နိရဥ္စရာ၊ဇန်နဝါရီ ၂၅/၂၀၂၃

၇ခိုင်ပြည်နယ်၊ပုဏ္ဏားကျွန်းမြို့တွင် ပြီးခဲ့သည့် ၂၀၂၁ ခုနှစ်က မီတာဆောင်ထားသည့် ပြေစာများကို ပြခိုင်းပြီး မပြနိုင်သောအိမ်များကို မီးဖြတ်ကာ မီတာခအတင်းပြန်သွင်းခိုင်နေသည်ဟုကာယကံရှင်များကပြောသည်။ 

ယမန်နေ့ ဇန်နဝါရီ၂၄ ရက်၊ နံနက်ပိုင်းက ပုဏ္ဏားကျွန်းမြို့ တွင် ၂၀၂၁ ခုနှစ်က မီတာများ မဆောင်ထားဟုဆိုကာသက်သေပြေစာမပြနိုင်သည့်အိမ်များကို မီဖြတ်ခြင်း၊ ငွေပြန်သွင်းခိုင်းများပြုလုပ်ခဲ့သည်ဟု ကိုယ်တိုင်ငွေပြန်သွင်းခဲ့ရသည့် ကာယကံရှင် ကိုအေးလွင်က ပြောသည်။ 

"တချို့လူတွေမှာ ၂၀၂၁ကပြေစာတွေ မရှိတော့ဘူးလေ။ မသိမ်းထားကြတော့ဘူး။ ပြေစာမရှိရင် အထောက်အထားမပြနိုင်ကြဘူးပေါ့။ အိမ်တိုင်းအိမ်တိုင်းတော်တော်များများက ပါသွားကြတယ်။တချို့လူတွေက အခုလိုတစ်လုံးတစ်ခဲနဲ့ပေး၇တော့ တက်နိုင်လူရှိတယ်။မတက်နိုင်လူရှိတယ်လေ။ တခါတည်း မီးဖြတ်ခဲ့တာမျိုးတွေ ရှိတယ်။ ကြိုတင်အသိပေးပြီးမှ ဖြတ်သင့်တယ်"ဟုပြောသည်။ 

EPC ဝန်ထမ်း(ရ) ဦးခန့်သည် ကြိုတင်အကြောင်းကြားခြင်းတစ်စုံတစ်ရာမရှိသလို အကြောင်းအရင်းကို အရင်မပြောဘဲ မီတာဖြတ်တောက်ခဲ့ကြောင်းရွာဟောင်းရပ်ကွက်မှ မစိုးစိုးလွင်က နိရဥ္စရာကို ပြောသည်။

"လာတာနဲ့အိမ်ထဲမဝင်ခင် မီးတိုင်ကသွားဖြတ်ပြီးမှ ကျမကို လာပြောပါတယ်။ မီးဘာကြောင့်ဖြတ်လဲပြောတော့ မီတာသွင်းလို့မရှိလို့ဖြတ်တယ်ပြောပါတယ်။ကျနော်တို့နဲ့မဆိုင်ဘူး မီတာရုံးသွားရှင်းလို့ပြောပါတယ်။ ရုံးကဖြတ်ပိုင်းမပြရင် လျော်၇မယ်ပြောပါတယ်။ လျော်ပြီးမှ ပြန်လာဆက်ပေးတယ်။" 

၂၀၂၁ ခုနှစ်က မီတာကိစ္စအား ၂၀၂၂ တစ်နှစ်လုံး တစ်စုံတစ်ရာ မစစ်ဆေးဘဲယခု ၂၀၂၃ခုနှစ်ကိုရောက်မှ လာရောက် ဖြတ်တောက်မှုမှာ လက်ခံ၍ မခံ၇သလို EPC ဘက်မှ စာရင်းများအားပြန်စစ်ဆေးရန် တောင်းဆိုရာတွင်လည်းစာရင်းမရှိတော့ဘူးဟုဆိုကာ ငြင်းဆိုခဲ့သည်ဟု ကာယကံရှင်များက ပြောသည်။ 

"ရက်ပိုရင်တောင် ရက်ပိုကြေးပေး၇တာ(၆) လတိတိ မသွင်းဘဲဆိုတာက လုံး၀မဖြစ်နိုင်ပါဘူး။ ကျမတို့ တစ်အိမ်တည်းမဟုတ်ဘူး။ တခြားအိမ်တွေလည်းဒီလိုပဲ။ သူတို့ဘက်က စာရင်းကိုလည်း ချမပြဘူး။ ကြည့်မယ်ဆိုတော့ မရှိတော့ဘူးလို့ပြောပါတယ်။ ၂၀၂၁ အတွက်ကိုလုပ်တယ်ဆိုရင် ၂၀၂၂ ကိုလည်း အခုလိုမျိုး အကြောင်းပြပြီး ငွေတောင်းလာအုံးမှာဘဲ။၂၀၂၁ နှစ်ကဟာကို ၂၀၂၃ မှလာစစ်နေတော့ ဘယ်လိုရှိတော့မလဲ။ တစ်လမှာ အိမ်ခြေ (၂၀)လုပ်မယ်။ တစ်မြို့လုံးပါတယ်လို့ပြောပါတယ်"ဟု မစိုးစိုးလွင်က ဆက်ပြောသည်။

ယခုကဲ့သို့မီတာဖြတ်တောက်မှုများကြောင့် လျှပ်စစ်မီးပြန်လည်ရရှိရေးအတွက် တောင်းခံသည့် ငွေကြေးပမာဏကို မတတ်နိုင်သော်လည်းပေးဆောင်ခဲ့ရကြောင်းကာယကံရှင်များက ပြောသည်။

စစ်ရေး၊နိုင်ငံရေးမတည်ငြိမ်မှုနှင့်အတူ စီးပွားရေးအကျပ်အတည်းရောက်နေချိန်ဖြစ်သည့်အတွက် ပြည်သူများ နစ်နာမှုမရှိ၇အောင်လျှပ်စစ်ဝန်ကြီးဌာနအနေနှင့်ယခုကိစ္စများကို မှန်မှန်ကန်ကန် စိစစ်ပေးရန် လိုလားကြောင်း မြို့ခံများက ပြောသည်။

ယခုကိစ္စနှင့် ပတ်သက်၍ပုဏ္ဏားကျွန်းမြို့နယ် လျှပ်စစ်ဝန်ကြီးဌာန မြို့နယ်ဦးစီးမှူး ဦးမိုးကျော်သူအားနိရဥ္စရာ သတင်းဌာကဖုန်းနှင့်အကြိမ်ကြိမ်ဆက်သွယ်မေးမြန်းခဲ့သော်လည်း ဖုန်းလက်ခံဖြေဆိုခြင်း မရှိခဲ့ပါ။ 

ပြီးခဲ့သည့်၂၀၂၂ ခုနှစ်၊ သြဂုတ်လက ၇ခိုင်ပြည်နယ်၊ တောင်ကုတ်မြို့တွင်လည်း မီတာဆောင်ထားသည့် ပြေစာမပြနိုင်သောအိမ်များကိုမီတာဖြတ်တောက်ခြင်း၊ ပြန်လည်သွင်းဆောင်ခိုင်းမှုများ ပြုလုပ်ခဲ့သေးသည်။(NN-7)