Grand Royal အရက်ချက်စက်ရုံ မီးလောင်မှု Level 3 အဆင့်ထိ ရောက်ရှိခဲ့ပြီး ထိခိုက်ဒဏ်ရာရရှိသူ ၃၀ ကျော် ဆေးရုံများသို့ ပို့ဆောင်ထားရဟုဆို

နိရဉ္စရာ၊ ဇန်နဝါရီ ၁၄/ ၂၀၂၃

ရန်ကုန်တိုင်း၊ မှော်ဘီမြို့နယ်၊ လိပ်ပုတ်ကျေးရွာအုပ်စု၊ အမှတ် (၄) လမ်းမကြီးပေါ်ရှိ Grand Royal အရက်ချက်စက်ရုံသည် ယမန်နေ့ (ဇန်နဝါရီလ ၁၃ ရက်နေ့) ညနေ ၃ နာရီခွဲအချိန်က  စတင် မီးလောင်မှုဖြစ်ပွားခဲ့ပြီး ဒဏ်ရာရသူ အနည်းဆုံး လူပေါင်း ၃၀ ကျော်ကို ဆေးရုံသို့ ပို့ဆောင်ခဲ့ရကြောင်း မြန်မာနိုင်ငံမီးသတ်တပ်ဖွဲ့ထံ တစ်ဆင့် သိရှိရသည်။

မီးလောင်စဉ်အတွင်းအရက်ချက်စက်ရုံဗွိုင်လာအိုးများ ပေါက်ကွဲမှုများ ဖြစ်ပေါ်ခဲ့ပြီး ထိခိုက်ဒဏ်ရာရရှိမှု အများအပြားဖြစ်ပေါ်ခဲ့ကြောင်း ရွှေမေတ္တာလူမှုကူညီရေးအသင်းထံမှ သိရှိရသည်။

“အတိအကျတော့ မသိရသေးဘူး။ အခုလောလောဆယ်တော့ အင်းစိန် (ဆေးရုံ)ကို ၂၈ ယောက်နဲ့ ရန်ကုန် (ဆေးရုံ)ကို ၄ ယောက်တော့ ပို့ထားရတယ်”ဟု ရွှေမေတ္တာလူမှုကူညီရေး ပရဟိတအသင်း အဖွဲ့ဝင်တစ်ဦးမှ ယမန်နေ့ ညက ပြောကြားသည်။

မီးလောင်မှုကြောင့် မီးသတ်တပ်ဖွဲ့ဝင်များနှင့် လူမှုရေးအသင်းဝင်များပါ ထိခိုက်ဒဏ်ရာရရှိမှုများ ကြုံတွေ့ခဲ့ရပြီး အများစုသည် အရေပြားအပူလောင်သည့် ဒဏ်ရာအများဆုံးဖြစ်ကြောင်းကိုလည်း ပရဟိတ အသင်းဝင်များထံ မှ သိရှိရသည်။

မီးလောင်မှု စတင်ဖြစ်ပွားချိန် Level 2 အဆင့်သာရှိခဲ့ပြီး  ၁၀ မိနစ်အကြာတွင် Level 3 အဆင့်သို့ရောက်ရှိခဲ့ပြီး ည ၈ နာရီ  ၃၇ မိနစ်မှ  မီးထိန်းနိုင်ခဲ့ကြောင်း မြန်မာနိုင်ငံမီးသတ်တပ်ဖွဲ့က ကြေညာသည်။

သို့သော်လည်း ည ၉ နာရီကျော်သည် အထိ မီးကြွင်းမီးကျန်များကို ဆက်လက်ငြှိမ်းသတ်ခဲ့ရသည်ဟု ဆိုသည်။

မီးလောင်မှုကြောင့် စက်ရုံရှိ အရက်ဆီ ဂါလန် ငါးသောင်းဆံ့ ကန် ၃ လုံး၊ အရက်ဆီလီတာ နှစ်သောင်းဆံ့ ကန် ၆ လုံးနှင့် ဂိုဒေါင် ၃ လုံးတို့ လောင်ကျွမ်းခဲ့ပြီး ညနေ ၅ နာရီအချိန်တွင်  စက်ရုံအတွင်း ပေါက်ကွဲမှုဖြစ်ပွားခဲ့သဖြင့် မီးသတ်တပ်ဖွဲ့ဝင် ၁၂ ဦး ဒဏ်ရာရခဲ့ပြီး အင်းစိန်ဆေးရုံကို ပို့ဆောင်ထားရကြောင်း ဖော်ပြထားသည်။

မီးလောင်ကျွမ်းမှုကို Level ၃ အဆင့် သတ်မှတ်ငြှိမ်းသတ်ခဲ့ရပြီး ရန်ကုန်တိုင်းရှိ  မီးသတ်စခန်းများမှ မီးသတ်ယာဥ် အစီး ၆၀၊ မီးသတ်တပ်ဖွဲ့ဝင် စုစုပေါင်း ၅၀၀ ကျော်ဖြင့်  ငြှိမ်းသတ်ခဲ့ရသည်ဟု သိရှိရသည်။

ဓာတ်ပုံ - MFSD၊ ရွှေမေတ္တာလူမှုကူညီရေး ပရဟိတ အသင်း