"ရွေးကောက်ပွဲသည် မြန်မာနိုင်ငံရေးစစ်ရေးအကျပ်အတည်း၏ထွက်ပေါက်ဟု ဒေါက်တာအေးမောင်ပြော" 

နိရဥ္စရာ၊ဇန်နဝါရီ ၁၁/၂၀၂၃

စစ်ကောင်စီက ယခုနှစ် ကျင်းပမည့် ရွေးကောက်ပွဲတွင် ၇ခိုင်ဦးဆောင်ပါတီ  ( AFP) ပါတီအနေဖြင့်ဝင်ရောက်ယှဉ်ပြိုင်မည်ဖြစ်ပြီး ၎င်းရွေးကောက်ပွဲသည် မြန်မာနိုင်ငံရေး၊စစ်ရေးအကျပ်အတည်း၏ ထွက်ပေါက်ဖြစ်သည်ဟု ၇ခိုင့်ဦးဆောင်ပါတီ (AFP) ဥက္ကဌဒေါက်တာအေးမောင်က နိ၇ဉ္စရာ သတင်းဌာနကိုပြောသည်။ 

"မြန်မာနိုင်ငံရေးအကျပ်အတည်း၊ စစ်ရေးအကျပ်အတည်းက ထွက်နိုင်တဲ့ ထွက်ပေါက်ဟာ ရွေးကောက်ပွဲ။ ဒီဟာကြီးကို သေသေချာချာစဉ်းစားရင်ထွက်ပေါက်လို့မြင်တက်လာလိမ့်မယ်"ဟု သူက ပြောဆိုသည်။ 

ပြီးခဲ့သည့်၂၀၂၀ ရွေးကောက်ပွဲတွင် မဲမသမာမှုများရှိခဲ့သည်ဟုဆိုကာ၂၀၂၁ ခုနှစ်၊ ဖေဖော်ဝါရီလ၁ ရက်နေ့တွက်စစ်တပ်က နိုင်ငံတော်အာဏာသိမ်းခဲ့သည်။

ယင်းနောက်(၂၀၂၃) ခုနှစ်တွင်  ရွေးကောက်ပွဲတစ်ရပ်ပြန်လည်ကျင်းပကာ ရွေးကောက်ပွဲ အနိုင်၇ပါတီကို အာဏာလွှဲပြောင်းပေးမည်ဟုစစ်ကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်က ပြောဆိုထားသည်။ 

ဒေါက်တာအေးမောင်က "ရွေးကောက်ပွဲကြီးမဖြစ်အောင်လုပ်လည်းကာကွယ်ရေးနဲ့ လုံခြုံရေးကောင်စီသည် တပ်မတော်ကာကွယ်ရေးဦးစီးချုပ်ကို အခုလိုပဲ နှစ်နှစ် နှစ်နှစ်စီ ကာလခြားပြီးပေးပိုင်ခွင့် ရှိတယ်။ အဲ့ဒီလို ဆက်သွားမှာလား။ ပြည်ထောင်စုတစ်ခုရဲ့လက်ရှိပြည်သူအားလုံးရဲ့ အားသာချက်ဖြစ်အောင် ဘယ်လိုလုပ်မလဲ။အများတောင်းနေကြတဲ့ ဖယ်ဒရယ်ဒီမိုကရေစီ နိုင်ငံတော်ကို ဒီအချိန်မှာဖွဲ့စည်းပုံအခြေခံ ဥပဒေကို အမြန်ဆုံးပြင်နိုင်အောင်၊ အသစ်ပြန်ရေးနိုင်အောင်ကျနော်တို့ မညှိနှိုင်းနိုင်ဘူးလား။ လက်နက်ကိုင်တော်လှန်ရေး အင်အားစုတွေသွေးမြေကျပြီးမှ ကိုယ်လိုချင်တဲ့နေရာတွေကိုနေရာကို ရအောင်ယူမှာလား။ သေနတ်ကို ရင်ဆိုင်ထားပြီးမှ ဆွေးနွေးညှိနှိုင်းပြီးမှ အဖြေ၇အောင် ထုတ်မှာလား။ဒါက ဉာဏ်ရည်နဲ့ဆိုင်တယ်"ဟုပြောသည်။

စစ်ကောင်စီသည် လာမည့်  ရွေးကောက်ပွဲတွင်  PR(အချိုးကျကိုယ်စားပြုစနစ်)နှင့် ကျင်းပရန် စီစဉ်နေပြီးလက်ရှိ ရခိုင်အပါအဝင်မြန်မာတစ်နိုင်ငံလုံးတွင် လူဦးရေစာရင်းများကို ဇန်နဝါရီ (၉) ရက်နေ့မှစတင်ကောက်ခံနေပြီဟုသိ၇သည်။

အဆိုပါရွေးကောက်ပွဲနှင့်ပတ်သက်ပြီး နိုင်ငံတကာနှင့် မြန်မာနိုင်ငံရေးအသိုင်းအဝိုင်းကြား ဝေဖန်ကန့်ကွက်မှုများ ရှိနေပြီးစစ်ကောင်စီကျင်းပမည့် ရွေးကောက်ပွဲအား မဲမပေးကြရန်၊  ဝင်ရောက်မယှဉ်ပြိုင်ကြရန်နှင့်ကျင်းပခွင့်မပြုကြောင်း သက်ဆိုင်ရာ ကာကွယ်ရေးတပ်ဖွဲ့ တချို့ကလည်း သတိပေးမှု ထုတ်ပြန်ထားသည်။ 

"စစ်ရဲ့ဒဏ်က ရုန်းထွက်ဖို့လိုလား။ရုန်းထွက်တော့မှာလား မရုန်းထွက်ဘူးလား။ ထပ်ပြီးတော့ SAC ကို အာဏာပေးမှာလား။ ရွေးကောက်ပွဲကိုဖျက်ဖို့လိုအပ်သလား။ ရွေးကောက်ပွဲကို အောင်အောင်မြင်မြင် ပြီးအောင် အားပေးသင့်သလား။ ဒါက လူထုရယ်၊ နိုင်ငံတကာအဖွဲ့အစည်းများရယ်၊နိုင်ငံခြားက ပုဂ္ဂိုလ်တွေရယ်ဆုံးဖြတ်၇မှာ။ SAC က တော့သူ့လမ်းသူသွားမှာ။ ကျနော်တို့ကဘယ်လမ်းရွေးမလဲ။ ကျနော်တို့ရဲ့အကျိုးစီးပွားကို ဘယ်လိုကာကွယ်မှာလဲ။ ဒါကကျနော်တို့ လူထု ဆုံးဖြတ်၇မှာ "ဟု ပြောသည်။

နှစ်ပေါင်း(၇၀) ကျော်စစ်သံသရာလည်နေသည့် မြန်မာနိုင်ငံမှာ ယခုလာမည့် ရွေးကောက်ပွဲကို ဖျက်ရန်လိုအပ်သလား၊အားပေးသင့်သလားဆိုသည်မှာ ပြည်သူလူထု နှင့် နိုင်ငံတကာ အဖွဲ့အစည်းများကကောင်းစွာ ဆုံးဖြတ်သင့်သည်ဟုလည်း ဒေါက်တာအေးမောင်က ဆက်လက် ပြောဆိုသည်။ 

၎င်းရွေးကောက်ပွဲကို၇ခိုင့်ဦးဆောင်ပါတီ(AFP) အနေနှင့်ဝင်ရောက်ယှဉ်ပြိုင်မည်ဟုလည်း ဒေါက်တာအေးမောင်က ဆိုသည်။

"ရွေးကောက်ပွဲနဲ့ပတ်သက်လို့ ဝင်ရောက်ယှဉ်ပြိုင်ဖို့အတွက်မှတ်ပုံတင်ထားတဲ့ပါတီဖြစ်ပါတယ်။ နိုင်ငံရေးပါတီ မှတ်ပုံတင်တဲ့ဥပဒေမှာကိုက ရွေးကောက်ပွဲကျင်းပတဲ့အခါ အနည်းဆုံး (၃) နေရာမှာပြိုင်ရမယ်ဆိုတဲ့ကန့်သတ်ချက်ရှိတယ်။ အဲ့လိုမပြိုင်ရင် နိုင်ငံရေးပါတီအဖြစ်ကပယ်ဖျက်ခြင်းခံ၇မယ်" ဟု ပြောသည်။ 

လက်ရှိ ၇ခိုင်တွင်လူထုထောက်ခံမှုအများဆုံးရရှိထားသည့်ရက္ခိုင်အမျိုးသားအဖွဲ့ချုပ်/ ရက္ခိုင့်တပ်တော် (ULA/AA) က ရခိုင်ပြည်တွင်းရွေးကောက်ပွဲဖြစ်ခြင်းမဖြစ်ခြင်းမှာ ကျင်းပပြုလုပ်မည့်အချိန်၌ဖြစ်ပေါ်နေသည့် နိုင်ငံရေးအခြေအနေအပြင် မြန်မာပြည်သူတစ်ရပ်လုံး၏ဆန္ဒအပေါ်လည်း မှုတည်ကြောင်း၊ ရခိုင်ပြည်နယ်အတွင်းပြုလုပ်ခဲ့သည့်ရွေးကောက်ပွဲ သမိုင်းတစ်လျှောက်တွင်၇ခိုင်ပြည်သူများ၏ ဘ၀ ဖြစ်ပေါ်တိုးတက်မှုများအတွက် တစ်စုံတစ်ရာအထောက်အကူပြုနိုင်ခြင်းမရှိခဲ့ဟုလည်း ပြောဆိုထားသည်။(NN-7)