မင်းပြားမြို့တွင် အထူးကုဆရာဝန်ကြီးများအဖွဲ့ကအခမဲ့ဆေးကုသပေးမည်

နိရဥ္စရာ၊ ဇန်နဝါရီ ၁၈/ ၂၀၂၃

ရခိုင်ပြည်နယ်၊ မင်းပြားမြို့၊  ရာမောင်ခန်းမတွင် အထူးကုသမားတော်ဆရာဝန်ကြီးအဖွဲ့မှ ဒေသခံပြည်သူများကို လာမည့် ဇန်နဝါရီ ၂၀ရက်နေ့မှ ၂၂ ရက် အထိ(၃) ရက်တိုင်တိုင် အခမဲ့ဆေးကုသပေးသွားမည်ဟု သတင်းရရှိသည်။

အခမဲ့ကုသပေးမည့်ဆရာဝန်ကြီးများမှာ သမားတော်ဒေါက်တာရဲဇော်မျိုး၊ ခွဲစိတ်ပါရဂူ ဒေါက်တာစိုးမြတ်မောင်၊ မျက်စိအထူးကုပါရဂူ ဒေါက်တာလှဌေးအောင်၊ သွားဘက်ဆိုင်ရာအထူးကုပါရဂူ ဒေါက်တာမြင့်သူအောင်၊ ကလေးအထူးကုပါရဂူ ဒေါက်တာဝင်းမင်းအောင်၊ ဓါတ်မှန်ပါရဂူ ဒေါက်တာတေဇကျော်ဖြစ်ကြပြီး အပါအဝင် ကျန်းမာရေးဝန်ထမ်း ဆရာ၊ ဆရာမ (၂၀)ခန့်တို့ဖြင့် ကုသပေးသွားမည်ဟု မင်းပြားမြို့ခံတစ်ဦးဖြစ်သူ ဦးစိုးမင်းက နိရဉ္စရာသတင်းဌာနကိုပြောသည်။

“ ဦးလေးတို့ဒီလိုတင်ပြတဲ့အခါ ဆရာဝန်တွေက တပ်မတော်အစိုးရ အစီစဉ်နဲ့လာကြတာပါ။ လက်ရှိ အနေအထားအရ လူတွေမကျန်းမမာဖြစ်ကြတဲ့အချိန်မှာ ဦးလေးတို့နေရာမှာ ပါရဂူတွေ၊ သမားတော်တွေ မရှိတဲ့အတွက် စစ်တွေမြို့ကိုသွားပြီတော့ ပါရဂူတွေနဲ့သွားရောက်ပြသရတဲ့အခါ နယ်က  ဆင်းရဲကျပ်တည်းတဲ့ သူတွေဟာ ပိုက်ဆံမရှိရင်သွားရောက်မကုသနိုင်ကြဘူး။ လူတွေကဆင်းရဲကြတာကိုး။ ဒီနှစ်လို့မဟုတ်ဘူး။ ဒေသခံ ပြည်သူတွေက အချိန်တိုင်း အခက်အခဲရှိကြတယ်။ ဒါကြောင့် အခုလိုကျန်းမာရေးဝန်ဆောင်မှု အခမဲ့ ကုသမှုရရှိနိုင်အောင်လို့ ရွယ်ရည်ပြီးတော့စီစဉ်တာပါ “ ဟု ၎င်းက ပြောသည်။

 လာမည့် ဇန်နဝါရီ ၂၀ ရက်နေ့မှ ၂၂ရက်နေ့အထိ မနက် ၈နာရီမှ ည ၅နာရီထိ ကုသပေးသွားရန်  ရက်သတ်မှတ်ထားပြီး လူနာအပေါ်မူတည်ပြီး ရက်တိုးကာ ကုသပေးသွားရန်လည်း အစီအစဉ်ရှိကြောင်း ၎င်းက ဆက်ပြောသည်။

 “ လက်ရှိ ၃ရက် စီစဉ်ထားတယ်။ လူနာများရင်များသလောက် ဆက်လို့ရက်တိုးပြီးကုသပေးဖို့စီစဉ်ထားပါတယ်။ မနက်ပိုင်း ၈နာရီကနေ ၁၁နာရီထိကို နယ်ကလူတွေကိုကုပေးဖိုစီစဉ်ထားတယ်။ ပြီးရင် နေ့လယ် ၁နာရီကနေ ၅နာရီအထိကိုတော့ မင်းပြားမြို့ပေါ်ကလူတွေအတွက်စီစဉ်ပေးထားပါတယ်။ အယင်နှစ်တွေက ဒီလိုမျိုးကုသပေးတာမရှိသေးဘူး။ ဒါပထမအကြိမ်ပဲ။ နောက်နှစ်တွေမှာလည်း ဆရာဝန်တွေကဒီလို ကုသပေးမယ်ဆိုရင် ဦးလေးတို့အနေနဲ့ဖိတ်ခေါ်ဆောင်ရွက်ပေးမှာပါ “ ဟုပြောသည်။

မင်းပြားမြို့နယ်အပြင် ပေါက်တောမြို့နယ်၊ မြောက်ဦးမြို့နယ်၊ ပုဏ္ဏားကျွန်းမြို့နယ်၊ အမ်းမြို့နယ်နှင့် မြေပုံမြို့နယ်တို့ကလည်းလာရောက်ကုသနိုင်အောင် ဆက်သွယ်အကြောင်းထားသည်ဟုလည်းသိရသည်။

မင်ပြားမြို့နယ်ရှိ ကုသလိုသည့် ဝေဒနာရှင်များအနေဖြင့် မိမိတို့နီးစပ်ရာရပ်ကွက်၊ ကျေးရွာအုပ်ချုပ်ရေးမှူးများနှင့် အထွေထွေအုပ်ချုပ်ရေးမှူးရုံးများထံ၌ ကြိုတင်စာရင်း ပေးသွင်းထားနိုင်သည်ဟုသိပြီး၊ တခြားမြို့နယ်များမှ လူနာများအတွက် နှစ်(၁၅၀) ပြည့်စေတီတော်ဂေါပကရုံးတွင် ၀၉၂၅၃၄၇၄၈၄၈၊ ၀၉၂၅၀၄၅၅၃၀၂၊ ၀၉၂၁၀၁၄၄၉၄ ဖုန်းနံပါတ်များကို ဆက်သွယ်စုံစမ်းနိုင်သည်ဟုလည်းသိရသည်။

ယခုကဲ့သို့ ဆရာဝန်ကြီးများ မင်းပြားမြို့၌အခမဲ့လာရောက်ကုသပေးနိုင်ရန် မြို့နယ်အုပ်ချုပ်ရေးမှူး၊  ဌာနဆိုင်ရာများ၊ ရပ်မိရပ်ဖများ၊ လူမှုရေးအသင်းအဖွဲ့များက စုပေါင်းစီစဉ်ခြင်း ဖြစ်ကြောင်း သိရှိရသည်။