နိရဥ္စရာ၊ဇန်နဝါရီ ၁၃/၂၀၂၃

စစ်ကောင်စီခေါင်းဆောင်ဗိုလ်ချုပ်မှူးကြီး မင်းအောင်လှိုင်၏ ခရီးစဉ်ရှိသည်ဟုဆိုကာ သံတွဲမဇင် လေဆိပ်မှ ဂျိတ္တောရပ်ကွက်အထိမင်းဘာကြီးလမ်းမကြီးဘေးတစ်လျှောက်ရှိဈေးဆိုင်ခန်းများ အဖျက်ခံလိုက်၇သဖြင့် ဒေသခံ ဆိုင်ပိုင်ရှင်များမှာ ဝင်ငွေထိခိုက်ကာရပ်တည်ရှင်သန်ရေး အခက်အခဲဖြစ်နေကြ၇သည်ဟု   သိ၇သည်။

သံတွဲမြို့၊ မင်းဘာကြီးလမ်းမတစ်လျှောက်ရှိကွမ်းယာဆိုင်၊ မုန့်ဆိုင် စသည့် စုစုပေါင်း ဈေးဆိုင်ခန်း၂၀ ကျော်ခန့်ကို ရပ်ကွက်အုပ်ချုပ်ရေးမှူး၊ စည်ပင်နှင့် ရဲတို့က ဇန်နဝါရီ၁၀ ရက်နေ့က ရုတ်တရက် လာရောက်ဖျက်သိမ်းခဲ့ခြင်းဖြစ်ကြောင်းသံတွဲမြို့ခံတစ်ဦး ပြောသည်။ 

"ရဲ၊ စည်ပင်နဲ့ အုပ်ချုပ်ရေးမှူးတို့ပါတယ်။ လမ်းမကြီးဘေးတစ်လျှောက်က ဆိုင်ခန်းတွေကိုဖျက်သွားတာ။ သူတို့ပြောတာတော့ လူကြီးခရီးစဉ်လည်းရှိတယ်။ စည်ပင်ဧရိယာကျူးကျော်လို့ဆိုတဲ့ ခေါင်းစဉ်နဲ့ ဖျက်တယ်ပေါ့ ။ တစ်ဖက်က ရောင်းချစားသောက်နေရသူတွေမှာဒုက္ခဖြစ်၇ပြီ" ဟု ပြောသည်။ 

အဆိုပါဈေးဆိုင်ခန်းများမှာ မဇင်ရပ်ကွက်၊ ဇီးဖြူကုန်းရပ်ကွက်၊ ငပလီရပ်ကွက်တို့တွင် တည်ရှိပြီးလက်ရှိ စည်ပင်သာယာ၏နယ်နိမိတ်အတွင်း ကျူးကျော်ဆောက်လုပ်ထားသည်ဟု ဆိုကာ ဇန်နဝါရီလ (၆)ရက်နေ့တွင် စည်ပင်က အမိန့်စာထုတ်ကာ သတိပေးခဲ့ပြီးနောက် လာရောက်ဖျက်ဆီးခဲ့ကြသည်ဟု သိ၇သည်။ 

အဆိုပါ အမိန့်စာအရပွင့်လင်းရာသီရောက်ရှိလာ၍ သံတွဲမြို့ကို ဘုရားဖူးဧည်သည့်များ၊အပန်းဖြေခရီး လာရောက်သူများ များပြားလျက်ရှိရာ မြို့သန့်ရှင်းသာယာရေးအတွက် ဆောင်ရွက်ခြင်းဖြစ်ကြောင်းရေးသားထားဟု သိ၇သည်။

စစ်ကောင်စီဥက္ကဌ ဗိုလ်ချုပ်မှူးကြီးမင်းအောင်လှိုင်သံတွဲခရီးစဉ်ရှိ၍ ဖျက်သိမ်းခြင်းဖြစ်ကြောင်း ဝန်ထမ်းအသိုင်းအဝိုင်းအရကြားသိ၇ကြောင်း အမည်မဖော်လိုသည့် သံတွဲမြို့မှ မြို့မိမြို့ဖတစ်ဦးက ပြောသည် 

"စစ်ကောင်စီဥက္ကဋ္ဌ မင်းအောင်လှိုင်လာမယ်လို့ကြားတယ်။ အဲ့ဒီအတွက်ဖျက်ခိုင်းတယ်လို့ ဝန်ထမ်းအသိုင်းအဝိုင်းကနေ ကြားသိနေ၇တယ်။ ထုံးစံအတိုင်းလူကြီးလာခါနီးရင် အတင်းသန့်ရှင်း၇၊ ရှင်းလင်း၇တဲ့အနေအထားပေါ့။ ကြားကလက်လုပ်လက်စားအခြေခံလူတန်းစားတွေက ဓားစာခံဖြစ်သွားတာပေါ့လေ။ သူတို့အတွက်စားဝတ်နေရေး ထိခိုက်ကုန်တာပေါ့"ဟုပြောသည်။

 စစ်ကောင်စီဥက္ကဌဗိုလ်ချုပ်မှူးကြီးမင်းအောင်လှိုင်၏ ရခိုင်ခရီးစဉ်အတွင်း သံတွဲအပြင်တခြားမြို့နယ်တချို့ကိုလည်း သွားရောက်ရန်ရှိသည်ဟုလည်း သတင်းများထွက်ပေါ်နေသည်ဟု သိရှိ၇သည်။(NN-7)

 (ဓာတ်ပုံ- လမ်းဘေးဈေးဆိုင်များကိုဖယ်ရှားပြီးနောက်မြင်၇သည့် မြင်ကွင်း)