မြောက်ဦးမြို့က ကိုရင်ဆို့ကို ပုဒ်မ ၅၀၅ (က)ဖြင့် စွဲချက်တင်ပြီး ဖေဖော်ဝါရီ ၇ ရက်ကို ထပ်မံရုံးချိန်း

နိရဥ္စရာ၊ ဇွန်နဝါရီ ၃၀/ ၂၀၂၃

ရခိုင်ပြည်နယ်၊ မြောက်ဦးမြို့မှ ဖမ်းဆီးခံထားရသည့် ကိုရင်ဆို့(ခေါ်)ကိုကျော်ဇံဝေ(ခေါ်) ကိုဖိုးလပြည့်ကို စစ်ကောင်စီက နိုင်ငံတော်ဆူပူလှုံ့ဆော်မှုဆိုင်ရာဥပဒေပုဒ်မ ၅ဝ၅(က)ဖြင့် စွဲချက်တင်ပြီး ဖေဖော်ဝါရီ ၇ ရက်ကို ထပ်မံရုံးချိန်း ခေါ်လိုက်သည်ဟု သတင်းရရှိသည်။

ပြီးခဲ့သည့် ဇွန်နဝါရီလ ၂၄ရက်နေ့က မြောက်ဦးခရိုင်တရားရုံးတွင် ၎င်းအား ပုဒ်မ ၅၀၅ (က) ဖြင့် စွဲချက် တင်လိုက်သည်ဟု သူနှင့် နီးစပ်သူတစ်ဦးက နိရဥ္စရာကို ပြောသည်။

“ ကိုကျော်ဇံဝေကို တရားရုံးက ၅၀၅(က)နဲ့ စွဲချက်တင်လိုက်ပါပြီ။ သူကတော့ အပြစ်မရှိကြောင်း ထွက်ဆိုပါတယ်။ စွဲချက်တင်လိုက်တယ်ဆိုတော့ ပြစ်မှုမြောက်တဲ့ သဘောမျိုးလား။ အပြစ်မရှိရင်တော့ စွဲချက်မတင်ဘဲ တစ်ခါတည်း လွှတ်ပေးလို့ရတယ်လေ။အခုက ၅၀၅(က)နဲ့ စွဲချက်တင်တယ်ဆိုတော့ ဘယ်လိုလဲ မပြောတတ်တော့ပါဘူး “ ဟုပြောသည်။

ကိုရင်ဆို့(ခေါ်)ကိုကျော်ဇံဝေ(ခေါ်) ကိုဖိုးလပြည့်၏ ရုံးချိန်းသည့် နေ့များတွင် မိသားစုဝင်များနှင့် တွေ့ခွင့်ရရှိခဲ့သည်ဟု သိရသည်။

၎င်းကို ပြီးခဲ့သည် စက်တင်ဘာလ ၁၉ရက်နေ့က စတင်ရုံးထုတ်ခဲ့ပြီး၊ ၄လကျော် အကြာ စစ်ဆေးမှုများ ပြုလုပ်ပြီးတွင် ယခုလို စွဲချက်တင်လိုက်ခြင်းဖြစ်သည်။

လူမှုကွန်ရက်စာမျက်နှာတွင် ဟာသဗီဒီယိုများနှင့် စစ်ရေး၊ နိုင်ငံရေး အခြေအနေများကို ဟာသဆံဆံ မျှဝေရင်း လူသိများလာနေသည့် ကိုရင်ဆို့ကို စက်တင်ဘာလ ၄ ရက် နံနက် ၈ နာရီခန့်တွင် မြောက်ဦးမြို့၊ တောင်ရပ်ရပ်ကွက်ရှိ သူ၏နေအိမ်မ စစ်သားနှင့် ရဲအင်အား ၂၀ ခန့်က ဝင်ရောက် ဖမ်းဆီး ခေါ်ဆောင်သွားခဲ့သည်။

လက်ရှိတွင် သူ့ကိုမြောက်ဦးမြို့မရဲစခန်းတွင် ဖမ်းဆီးချုပ်နှောင်ထားသည်ဟု သိရသည်။

သူ့ကို နိုင်ငံတော်အေးချမ်းသာယာရေးကို ပျက်ပြားစေရန် ရည်ရွယ်လျက် လှုံ့ဆော်ခြင်း၊ ဝါဒဖြန့်ခြင်းများ ပြုမှုလုပ်ဆောင်ခဲ့သည့်အတွက် ဖမ်းဆီးရခြင်းဖြစ်သည်ဟု စစ်ကောင်စီက စက်တင်ဘာ ၆ ရက်ထုတ် မြန်မာ့အလင်းသတင်းစာတွင် ထုတ်ပြန်ခဲ့သည်။  (NN-13)