မင်းပြားမြို့နယ်၊ ပန်းမြောင်း တောင်ဖြူတောင်အနီး ပေါက်ကွဲသံထွက်ပေါ်

ရေးသူ: Web Master
| ရက်စွဲ: ၁၃ ဇန်နဝါရီ ၂၀၂၃
| ကြည့်ရှုသူ: 519

နိရဥ္စရာ၊ ဇန်နဝါရီ ၁၃/၂၀၂၃

ရခိုင်ပြည်နယ်၊ မင်းပြားမြို့နယ်၊ ပန်းမြောင်းကျေးရွာနှင့် နှစ်မိုင်လောက်အကွာ စစ်တပ်တပ်စွဲထားသည့် တောင်ဖြူတောင်အနီးမှ ပေါက်ကွဲသံ(၂) ချက်ကို ယနေ့နံနက်က အကျယ်ကြီး ကြားခဲ့ရကြောင်း ပန်းမြောင်း ဒေသခံများက ပြောသည်။

ပန်းမြောင်းဒေသခံတစ်ဦးက " ဒီကနေ့ ဇန်နဝါရီ ၁၃ ရက် နံနက် (၇) နာရီခန့်က ပေါက်ကွဲသံ(၂) ချက် အကျယ်ကြီး ကြားခဲ့ရတယ်။ မိုင်းပေါက်တာဖြစ်မယ်။ ရွာအရှေ့မြောက်ထောင့်ရှိ တောင်ဖြူတောင်က ပေါက်ပါတယ်။ မနက် ၇ နာရီလောက်ကပါ။ တိရိစ္ဆာန်တွေနင်းမိတာလည်း ဖြစ်နိုင်ပါတယ်။ လူထိနင်းမိတာလည်းဖြစ်နိုင်တယ်။ ဘာဖြစ်တယ်ဆိုတဲ့ သတင်းကတော့ အခုနေ့လယ်ပိုင်းအချိန်ထိတော့ မကြားရသေးဘူး"ဟု ပြောသည်။

လက်ရှိ မိုင်းပေါက်ကွဲမှုဖြစ်ပွားသည့် တောင်ဖြူတောင်တွင် ၂၀၁၈ ခုနှစ် တိုက်ပွဲများ စတင်ဖြစ်ကတည်းက စစ်ကောင်စီတပ်က တပ်စွဲနေခဲ့ခြင်းဖြစ်ပြီး တိုက်ပွဲများ ပြင်းထန်ခဲ့သည့် နေရာဖြစ်၍ မိုင်းနှင့် စစ်လက်နက်အကြွင်းအကျန်များ မကြာခဏပ ပေါက်ကွဲမှုများရှိကြောင်း သိရသည်။

တောတောင်ကို အဓိက မှီခိုစားသောက်သည့်ဒေသဖြစ်၍ အနီးအနားမှ ကျေးရွာသားများအနေဖြင့် မိုင်းကို ကြောက်၍ ထင်းခွေ၊ သစ်ခုတ်၊ ဟင်းရှာမသွားရဲသော်လည်း စားဝတ်နေရေးအတွက် အသက်အန္တရာယ်နှင့် ရင်းကာသွားလာနေရသည်ဟု ဒေသခံများက ပြောသည်။

"တောကိုတောင်ကိုလည်း လူတွေကသွားလာနေရတာ။ အခုလိုမိုင်းပေါက်ကွဲတာတွေကြားနေရတော့ စိုးရိမ်မှုက ရှိပါတယ်။ ဒါပေမယ့် သွားနေရတာပါပဲ။ သမုဒ္ဒရာ ဝမ်းတစ်ထွာအတွက်ပါ"ဟု ကျောင်းတောင်ကျေးရွာသား တစ်ဦးက ပြောသည်။

ပြီးခဲ့သည့် ၂၀၂၂ ခုနှစ်၊ မေလကလည်း ပန်းမြောင်းကျေးရွာအနီး မိုင်းပေါက်ကွဲ၍ အသက်(၆၈)နှစ်အရွယ် အမျိုးသားတစ်ဦးသေဆုံးခဲ့ရသည်။ (NN-7)