မြောက်ဦးတွင် ဆိုင်ကယ်လိုင်စင်လုပ်သူများပြား၊ သတ်မှတ်ရက်တိုလွန်း၍ ဆိုင်ကယ်လိုင်စင်လုပ်သူများ အခက်အခဲဖြစ်နေ

နိရဉ္စရာ၊ ဇန်နဝါရီ ၆/ ၂၀၂၃

ရခိုင်ပြည်နယ်၊ မြောက်ဦးမြို့တွင် ဆိုင်ကယ်လိုင်စင် လုပ်သူများပြားနေပြီး သတ်မှတ်ရက်မှာတိုလွန်းနေ

သည့်အတွက် ဆိုင်ကယ်လိုင်စင်လုပ်မည့်သူများမှာ များပြားနေကာ ကြိတ်ကြိတ်တိုးနေရပြီး အ

ခက်အခဲဖြစ်နေသည်ဟု သိရသည်။

မြောက်ဦးတွင် ပြီးခဲ့သည့် ဇန်နဝါရီလ ၂ရက်နေ့မှ စတင်ပြီး  ဇန်နဝါရီလ ၇ရကျနေ့အထိ မြောက်ဦးမြို့၊ အောင်တပ်ရပ်ကွက်၊ သင်္ဘောဆိပ်အနီးရှိ မြို့တော်ခန်းမ၌ ၆ရက်အတွင်းတွင် မြောက်ဦး တစ်မြို့နယ်လုံးရှိ ဆိုင်ကယ်များကို လိုင်စင်များပြုလုပ်ပေးသွားမည်ဖြစ်သည်ဟု သိရသည်။

အဆိုပါဆိုင်ကယ်လိုင်စင်ပြုလုပ်ပေးမည့် သတ်မှတ်ရက် ၆ရက်မှာ မှာတိုလွန်းနေပြီး ကြားတွင်ဇန်နဝါရီလ၄ရက်၊ လွတ်လပ်ရေးနေ့ကလည်း တစ်ရက်နားလိုက်သည့်အတွက် တစ်မြို့နယ်လုံးအတိုင်းအတာဖြင့် လိုင်စင်လုပ်ပေးသည့်ရက်မှာ ပိုနည်းသွားကာ အခက်အခဲဖြစ်နေကြသည်ဟု ဒေသခံများကပြောသည်။

"ဆိုင်ကယ်လိုင်စင်က ၂ရက်နေ့ကနေစလုပ်ပေးတယ်။ ၂ရက်နေ့တစ်နေ့လုံးတော့ အရင်ကလိုင်စင်စစ်ပြီး မြောက်ဦးမြို့မရဲစခန်းမှာ ဖမ်းဆီးထားတဲ့ ဆိုင်ကယ် ၁၁၀ ကျော်လောက်ကိုလုပ်ပေးခဲ့တယ်။ ၄ ရက်နေ့ကလည်း လွတ်လပ်ရေးနေ့နဲ့နားလိုက်တော့ လိုင်စင်လုပ်ပေးမဲ့ရက်ကပိုနည်းသွားတယ်။ ရက်နည်းသွားတော့မလုပ်လိုက်ရမှာလည်းစိုးရိမ်တယ်။ မနက်စောစောထပြီး လာစောင့်ရတယ်။ နယ်ကလူတွေဆိုလည်း မြို့တက်ပြီးလာလုပ်ရတယ်။ သတ်မှတ်ရက်နည်းလို့ မလုပ်လိုက်ရမှာကို အစိုးရိမ်ဆုံးပဲ။ မြောက်ဦးမှာက တစ်ခြားမြို့တွေလို ဆိုင်ကယ်လိုင်စင်လုပ်ပေးတဲ့ ရုံးလည်းမရှိတော့ သူတို့လာလုပ်ပေးတုန်းအလုအယက်လုပ်နေရတယ်" ဟု မြို့ခံတစ်ဦးကပြောသည်။

မြောက်ဦးတွင် တစ်မြို့နယ်လုံးအတိုင်းတာဖြင့် ခန့်မှန်း ဆိုင်ကယ် ၁၀၀၀ ကျော် ၂၀၀၀ ခန့်ရှိမည်ဟု သိရပြီး တစ်နေ့လိုင်စင်လုပ်ပေးနိုင်သည့် ဆိုင်ကယ်အရေအတွက်မှာ ၁၀၀ ကျော်ဝန်းကျင်ခန့်သာ ရှိသည်ဟုလည်း သိရသည်။

"မြောက်ဦးတစ်မြို့နယ်လုံး ဆိုင်ကယ်ပေါင်း တစ်ကျော် နှစ်ထောင်လောက်ရှိမယ်။ သူတို့က တစ်နေ့မှာ ရာဂဏန်းလောက်ပဲ လုပ်ပေးနိုင်မယ်။ အများဆုံး ၂၀၀ ဝန်းကျင်အထိသာပြီးတယ်။ တစ်မြို့နယ်လုံးကို လုပ်ပေးတာဆိုတော့ ဝန်ထမ်းအင်အားလည်းနည်းတယ်။ တစ်နေ့ ပုံမှန် (၂)ရပ်ကွက်လောက် လုပ်ပေးမယ်လို့ သတ်မှတ်ထားတယ်ဆိုရင်တော့ ပိုကောင်းတာပေါ့။ အခုက အစုလိုက်အပုံလိုက် ကြိတ်ကြိတ်တိုးနေကြရတယ်။ သတ်မှတ်ရက်ကလည်းနည်းလွန်းတယ်။ ၆ ရက်လို့ သတ်မှတ် ထားတာတောင် ပထမနေ့က ဖမ်းထားတဲ့ဆိုင်ကယ်တွေ သက်သက်ပဲ လိုင်စင်လုပ်ပေးတာ။ ၄ရက်နေ့ကလည်း လွတ်လပ်ရေးနေ့နဲ့နားလိုက်တော့ ဒေသခံတွေကို ဆိုင်ကယ်လိုင်စင်လုပ်ပေးတဲ့ ရက်က ၄ရက်သာ ရှိတယ်" ဟု မြို့ခံတစ်ဦးကပြောသည်။

ယင်းအပြင် မြောက်ဦးတစ်မြို့နယ်လုံးကို သတ်မှတ်ထားသည့် သတ်မှတ်ရက် ၆ရက်အတွင်းတွင် ဆိုင်ကယ်လိုင်စင်များ အပြီးအစီးလုပ်ပေးသွားမည်ဟု သိရပြီး နောက်ထပ်သတ်မှတ်ရက် အပိုမရှိဟုလည်း သိရသည်။

"ဒီသတ်မှတ်ရက် ၆ရက်အတွင်းမှာပဲ အပြီးလုပ်သွားမယ်လို့တော့ပြောတယ်။ နောက်ထပ်သတ်မှတ်ရက် အပိုမရှိဘူးလို့ သိရတယ်။ ပြီးရင်တော့ မင်းပြားဘက်မှာ ဆက်လုပ်ပေးမယ်လို့ပြောတယ်။ အမှန်ဆို လိုင်စင်လုပ်ပေးမယ့်ရက်တိုတယ်။ တစ်မြို့နည်လုံးကို ဒီ ၆ရက်နဲ့မပြီးဘူး။ သူတို့လုပ်ပေးတုန်း။ လုပ်ခိုင်းတဲ့အချိန်မှာတော့ ပြီးအောင်လုပ်ပေးစေချင်တယ်" ဟု မြို့ခံများကပြောသည်။

မြောက်ဦးမြို့တွင် သတ်မှတ်ထားသည့် ယာဥ်စည်းကမ်း၊ လမ်းစည်းကမ်းအရ လိုင်စင်မရှိသည့် ဆိုင်ကယ်များကို ကုန်းလမ်းပို့ဆောင်ရေးညွှန်ကြားမှုဦးစီးဌာန၏ဥပဒေတိုင်း ဆိုင်ကယ်လိုင်စင်များ ပြုလုပ်ပေးနေခြင်းဖြစ်သည်ဟု မြို့ခံများမှတစ်ဆင့်သိရသည်။

ဆိုင်ကယ်လိုင်စင်လုပ်ပေးရာတွင်လည်း ကောက်ခံသည့် ငွေကြေးနှုန်းထားမှာ အတန်းအစားလိုက် အမျိုးမျိုးရှိပြီး တချို့ကောက်ခံမှုနှုန်းထားမှာ အလွန်မြင့်မားသည်ဟု သိရသည်။ အိန္ဒိယနိုင်ငံထုတ် ဆိုင်ကယ်တစ်စီး လိုင်စင်ကြေားမှာ ၆သောင်းကျော်မှ ၂ သိန်းကျော်အထိရှိပြီး ဗီယက်နမ်ဆိုလျှင် တစ်သိန်းကျော်ထိရှိကြောင်း သိရသည်။ ဂျပန်နိုင်ငံထုတ်ဆိုင်ကယ်အမျိုးအစားများ၏ လိုင်စင်ကြေးမှာ အမြင့်ဆုံဟု သိရသည်။

အဆိုပါကိစ္စနှင့် ပတ်သက်ပြီး မြို့နယ် အထွေထွေအုပ်ချုပ်ရေး ဦးစီးဌာနသို့  ဆက်သွယ်ရာ အဆက်အသွယ် မရရှိခဲ့ပါ။ (NN-12)

ဓာတ်ပုံ - မြောက်ဦးသား(Fb)မှ