မတရားထောင် ၃နှစ်ချမှတ်ခံခဲ့ရသည့် ပုဏ္ဏားကျွန်း အိုင်ဒင်ရွာသား နောက်ထပ် တစ်ဦးလည်း ထောင်ချုပ်ရက်ပြည့်၍ လွတ်မြောက်လာ

နိရဉ္စရာ၊ ဇန်နဝါရီ ၂၃/၂၀၂၃

ရက္ခိုင့်တပ်တော်(AA)နှင့်ဆက်စပ်သည်ဟုဆိုကာ မတရားသဖြင့် ထောင် ၃ နှစ်ချမှတ်ခံခဲ့ရသည့် ပုဏ္ဏားကျွန်းမြို့နယ် အိုင်ဒင်ကျေးရွာသား ၂ ဦးအနက် ထောင်ထဲတွင် ကျန်နေခဲ့သူ တစ်ဦးလည်း ယနေ့နံနက်ပိုင်းက ထောင်ချုပ်ရက်ပြည့်၍ လွတ်မြောက်လာကြောင်း မိသားစုများက ပြောသည်။

၎င်းသူမှာ ပုဏ္ဏားကျွန်းမြို့နယ် အိုင်ဒင်ကျေးရွာမှ ဦးမောင်စောအေး (၃၃နှစ်)ဖြစ်သည်။

ဦးမောင်စောအေး၏မိသားစုဝင်တစ်ဦးက "ဒီနေ့မနက်ကလွတ်တာပါ။ သူလွတ်လာပြီး ရဲစခန်းကိုခေါ်သွားလို့ အဲဒီကနေပဲသွားခေါ်လာတာပါ။ အခုတော့သူခေါင်းနဲနဲမူးနေလို့ ဆေးခန်းပြဖို့စိတ်ကူးနေပါတယ်။ ထောင်ထဲမှာနေရတုန်းက သူ့ခေါင်းမှာ ယားနာတွေပေါက်လို့ ဆေးတွေကုခဲ့ရပါတယ်။ အခုတော့ခေါင်းမူးနေလို့ လဲနေရပါတယ်" ဟုပြောသည်။

၎င်း ဦးမောင်စောအေးသည် သူ၏ တူဖြစ်သူ ကိုနေလင်းဌေး (၂၇ နှစ်)နှင့်နှင့်အတူ  ပြီးခဲ့သည့် ဇူလိုင်လ ၂၀ ရက်က အကြမ်းဖက်မှု တိုက်ဖျက်ရေး ဥပဒေပုဒ်မ ၅၂(က) ဖြင့် စစ်တွေခရိုင်တရားရုံးက ထောင်ဒဏ် ၃ နှစ်စီချမှတ်ခဲ့ကြောင်းသိရသည်။

 ၎င်းနှစ်ဦးအနက် တူဖြစ်သူ ကိုနေလင်းဌေးမှာ ပြီးခဲ့သည့် ဇန်နဝါရီလ ၁၀ ရက်က စစ်တွေအကျဉ်းထောင်မှ ထောင်ချုပ်ရက်ပြည့်၍ လွတ်မြောက်လာခဲ့ပြီဖြစ်ပြီး ဦးမောင်စောအေးမှာမူ ယနေ့မှ လွတ်မြောက်လာကြောင်း ၎င်းတို့၏မိသားဝင်များကပြောသည်။

 သူတို့ ၂ ဦးသည် ပြီးခဲ့သည့် ၂၀၂၀ ပြည့်နှစ်၊ မတ်လ ၆ ရက်တွင် စစ်တွေမှ အိုင်ဒင်ကျေးရွာသို့ ဆိုင်ကယ်ဖြင့် ပြန်လာစဉ် စစ်တွေမြို့နယ် ကျောက်တန်းစစ်ဆေးရေးဂိတ်၌ ဖမ်းဆီးခံရပြီး နောက်တစ်နေ့  မတ်လ ၇ ရက်တွင် အမှတ် (၉၀၈) အင်ဂျင်နီယာတပ်ရင်းမှ ဗိုလ်ကြီးအောင်ဖြိုးမြင့်က တရားလိုလုပ်ကာ အေအေနှင့်ဆက်စပ်မှုရှိသည်ဟု စွပ်စွဲပြီး အကြမ်းဖက်မှုပုဒ်မ ၅၀ (ည)၊ ၅၂(က)တို့ဖြင့် အမှုဖွင့်တရားစွဲဆိုခဲ့သည်ဟုသိရသည်။ 

(NN-8)