နိရဥ္စရာ၊ဇန်နဝါရီ ၂၃/၂၀၂၃

နှစ်ဘက် လက်နက်ကိုင်အဖွဲ့များအပစ်ရပ်ပြီးနောက် လက်ရှိနယ်မြေအခြေအနေများတည်ငြိမ်လာပြီဖြစ်သဖြင့် ၇ခိုင်တွင်နာမည်ကြီးဘုရားပွဲတော်များကို စတင်ကျင်းပရန်စီစဉ်လာနေကြရာ ပုဏ္ဏားကျွန်းမြို့ရှိ သမိုင်းဝင်ဂူ၀ဘုရားနှင့် စမြုံတော်ဓာတ် စေတီထီးတော်တင်လှူပွဲကိုလည်း များမကြာမီ ကျင်းပသွားမည်ဖြစ်ကြောင်း သတင်းရရှိသည်။

ဂေါပကအဖွဲ့ဝင်တစ်ဦးက “အရင်နှစ်တွေကတော့ကိုဗစ်တို့၊ တိုက်ပွဲတို့ဖြစ်နေချိန်က ကြီးကြီးကျယ်ကျယ်မကျင်းပနိုင်ခဲ့ဘူး။ဒီနှစ်မှာတော့ ဒေသတွင်းအခြေအနေတွေကလည်း အေးချမ်းနေတော့ ပုံမှန်အတိုင်း စည်စည်ကားကားကျင်းပဖို့စီစဉ်ထားကြပါတယ်”ဟုပြောသည်။

အဆိုပါဘုရားပွဲကိုလာမည့် ဖေဖော်ဝါရီ ၄ ရက်နှင့် ၅ ရက်တို့တွင် ၂ ရက်ကြာ ကျင်းပသွားမည်ဖြစ်ပြီး

စမြုံတော်ဓာတ်စေတီတော် ထီးတော်အသစ်တင်လှူပွဲ၊ဘုရားအနေကဇာတင်ပွဲ၊ ဆွမ်းစိမ်းလောင်းပွဲ၊ လွန်ဆွဲပွဲ၊ ချောတိုင်တက်ပွဲ၊ဘောလုံးပွဲနှင့် ၇ခိုင်အဆိုတော်အချို့ဖြင့် စင်တင်တေးဂီတအစီအစဉ်များကို ထည့်သွင်း ကျင်းပသွားမည်ဟု၎င်းက ဆက်ပြောသည်။

ဂူ၀ဘုရားသည်ပုဏ္ဏားကျွန်းမြို့မြောက်ဘက်ရွာဟောင်းရပ်ကွက်၊ ရန်ကုန်-စစ်တွေကားလမ်းမဘေးရှိ စမြုံတော်ဓာတ်စေတီတော်အနီးတွင်တည်ရှိသည်။

မြောက်ဦးခေတ်တွင်ရခိုင်ဘုရင် မင်းဗာကြီးက ကောဇာသက္ကရာဇ် ၂၈၇ ခုနှစ်၌ တည်ထားကိုးကွယ်ခဲ့ခြင်း ဖြစ်သည်ဟုရခိုင်သမိုင်းမှတ်တမ်းများအရ သိ၇သည်။

ဂူ၀ဘုရားသည် ကျောက်တစ်လုံးတည်းတွင်ဂူပေါက် ၁၁ ပေါက်အထိထွင်းထုထားပြီး ဂူပေါက် ၁ ပေါက်စီတွင်လည်းထိုင်တော်မူဗုဒ္ဓဆင်းတုတော်များကို ထွင်းထုထားသည်။

စမြုံတော်ဓာတ်စေတီသည် ဂူ၀ဘုရားအနီးတွင်တည်ရှိပြီးကောဇာသက္ကရာဇ် ၂၂၂ ခုနှစ်တွင် ရခိုင်ဘုရင် သူရိယစက္ကမင်းက တည်ထားကိုးကွယ်ခဲ့သည့်ရှေးဟောင်းသမိုင်းဝင် စေတီတော်တစ်ဆူဖြစ်သည်။