အိန္ဒိယနိုင်ငံရှိ ဆရာတော်ကြီးဘဒ္ဒန္တ ဉာဏိဿရကိုအမှူးထား၍ ဘာသာခြား ၃ဝဝကျော် ဗုဒ္ဓဘာသာသို့ကူးပြောင်း

(ဆရာတော်ကြီးသည် နှစ်ပေါင်း ၅ဝ ကျော်အတွင်း ဘာသာခြားဦးရေ ၁ သန်းကျော်ကို ဗုဒ္ဓဘာသာအဖြစ်သွတ်သွင်းပြီးဖြစ်ဟုဆို)

နိရဥ္စရာ၊ ဇန်နဝါရီ ၉ / ၂ဝ၂၃

အိန္ဒိယနိုင်ငံ၊ ယူပီပြည်နယ်တွင်သီတင်းသုံးနေထိုင်သည့် ရခိုင်ဆရာတော်ဘုရားကြီး ဘဒ္ဒန္တ ဉာဏိဿရကိုအမှူးထား၍ ဘာသာမဲ့နှင့် ဘာသာခြားဦးရေ ၃ဝဝ ကျော်ကို ဗုဒ္ဓဘာသာအဖြစ်သို့ ကူးပြောင်းဝင်ရောက်လာခဲ့သည်ဟု  သတင်းရရှိသည်။

အဆိုပါအခမ်းအနားကို အိန္ဒိယနိုင်ငံ၊ ယူပီပြည်နယ်၊ အိလာဘခရိုင် Fatehpur မြို့တွင် ဇန်နဝါရီလ ၈ ရက်၊ မွန်းတည့် ၁၂ နာရီတွင် ပြုလုပ်ခဲ့ခြင်းဖြစ်သည်။

ယင်းအခမ်းအနားတွင် အမျိုးသား ၂၂၅ ဦးနှင့် အမျိုးသမီး ၉၇ ဦးတို့ကို ရခိုင်ဆရာတော်ဘုရားကြီး ဘဒ္ဒန္တ ဉာဏိဿရကို အမှူးထားပြီး  ဗုဒ္ဓဘာသာအဖြစ် ကူးပြောင်း ဝင်ရောက်လာခဲ့ခြင်းဖြစ်သည်ဟု ဆရာတော်ဘုရားကြီး၏တပည့်ဖြစ်သူ အရှင်ဦးသာဂရက နိရဥ္စရာကို မိန့်သည်။

"ဦးဇင်းတို့ရည်ရွယ်ချက်က ဘုရားပွင့်တဲ့ မဇ္စျိမဒေသမှာ ဗုဒ္ဓသာသနာတော် ပြန်လည်ထွန်းကား  ပြန့်ပွားလာချင်လို့ ရှေးက ပထမ ကုသိနာရုံဆရာတော်ကြီး ဆရာတော်ဦးစန္ဒြမဏိလမ်းစဉ်ကို  လိုက်ပြီးတော့ သာသနာပြုရတာဖြစ်ပါတယ်။ ဗုဒ္ဓဘာသာလုံးဝပျောက်ကွယ်သွားတဲ့ အိန္ဒိယနိုင်ငံမှာ ၁၉၅၆ ခု၊ အောက်တိုဘာလ ၁၄ ရက်နေ့က အိန္ဒိယဥပဒေရေးဆွဲသူ ဒေါက်တာ အမ္ဘေဒကာနဲ့ လူပေါင်း ၆ သိန်းကျော်ကို ဗုဒ္ဓဘာသာသွင်းပြီးတော့ အိန္ဒိယမြေမှာ ပြန်လည်မျိုးစေ့ချပေးခဲ့တာဖြစ်တယ်။ အခု လက်ရှိလည်း ကုသိနာရုံဆရာတော်ကြီးက ဆရာတော်ကြီးနည်းတူ အိန္ဒိယတစ်နိုင်ငံလုံးတင်မက ကမ္ဘာကိုပါလှည့်ပြီးတော့ သာသနာပြုနေတာဖြစ်ပါတယ်"ဟု မိန့်သည်။

အိန္ဒိယနိုင်ငံတွင် ဟိန္ဒူဘာသာဝင် ၇ဝ ရာခိုင်နှုန်း၊ မူဆလင် ၂၅ ရာခိုင်နှုန်း၊ ဗုဒ္ဓဘာသာဝင် ၃ ရာခိုင်နှုန်း၊ ဘာသာမဲ့နှင့် ခရစ်ယာန် ၂ ရာခိုင်နှုန်းရှိသည်ဟုလည်း အရှင်ဦးသာဂရက မိန့်သည်။

“သူတို့ဝင်လာတဲ့ရည်ရွယ်ချက်က ဇာတ်နိမ့်ဇာတ်မြင့်ခွဲခြားခံရလို့ ဗုဒ္ဓဘာသာကိုဝင်လာကြတာ များတယ်။ ဗုဒ္ဓဘာသာအဖြစ်ခံယူလိုက်ရင် ဇာတ်စနစ်ပျက်ပြီးတော့ လူနည်းစုအခွင့်အရေးရတယ်။ ဇာတ်မြင့်တွေက ဇာတ်နိမ့်တွေကို အနိုင်ခံတဲ့ပုံစံလုပ်လို့မရဘူး။ လုပ်ရင် ဥပဒေက လူနည်းစု အခွင့်အရေးနဲ့ ကာကွယ်ပေးထားတယ်။ အိန္ဒိယနိုင်ငံမှာက ဗုဒ္ဓဘာသာက လူနည်းစုဖြစ်တဲ့အတွက် ဒီအခွင့်အရေးတွေ ရှိတယ်”ဟု မိန့်သည်။

သက်တော် ၈၆ နှစ်ရှိပြီဖြစ်သော ဆရာတော်ဘုရားကြီး ဘဒ္ဒန္တ ဉာဏိဿရသည် ရခိုင်ပြည်နယ် မင်းပြားမြို့နယ်၊ ဇီးပင်ကြီးကျေးရွာဇာတိဖြစ်ပြီး အိန္ဒိယနိုင်ငံတွင် သီတင်းသုံးနေသည်မှာ နှစ်ပေါင်း ၆ဝ ခန့်ရှိပြီဟု သိရသည်။

ဆရာတော်ဘုရားကြီးသည် အိန္ဒိယနိုင်ငံတွင် ဗုဒ္ဓသာသနာထွန်းကားပြန့်ပွားရေးအတွက် စွမ်းစွမ်းတမံကြိုးပမ်းနေမှုကြောင့် အိန္ဒိယနိုင်ငံအစိုးရနှင့် ယခင်က NLD အစိုးရတို့၏ ဒေါက်တာဘွဲ့နှင့် အခြားဘွဲ့အများအပြားကို ဆက်ကပ်ပူဇော်ခံထားရသည့်ပုဂ္ဂိုလ်ဖြစ်သည်။

ဆရာတော်ကြီးသည် ပြီးခဲ့သည့် ၂ဝ၂၂ ခုနှစ်၊ အောက်တိုဘာလ ၁၄ ရက်ကလည်း အိန္ဒိယနိုင်ငံ၊ Maharashtra ပြည်နယ် Nagpur ခရိုင် Bina Jo Banega ဒေသတွင် ဘာသာမဲ့နှင့် ဘာသာခြားဦးရေ ၅ဝဝ ကျော်ကို ဗုဒ္ဓဘာသာအဖြစ် သွတ်သွင်းပေးခဲ့သည်။

အလားတူ ၂ဝ၂၂ ခုနှစ်၊ ဖေဖော်ဝါရီလ ၁၃ ရက်ကလည်း အိန္ဒိယနိုင်ငံရှိ ဘာသာမဲ့နှင့် ဘာသာခြား ဦးရေ ၅ဝဝ ဦးကို ဗုဒ္ဓဘာသာအဖြစ် သွတ်သွင်းပေးခဲ့သေးသည်။

ဆရာတော်ကြီးသည် လွန်ခဲ့သည့်နှစ်ပေါင်း ၅ဝ ခန့်ကပင် အိန္ဒိယနိုင်ငံအတွင်း ဗုဒ္ဓသာသနာ ထွန်းကားပြန့်ပွားရေးအတွက် သာသနာပြုနေသူဖြစ်ပြီး ယနေ့အထိ ဘာသာမဲ့နှင့် ဘာသာခြားဦးရေ ၁၀ သိန်းကျော်ကို ဗုဒ္ဓဘာသာအဖြစ် သွတ်သွင်းပေးခဲ့ပြီးပြီဟုလည်း သိရသည်။