စစ်တွေ ခိုင်သဇင်ပန်းခြံအနီးတွင် သက်လတ်ပိုင်းအမျိုးသားတစ်ဦးကို စစ်ကောင်စီတပ်သားများမှ ဖမ်းဆီးခေါ်ဆောင်သွား

နိရဉ္စရာ၊ ဖေဖော်ဝါရီ ၁/၂၀၂၃

ရခိုင်ပြည်နယ်၊ စစ်တွေမြို့ ပြည်တော်ရပ်ကွက်ရှိ ခိုင်သဇင်ပန်းခြံအနီးတွင် ယနေ့ညနေ လေးနာရီခွဲခန့်က လမ်းသွားလမ်းလာ သက်လတ်ပိုင်းအမျိုးသားတစ်ဦးကို စစ်ကောင်စီတပ်သားများမှ ဖမ်းဆီးခေါ်ဆောင်သွားကြောင်း သိရသည်။

ဖမ်းဆီးခံရသူမှာ အသက် ၃၀ ဝန်းကျင် သက်လတ်ပိုင်းအမျိုးသားတစ်ဖြစ်ပြီး ခိုင်သဇင်ပန်းခြံအနီးရှိ တံတားအောက်နားတွင် ရှိနေစဉ် စစ်ကောင်စီတပ်သားများမှ စစ်ကားပေါ်သို့တင်ကာ ဖမ်းဆီး ခေါ်ဆောင်သွားခြင်းဖြစ်ကြောင်း မျက်မြင်ဒေသခံများကပြောသည်။

"အဲဒီအောက်ကလူတစ်ယောက်ကို ဖမ်းသွားတယ်။ လူတွေအုံပြီးကြည့်နေကြတာကို မြင်လိုက်တယ်။ ဘောင်းဘီနဲ့တီရှပ်ဝတ်ထားတာသူက။ အတိအကျတော့ မသိလိုက်ရဘူး။ မြင်တာကတော့ အဲဒီနားက သူတစ်ယောက်ကိုဖမ်းသွားပြီး စစ်ကားထက်ကိုတင်သွားတယ်။ စစ်ကားတွေရော၊ ရဲကားတွေပါပါတယ်" ဟုပြောသည်။

နောက်ထပ်ဒေသခံတစ်ဦးက " တံတားအောက်နားမှာ ရှိနေတာကို ဆင်းဖမ်းသွားတာ။ တခြားတော့အထွေအထူးမရှိဘူး။ သူကတော့လူလတ်ပိုင်း။ ချောင်းမှာငါးရှာ၊ မြုံးထောင်လာတဲ့သူထင်တယ်။ မျက်နှာတွေမှာလည်း ရွှံ့တွေပေနေတယ်" ဟုပြောသည်။

အဆိုပါ ဖမ်းဆီးခံရသည့် သက်လတ်ပိုင်းအမျိုးသားသည် မည်သူမည်ဝါဖြစ်ကြောင်းကို နိရဉ္စရာအနေဖြင့်သီးခြားအတည်ပြုနိုင်ခြင်းမရှိသေးပါ။