ရခိုင်တွင် ကိုဗစ်ကြောင့်ပိတ်ထားသည့်ထောင်ဝင်စာတွေ့ခွင့်ကို ဖြေလျော့ပေးရန် အကျဉ်းသားများ၏မိသားစုဝင်များတောင်းဆို

နိရဉ္စရာ၊ ဇန်နဝါရီ ၁၀/၂၀၂၂

ရခိုင်ပြည်နယ်ရှိ အကျဉ်းထောင်အသီးသီးတွင် ကိုဗစ်ကို အကြောင်းပြကာ ပိတ်ထားသည့်ထောင်ဝင်စာတွေ့ခွင့်ကို ဖြေလျော့ပေးရန် အကျဉ်းသားများ၏ မိသားစုဝင်များက တောင်းဆိုနေကြသည်။

ပြီးခဲ့သည့်ကိုဗစ်ရောဂါစတင်ဖြစ်ပွားခဲ့သောနှစ်များမှစ၍ ကိုဗစ်ကပ်ရောဂါကြောင့် အကျဉ်းသားများနှင့် လူချင်းတွေ့ခွင့်ကို ကိုဗစ်စည်းကမ်းနှင့်အညီကန့်သတ်ထားခဲ့ခြင်းဖြစ်ကာ လက်ရှိ မြန်မာနိုင်ငံတွင် ကိုဗစ်ရောဂါကူးစက်မှုမရှိသလောက်နည်းပါးနေသည့်အချိန်တွင်လည်း ရခိုင်ရှိ ထောင်များတွင် ထောင်ဝင်စာတွေ့ခွင့်ကို ဆက်လက်ကန့်သတ်ထားဆဲဖြစ်ကြောင်း မိသားစုဝင်များကပြောသည်။

လက်ရှိ ကိုဗစ်ရောဂါကူးစက်မှုမရှိသလောက်နည်းပါးနေသည့်အချိန်တွင် အကျဉ်းထောင်အတွင်း ထောင်ဝင်စာတွေ့ခွင့်ကို ဖြေလျော့ပေးသင့်ကြောင်းနှင့် ထောင်ကျပြီးသည့်နောက်ပိုင်းမှစ၍ အကျဉ်းကျခံနေရသည့် မိသားစုဝင်များ၏ ကျန်းမာရေး၊ နေရေးထိုင်ရေးအခြေအနေများကို သိရှိလို၍ ထောင်ဝင်စာတွေ့ခွင့်ကို တောင်းဆိုလိုကြောင်း ပလက်ဝမြို့နယ်မှ အကျဉ်းကျခံနေရသည့် ကိုတင်ထွန်းအောင်၏ မိသားစုဝင်တစ်ဦးကပြောသည်။

"တွေ့ချင်ပါတယ်။ ကျနော်တို့က တစ်နှစ်မကမမြင်ရတာလည်းကြာပြီ။ ကျနော်တို့ကအဝေးကလာတာ စစ်တွေကိုတခေါက်လာရတာ အရမ်းခဲယဉ်းတယ်။ ကျနော်တို့လာတဲ့အချိန်မှာ သူနဲ့တွေ့ချင်ပါတယ်" ဟုပြောသည်။

ယခုကဲ့သို့ထောင်ဝင်စာတွေ့ခွင့်မရသဖြင့် အကျဉ်းကျနေသည့် မိသားစုဝင်များ၏ အခြေအနေကို သိရှိခွင့်မရသည့်အပြင် ထောင်ဝင်စာပို့သည့် အစားအသောက်များနှင့် အသုံးအဆောင် ပစ္စည်းများကိုလည်း အကျဉ်းထောင်အစောင့်များနှင့်အပ်နှံခဲ့ရသဖြင့် ၎င်းအကျဉ်းသားများထံသို့ အစားအသောက်များ၊ အသုံးအဆောင်ပစ္စည်းများ သေချာရောက်မရောက်ကို မသိရ၍ စိတ်ပူမိကြောင်း မိသားစုဝင်များကပြောသည်။

ကိုဗစ်ကြောင့် အကျဉ်းထောင်ဝင်စာတွေ့ခွင့်ကို ပိတ်ပင်ထား၍ ထောင်ကျပြီးသည့်နောက်ပိုင်းမှစ၍ အကျဉ်းကျနေသည့်သားဖြစ်သူနှင့်မတွေ့ရသဖြင့် ထောင်ဝင်စာတွေ့ခွင့်ကိုတောင်းဆိုချင်သော်လည်း ၎င်းစစ်ကောင်စီတာဝန်ရှိသူများမှာ လူသားချင်းကိုယ်ချင်းစာစိတ် ရှိသူများ မဟုတ်၍ တောင်းဆိုလျှင်လည်း ထူးခြားမည်ဟု မထင်ကြောင်း အေအေနှင့်ဆက်စပ်သည်ဟုဆိုကာ အကြမ်းဖက်မှုပုဒ်မဖြင့် ထောင်သုံးနှစ်ချမှတ်ခံထားရသူတစ်ဦး၏ မိခင်တစ်ဦးက ပြောသည်။

"သူတို့လက်ခုပ်ထဲကရေဆိုတော့ တောင်းဆိုလို့ရောရမလား။ တောင်းဆိုလို့၊ သနားပြလို့၊ ဒူးထောက်ပြလို့လည်း ခွေးနားမှာစောင်းတီးသလောက်တောင် တန်ဖိုးမထားဘူး။ သူတို့ခေတ်ပဲကိုလေ။ အခုကသားနဲ့မတွေ့ရတော့ သားကြိုက်တဲ့အစားအသောက်တွေလည်းမထည့်ရဘူး။ ဘယ်လိုစားလို့ ဘယ်လိုနေရလဲမသိဘူး။ သားကိုအရင်လိုလည်း မပေးနိုင်တော့ဘူး။ ထောင်ကျပြီးလောက်ကနေ နေကောင်းလား၊ ကျန်းမာလားလည်းမသိရဘူး" ဟု ပြောသည်။

ထို့အပြင် နှစ်ရှည်ထောင်ဒဏ်ကျနေသည့် ရခိုင်ပြည်နယ်အစိုးရအဖွဲ့ဝင်ဝန်ကြိးချုပ်ဟောင်း ဦးညီပုနှင့် အစိုးရအဖွဲ့ဝင် ဝန်ကြီးဟောင်းငါးဦးတို့မှာလည်း စတင်ဖမ်းဆီးခံရသည့်အချိန်မှစ၍ စစ်တွေ အကျဉ်းထောင်အထူးတရားရုံးမှ တရားရင်ဆိုင်ခဲ့ရသဖြင့် ထောင်ချခံရသည့်အချိန်အထိ မိသားစုဝင်များနှင့် လူချင်းတွေ့ဆုံခွင့်မရခဲ့ကြောင်း သိရသည်။

အဆိုပါပြည်နယ်ဝန်ကြီးချုပ်ဟောင်း ဦးညီပုတွင်လည်း ဘက်ဖက်မျက်စိတိမ်စွဲနေသဖြင့် ခွဲစိတ်ကုသရန်အတွက် ခွင့်တောင်းဆိုထားသည်မှာ လေး၊ ငါးလခန့်ကြာမြင့်နေပြီဖြစ်သော်လည်း အခြေအနေတစ်စုံတစ်ရာမထူးခြားသေးကြောင်း သိရသည်။

လက်ရှိအချိန်တွင် ရခိုင်ပြည်တွင်သာမက မြန်မာတစ်နိုင်ငံလုံးမှာပါ ကိုဗစ်ရောဂါကူးစက်မှု မရှိသလောက်နည်းပါးနေပြီဖြစ်၍ နိုင်ငံတဝန်းပွဲလန်းသဘင်များကျင်းပနေသည့်အချိန်တွင် အကျဉ်းသားများ၏ ထောင်ဝင်စာတွေ့ခွင့်ကို ကိုဗစ်ကို အကြောင်းပြ ကန့်သတ်ပိတ်ပင်ထားခြင်းမှာ မသင့်တော်ကြောင်း လူမှုရေးလှုပ်ရှားသူများက ဝေဖန်ပြောဆိုနေကြသည်။

ရခိုင်ပြည်အတွင်းရှိ အကျဉ်းထောင်အသီးသီးမှ အကျဉ်းသား ၃၀၀ ကျော်ကို ပြီးခဲ့သည့် ဇန်နဝါရီလ ၄ ရက်က စိန်ရတုလွတ်လပ်ရေးနေ့အထိမ်းအမှတ်အဖြစ် လွတ်ငြိမ်းချမ်းသာခွင့်ပေးခဲ့သော်လည်း ထိုအထဲတွင် နိုင်ငံရေးအကျဉ်းသား တစ်ဦးတစ်ယောက်မှမပါဝင်ကြောင်း သိရသည်။