ခရီးသည်အများအပြားသွားနေရသည့် ပေါက်တော တောင်ဖူး-မြင့်ဂါ ကူးတို့ခ စျေးအဆမတန်ကောက်နေ၍ ခရီးသည်များ အခက်တွေ့နေ

နိရဥ္စရာ၊ ဇန်နဝါရီ ၂ဝ /၂ဝ၂၃

ရခိုင်ပြည်နယ် ပေါက်တောမြို့နယ်တွင် ခရီးသည်အများအပြား ကူးသန်းသွားလာနေရသည့် တောင်းဖူးနှင့် မြင့်ဂါသို့ပြေးဆွဲနေသော ကူးတို့ခစျေးနှုန်းသည် လက်ရှိတွင် အဆမတန်ကောက်ခံနေ၍ အခက်တွေ့နေရသည်ဟု ခရီးသည်များက ပြောသည်။

တောင်ဖူး-မြင့်ဂါကူးတို့လိုင်းတွင် ကူးတို့ခအဖြစ် ယခင်နှစ်က လူတစ်ဦးလျှင် အသွား/အပြန် ကျပ် ၁ ထောင်နှင့်  ဆိုင်ကယ်တစ်စီးလျှင် အသွား/အပြန် ကျပ် ၂ ထောင်နှုန်းဖြင့်ကောက်ခံရန် မြို့နယ်စည်ပင်က သတ်မှတ်ထားသည်ဟု သိရသည်။

လက်ရှိတွင် လူတစ်ဦးလျှင် အသွား/အပြန် ကျပ် ၃ ထောင်နှင့် ဆိုင်ကယ်တစ်စီးလျှင် အသွား/အပြန် ကျပ် ၆ ထောင်မှ ၈ ထောင်အထိ တိုးမြှင့်ကောက်ခံနေ၍ အခက်တွေ့နေရခြင်းဖြစ်သည်ဟု ခရီးသည်များက နိရဥ္စရာကို ပြောသည်။

ခရီးသည်တစ်ဦးက “သူတို့ကတော့ အကြောင်းပြတယ်။ ဆီစရိတ်များလို့။ ဆီစရိတ်များလို့ဆို သူတို့ သက်ဆိုင်ရာကိုတင်ပြရမယ်လေ။ ဆီစရိတ် ဒီလိုကြီးမားတဲ့အတွက် ကျနော်တို့ ဥပမာ ၃ဝဝ တင်မယ်၊ ၂ဝဝ တင်မယ်၊ ၁ဝဝ တင်မယ် အဲလိုပဲ ရှိရမယ်လေ။ အခုကတော့ အဲလိုမရှိဘဲ တင်ချင်သလိုတင်တယ်၊ လုပ်ချင်သလို လုပ်တယ်ဆိုတာကတော့ အဲဒါက ကျနော်တို့ ပြည်သူတွေအပေါ်မှာ ဝန်ထုပ်ဝန်ပိုးဖြစ်တယ်လေ”ဟု ပြောသည်။

စက်လှေဖြင့် မိနစ် (၂ဝ)ခန့်အကြာ ခုတ်မောင်းသွားလာရသည့် အဆိုပါတောင်ဖူး-မြင့်ဂါကူးတို့လိုင်းသည် ပေါက်တောမြို့နယ်အတွင်း ဘုရားဖူးများ အသွားအလာများတတ်သည့် ကူးတို့လိုင်းတစ်ခုဖြစ်သည်။

ရခိုင်ပြည်တစ်ဝန်းမှ ဘုရားဖူးဧည့်သည်များအနေဖြင့် ယခုကဲ့သို့ ပွင့်လင်းရာသီတွင် မြင့်ဂါဘက်ခြမ်းရှိ မဟာရံတွင်ရှိသော ကျေးဇူးတော်ရှင် ဆရာတော်ကြီး အသျှင်ဉာဏစက္က၏ မပုပ်မသိုးသည့် ရုပ်ကလပ်တော်အပါအဝင် တောင်းဖူး-တောင်ညိုဘုရားနှင့် ကံတော်တစ်ထောင်ဘုရားတို့ကိုဖူးမြော်ရန် လာရောက်တတ်ကြသည်ဟု ဒေသခံများက ပြောသည်။

စနေ၊ တနင်္ဂနွေရုံးပိတ်ရက်များဆိုလျှင် ထောင်နှင့်ချီလာရောက်တတ်ကြသည်ဟုလည်း ဒေသခံများက ပြောသည်။

ဘုရားဖူးများတွင် နွမ်းပါးသူများလည်း ပါဝင်နေသည့်အတွက် ယခုကဲ့သို့ တိုးမြှင့်ကောက်ခံနေခြင်းမှာ မဖြစ်သင့်ဟုလည်း ပေါက်တောမြို့မိမြို့ဖတစ်ဦးက ပြောသည်။

“ဒီဘက်က ဘုရားဖူးခရီးသည်တွေက တကယ်ရှိလို့လာကြတာမဟုတ်ဘူး။ မရှိဘဲ လာနေကြတာ။ ဘာပဲဖြစ်ဖြစ်ပေါ့။ အပစ်အခတ်ရပ်စဲထားတဲ့ကာလမှာ အဲလို သူတို့ ထွက်ပေါက်တစ်ခုရှာပြီးတော့ လာနေကြတာကို ဒီလို လုပ်ရင် ကျနော်တို့ ပြည်သူတွေအပေါ်မှာ အရမ်း အခက်တွေ့စေပါတယ်”ဟု ပြောသည်။

အဆိုပါကူးတို့လိုင်းကို တောင်းဖူးကျေးရွာမှ ဒေါ်ကျော့ခင်သောင်းက ယခင်နှစ်က ကျပ်သိန်း ၁ဝဝ ခန့်ဖြင့် လေလံအောင်မြင်၍ လုပ်ကိုင်နေခြင်းဖြစ်သည်ဟု ဒေသခံများက ပြောသည်။

ယခုကိစ္စနှင့်ပတ်သက်ပြီး ကူးတို့လိုင်းပိုင်ရှင် ဒေါ်ကျော့ခင်သောင်းအား နိရဥ္စရာက ဆက်သွယ်ရာ လက်ရှိတွင် စက်သုံးဆီစျေးနှုန်းများနှင့် စက်လှေမောင်းသမားစရိတ်တို့ မြင့်တက်နေသည့်အတွက် ယခုကဲ့သို့ တိုးမြှင့်ကောက်ခံနေရခြင်းဖြစ်သည်ဟု ပြောသည်။

“ကျမတို့မှာက တစ်ယောက်နဲ့လည်း ပို့ရတယ်။ နှစ်ယောက်နဲ့လည်း ပို့ရတယ်။ ဆီစျေးတွေကလည်း တက်တယ်။ အငှားစရိတ်ကလည်း တစ်ရက်မှာ တစ်သောင်းပေးရပါတယ်။ ကျမတို့မှာက ကိုယ့်အတွက်လည်း မကျန်ဘူး”ဟု ပြောသည်။

ယခင်က အဆိုပါကူးတို့ကို တောင်းဖူးမှတဆင့် မြင့်ဂါရွာဟောင်းဘက်ရှိ ကျောက်တန်းဆိပ်ကမ်းအထိသာပို့ဆောင်ပေးရသော်လည်း ယခုအခါ မြင့်ဂါရွာသစ်ဘက်ရှိ မဟာရံသို့တက်သည့်ကားလမ်းအထိပို့ဆောင်ပေးနေရသည်ဟု ဆိုသည်။

သို့အတွက် ခရီးအကွာအဝေးကလည်း ယခင်ကထက် ၃ ဆကွာဝေးသွားသည့်အတွက် ယခုကဲ့သို့ စျေးပိုတောင်းရခြင်းဖြစ်သည်ဟု ပြောသည်။

ဓာတ်ပုံ - ရခိုင်ပြည်နယ်အတွင်းပြေးဆွဲနေသည့် ကူးတို့လိုင်းစက်လှေတစ်စီးအား တွေ့ရစဉ်။