နိရဉ္စရာ၊ဇန်နဝါရီ ၆/၂၀၂၃

ရခိုင်တွင်ရေငံပုစွန်သားပေါက် ရှားပါးမှုကြောင့် ယခုနှစ်ရာသီအတွင်း ပုစွန်မွေးမြူရေသမားများအခက်အခဲ ကြုံနေရကြောင်း သတင်းရရှိသည်။ 

 ယခုနှစ်၂၀၂၂-၂၀၂၃ ခုနှစ် ရေငံပုစွန်သားပေါက်ကာလအတွင်း ရေငံပုစွန်မွေးမြူရေးကိုအဓိက လုပ်ကိုင်သည့် ၇ခိုင်တွင် သဘာ၀အရ ပုစွန်ရှားပါးလာမှုနှင့် သားပေါက်ရှာဖွေရောင်းချမည့်အလုပ်သမားမရှိသည့် အခက်အခဲတို့ကြောင့်  ပုစွန်သားပေါက်များဝယ်ယူမရသည့်အတွက်အခက်အခဲဖြစ်နေ၇ကြောင်း  ငါး၊ ပုစွန်မွေးမြူသူများက ပြောသည်။ 

ပေါက်တောမြို့နယ်၊ချောင်းနွယ်ကျေးရွာမှ ကိုမောင်မြင့်အေးက "ဒီနှစ်ကတော့ အဆင်သိပ်ပြေမှာ မဟုတ်ဘူး။ ဘာလို့ဆို သားပေါက်တွေကရှာမ၇ဘူး။ သဘာ၀ကလည်းရှားပါးတယ်။နောက်ပြီး အလုပ်သမားတွေလည်းမရှိဘူး။ သားပေါက်ရှာရောင်းသူတွေလည်းမရှိကြလို့လေ" ဟု ပြောသည်။ 

လက်ရှိရခိုင်တွင်ရခိုင်ဒေသထွက်ရေငံပုစွန်မျိုးစိတ်ကသာ အဓိကမွေးမြူဖြစ်ထွန်းသည့်အတွက်ထိုင်းနိုင်ငံနှင့် ပြည်မဘက်ကမျိုးများဝယ်ယူရရှိသော်လည်းဖြစ်ထွန်းမှုနည်းပြီး ဆုံးရှုံးမှုများသောကြောင့် ပုစွန်မွေးမြူရေးလုပ်ကိုင်သူများမှာအခက်ကြုံနေကြရခြင်း ဖြစ်ကြောင်း မွေးမြူရေးလုပ်ကိုင်သူများက ပြောသည်။

ရခိုင်မျိုးစိတ်ပုစွန်သားပေါက်ရှားပါးမှုကြောင့် ယခုနှစ် ပုစွန်အထွက်နှုန်း ကျဆင်းနိုင်သလို မွေးမြူရေး လုပ်ကိုင်သူများမှာလည်းစီးပွားရေးအရ ထိခိုက်မှုရှိနိုင်သည်ဟု မြေပုံမြို့နယ်၊မိုးသီးနတ်တောင်ကျေးရွာသားတစ်ဦးက ပြောသည်။ 

 "ထိုင်းမျိုးစိတ် နဲ့ပြည်မဘက်က မျိုးစိတ်တွေ သုံးဖူးတယ်။ ဒီနေရာနဲ့က မလိုက်ဖက်ဘူးထင်တယ်။ မအောင်မြင်ဘူး။ရခိုင်ကမျိုးကပဲ ၇ခိုင်မှာအောင်မြင်တယ်။ အခုက မျိုးရှာမရဘူး။ရှာမ၇တဲ့ အခါကျတော့အရင်လိုလည်း အင်တိုက်အားတိုက်မလုပ်နိုင်ဘူးပေါ့။ဆိုတော့အထွက်နှုန်းတွေပါ ကျရင် စီးပွားရေးပါ ထိမှာပဲ" ဟု ပြောသည်။ 

 ရခိုင်ပြည်နယ်အတွင်းတွင်ရေငံပုစွန်သားဖောက်လုပ်ငန်းများကို ကျောက်ဖြူမြို့နယ်စေတီယျစခန်း၊ ပေါက်တောမြို့နယ် စိုးမဲကျီစခန်း၊ စစ်တွေမြို့နယ်ရေချမ်းပြင်စခန်းတို့တွင် လုပ်ကိုင်လျက်ရှိသော်လည်း  ဒေသဝယ်လိုအားကိုပြည့်မီအောင်မထုတ်လုပ်နိုင်သေးကြောင်း သားပေါက်အများဆုံးထုတ်လုပ်ရောင်းချသည့်ကျောက်ဖြူမြို့နယ်၊ စေတီယျပုစွန်သားပေါက်စခန်း တာဝန်ခံ ဦးရွှေကျော်အောင်ကနိရဉ္စရာသို့ပြောသည်။

 "ကျနော်တို့ဒေသမှာက စခန်းတွေကထုတ်လုပ်မှုနဲ့ပုစွန်မွေးပြည်သူတွေရဲ့ လိုအပ်ချက်ကမမျှသေးဘူး။ ဌာနက စခန်း(၃)ခုကလည်း ဒေသရဲ့လိုအပ်ချက်ကို ပြည့်မီအောင်တော့ကြိုးစားနေပါတယ်။ နည်းပညာ အခက်အခဲတွေတော့ ရှိသေးတယ်" ဟုပြောသည်။ 

 ရေငံပုစွန်သားဖောက်ကာလမှာအောက်တိုဘာလမှ  မတ်လအထိဖြစ်ပြီး ရခိုင်မှထွက်ရှိသည့် ပုစွန်သားပေါက်များကိုရခိုင်ပြည်တွင်းနှင့် ပြည်မကို တင်သွင်း ရောင်းချလျက်ရှိသည်ဟု သူက ဆက်ပြောသည်။ 

 ၇ခိုင်တွင်ပေါက်တော၊ မင်းပြား၊ မြေပုံ နှင့် ကျောက်ဖြူမြို့နယ်တို့က ပုစွန်သားပေါက်ဝယ်ယူမှုအများဆုံး ဖြစ်ကြောင်း သိ၇သည်။ (NN-7)