တွင် ရဲကား ၂ စီးမှ ရဲတပ်ဖွဲ့ဝင် ၂ဝ ဦး၏ တားမြစ်ခဲ့ကြောင်း၊ ထိုသို့ တားမြစ်စဉ်  တစ်ဘက်နှင့်တစ်ဘက် အချေအတင်စကားများကာ သေနတ်များထုတ်ပြီး တစ်ဘက်နှင့်တစ်ဘက် ချိန်ရွယ်ခဲ့ရသည်အထိဖြစ်ပွားခဲ့သည်ဟု မြို့ခံတစ်ဦးက ပြောသည်။

“သူတို့ အချေအတင်စကားများကြတယ်။ သေနတ်တွေ တစ်ဘက်နဲ့တစ်ဘက်ချိန်ပြီးတော့ပေါ့။ ပစ်တော့ မပစ်ခဲ့ကြဘူး။ သေနတ်တွေ ဆွဲလား၊ ရမ်းလားတောင် ဖြစ်ခဲ့တယ်”ဟု ပြောသည်။

၅ မိနစ်ခန့် ယင်းသို့ဖြစ်ပွားပြီးနောက် အခြေအနေမှာ အေးအေးဆေးဆေးဖြစ်သွားခဲ့ပြီး တစ်ဘက်နှင့်တစ်ဘက် လမ်းခွဲသွားကြသည်ဟု မြို့ခံများက ပြောသည်။

ယခုကဲ့သို့ တစ်ဘက်နှင့်တစ်ဘက် အခြေအနေတင်းမာခဲ့ကြသည့်အတွက် ပစ်ခတ်မှုများ ဖြစ်ပွားကြမည်ကို စိုးရိမ်ခဲ့ကြရသည်ဟုလည်း မြို့ခံများက ပြောသည်။

မောင်တောမြို့တွင် စစ်ကောင်စီက စစ်တပ် အသွင်ပြောင်း နယ်ခြားစောင့်တပ်အပြားကို ဖြန့်ကျက်ချထားပြီး လုံခြုံရေယူထားသော်လည်း အေအေတပ်ဖွဲ့ဝင်များ ဝင်ရောက်လာမှုကို တစ်စုံတစ်ရာ ဟန့်တားမှု မပြုလုပ်နိုင်ခြင်းက အေအေ၏ ဩဇာမည်မျှကြီးမားသည်ကို သိရှိနိုင်ကြောင်း အမည်မဖော်လိုသူ ဒေသခံ တစ်ဦးက ပြောသည်။   

ရခိုင်တွင် ပြီးခဲ့သည့် ၂၀၂၂ ခုနှစ် သြဂုတ်လမှစ၍ ရက္ခိုင့်တပ်တော်(AA)နှင့် စစ်ကောင်စီတပ်တို့ တကျော့ပြန် တိုက်ပွဲများ အပြင်းအထန်ဖြစ်ပွားခဲ့ကြပြီး ဂျပန်နိုင်ငံမှ နီပွန်ဖောင်ဒေးရှင်းဥက္ကဋ္ဌ မစ္စတာဆာဆာကာဝါ၏ကြားဝင်ညှိနှိုင်းပေးမှုကြောင့် နိုဝင်ဘာလ ၂၆ ရက်တွင် နားလည်မှုဖြင့် နှစ်ဘက်အပစ်အခတ်များရပ်စဲခဲ့ကြသည်။

ယခုကဲ့သို့ နားလည်မှုဖြင့် ယာယီ အပစ်ရပ်စဲထားသော်လည်း အချိန်မရွေး တိုက်ပွဲဖြစ်လာနိုင်ကြောင်း ULA/AA ပြောခွင့်ရှိသူ ဦးခိုင်သုခက နိုဝင်ဘာ ၂၈ ရက်ကပြုလုပ်သည့် အွန်လိုင်းသတင်းစာ ရှင်းလင်းပွဲတွင်ပြောဆိုခဲ့သည်။