ယခင်နယ်လုံဝန်ကြီး အငြိမ်းစားဗိုလ်မှူးကြီးထိန်လင်းကို ရခိုင်ပြည်နယ်ဝန်ကြီးချုပ် အဖြစ်ခန့်အပ်ခြင်းသည် စစ်အုပ်ချုပ်ရေးကို အပီအပြင် အကောင်အထည် ဖော်ဆောင်လို၍ဖြစ်ဟုဆို

နိရဥ္စရာ၊ ဖေဖော်ဝါရီ ၂/၂၀၂၃

ရခိုင်ပြည်နယ် ဝန်ကြီးချုပ်တာဝန်ကို ရခိုင်အရပ်သားများကို နှစ်အတန်ငယ်ကြာ ခန့်အပ်နေရာမှ စစ်ကောင်စီက လက်ရှိ စစ်တပ်အမာခံ အငြိမ်းစားဗိုလ်မှူးကြီးတစ်ဦးကို အစားထိုးခန့်အပ်ခြင်းသည် စစ်အုပ်ချုပ်ရေးဖြင့် ရခိုင်ကို ပီပီပြင်ပြင် အုပ်ချုပ်လို၍ ဖြစ်ကြောင်း ရခိုင်နိုင်ငံရေး အသိုင်းအ၀ိုင်းမှ သုံးသပ်ပြောဆိုသည်။

အရပ်သားဝန်ကြီးချုပ်နေရာတွင် ယခင်နယ်လုံဝန်ကြီး အငြိမ်းစားဗိုလ်မှူးကြီးထိန်လင်းကို ရခိုင်ပြည်နယ် ဝန်ကြီးချုပ်အဖြစ် ခန့်အပ်လိုက်သဖြင့် ရခိုင်ပြည်တွင်  လှုပ်ရှားနေသည့် အဖွဲ့အစည်းအားလုံးနှင့်  တော်လှန်ရေး အင်အားစုများဖြင့် အထူးသတိထားပြီး လုပ်ကိုင် လှုပ်ရှားရမည်ဟု မြင်မိကြောင်း ရခိုင်ဒီမိုကရေစီအဖွဲ့ချုပ် ( ALD) အတွင်းရေးမှူး ဦးမျိုးကျော်က ပြောကြားသည်။

"ရခိုင်ပြည်ကို စစ်ရေးအရ ပိုပြီး မဟာဗျူဟာမြောက် ဖိနှိပ်မှုတွေပြုလုပ်ဖို့ အကွက်ဆင်လာတယ်လို့ မြင်တယ်။ အရပ်သားမဟုတ်ဘဲ အရင်နယ်လုံဟောင်းကို ဝန်ကြီးချုပ်နေရာကို ပေးတယ်ဆိုကတည်းက သူတို့မှာ တကယ့်အခိုင်အမာလူကို ရခိုင်ပြည်မှာချတာလေ။ သူတို့အုပ်ချုပ်ရေးက  စစ်ရေးအမြင်နဲ့ သွားမှာ။ ဆိုတော့ စစ်ရေးအပိုင်းမှာ  ပိုပြီးအရေးကြီးလာမယ်လို့ မြင်တယ်။ အထူးသဖြင့် ရခိုင်ပြည်သူတွေရဲ့ လုံခြုံရေးပိုင်းဆိုင်ရာကိစ္စ၊ ရခိုင်ပြည်မှာ လှုပ်ရှားနေတဲ့အဖွဲ့အစည်းအားလုံး တော်လှန်ရေးအင်အားစုတွေအနေနဲ့ အင်မတန်သတိထားပြီး လုပ်ကိုင်လှုပ်ရှားရမယ်လို့မြင်တယ်" ဟု ပြောဆိုသည်။

ရခိုင်ဝါရင့်နိုင်ငံရေးသမားလည်းဖြစ်  မြေပုံမြို့နယ်ပြည်သူ့လွှတ်တော်ကိုယ်စားလှယ်ဟောင်း ဦးဖေသန်းကလည်း နယ်လုံဝန်ကြီးဟောင်း တစ်ဦးကို ရခိုင်ကို အုပ်ချုပ်ရန် တာဝန်ပေးခြင်းသည် စစ်အုပ်ချုပ်ရေးဖြင့် တင်းတင်းကျပ်ကျပ် အုပ်ချုပ်ရန် ရည်ရွယ်ပုံရသည်ဟု ပြောဆိုသည်။

"တကယ်လို့ တိုက်ပွဲတွေ ပြန်ဖြစ်လာရင်  ဒီထက်တင်းတင်းမာမာဆက်ဆံလာမယ့်သဘော။ ရခိုင်ပြည် အုပ်ချုပ်ရေးအပိုင်းမှာ ပိုပြီးတင်းကျပ်လာမယ့် သဘောလို့ သုံးသပ်ပြောဆိုလိုရတယ်။ ပြည်နယ်  ဖွံ့ဖြိုးရေးလုပ်ငန်းတွေမှာ  အရင်ထက် လူထုကို အကျပ်ကိုင်ပြီး  ပြည်သူတွေကို ဒုက္ခပေးလာအုံးမယ်။ ဒါကြောင့်လည်း ရခိုင်ဝန်ကြီးချုပ်နေရာမှာ ရခိုင်လူမျိုးအရပ်သားတွေကို ဖယ်ထုတ်ပြီး ဒီဗိုလ်မှူးကြီးဟောင်း တစ်ယောက်ကို အစားထိုးတာလည်း ဖြစ်နိုင်ပါတယ်" ဟု ပြောသည်။

၎င်းပြင် ယခုအသစ်ဝန်ကြီးဖြစ်လာသူ ဦးထိန်လင်းသည် ရခိုင်ပြည်နယ်တွင် နှစ်အတန်ကြာ စစ်ဘက်တွင် တာဝန်ထမ်းဆောင်ခဲ့သလို နယ်လုံဝန်ကြီးအဖြစ်လည်း (၇) နှစ်ထိ တာဝန်ယူခဲ့သူဖြစ်သဖြင့် ရခိုင်အကြောင်းကို သိသူဖြစ်၍ စစ်အုပ်ချုပ်ရေးကို ယခင်ဝန်ကြီးများထက် ပီပီပြင်ပြင် လုပ်နိုင်မည့်သူ ဖြစ်၍ ခန့်အပ်ခြင်းဖြစ်ကြောင်း ဦးဖေသန်းက ဆက်လက် သုံးသပ်ပြောဆိုသည်။

" ဦးထိန်လင်းက ဝန်ကြီးချုပ်အနေနဲ့က ရခိုင်ပြည်နယ်မှာလည်း တစ်ဖက်က ဗိုလ်မှူးကြီးထိန်လင်းက နယ်လုံဝန်ကြီးလည်းလုပ်ခဲ့တယ်။ ရခိုင်ပြည်ရဲ့အခြေအနေကိုလည်း သိတယ်ဆိုတဲ့ သဘောမျိုး။  နောက်ပြီးတော့ စစ်တပ်က ခေါင်းဆောင်တစ်ယောက်ကို ခုလို အရေးကြီးတဲ့ ရခိုင်ဝန်ကြီးချုပ်နေရာမှာ ထည့်ခြင်းအားဖြင့် ပိုပြီး စစ်အုပ်ချုပ်ရေးကိုလည်း ပီပီပြင်ပြင်လုပ်လာနိုင်မယ့်သဘောထားမျိုးလို့ မြင်တွေ့ရပါတယ်" ဟု ပြောသည်။

စစ်ကောင်စီက ရခိုင်ပြည်နယ် လုံခြုံရေးနှင့် နယ်စပ်ရေးရာဝန်ကြီးဟောင်း ဦးထိန်လင်းအား ဖွဲ့စည်းပုံအခြေခံဥပဒေပုဒ်မ ၄၁၉ အရ  ရခိုင်ပြည်နယ်ဝန်ကြီးချုပ်အနေနှင့် ခန့်အပ်ကြောင်း ယမန်နေ့ ဖေဖော်ဝါရီ(၁) ရက်နေ့တွင် နိုင်ငံတော်စီမံအုပ်ချုပ်ရေး ကောင်စီအတွင်းရေးမှူး ဒုတိယဗိုလ်ချုပ်ကြီးအောင်လင်းဒွေးလက်မှတ်ဖြင့် ထုတ်ပြန်သည်။ 

အငြိမ်းစား ဗိုလ်မှူးကြီး ထိန်လင်းသည် ရခိုင်ပြည်နယ်တွင် လုံခြုံရေးနှင့် နယ်စပ်ရေးရာ ဝန်ကြီးအဖြစ်၂၀၁၁ ခုနှစ်မှ ၂၀၁၇ ခုနှစ် အထိ တာဝန်ယူခဲ့ဖူးသူ ဖြစ်ပြီး စစ်ရေးအချက်အချာကျသည့်  ဘူးသီးတောင်နှင့် မောင်တောဘက်တွင်လည်း  တပ်မတော် အရာရှိတဦးအဖြစ် ကာလရှည် တာဝန်ထမ်းဆောင်ဖူးသူ ဖြစ်သည်ဟု သိရသည်။

ဦးထိန်လင်းအား မြန်မာစစ်တပ်က အနားယူပြီးနောက် ၂၀၂၀ မတ် ၃၁ ရက်က ယခင် နိုင်ငံတော်သမ္မတ ဦးဝင်းမြင့်၏ အမိန့်ဖြင့် အမျိုးသား ပြန်လည် သင့်မြတ်ရေးနှင့် ငြိမ်းချမ်းရေး ဗဟိုဌာန (NRPC) ၏ ငြိမ်းချမ်းရေးလုပ်ငန်း စဉ်များကို အကြံပြုတင်ပြနိုင်ရန် နိုင်ငံတော် သမ္မတရုံး၏ အကြံပေး ပုဂ္ဂိုလ်အဖြစ် ခန့်အပ်ခဲ့သေးသည်။

၎င်းသည် ၂၀၂၀ ခုနှစ် မေ ၂၀ ရက်တွင်နိုင်ငံတော်သမ္မတရုံး၏ အကြံပေး လုပ်ငန်း တာဝန်များကို စတင် ထမ်းဆောင်ခဲ့သည်ဟုလည်း သိရှိရသည်။

ပုံစာ- ၂၀၁၆ ခုနှစ် မေလ ၁၁ ရက်နေ့က နယ်လုံဝန်ကြီး ဗိုလ်မှူးကြီထိန်လင်းကို ရခိုင်ပြည်နယ် လွှတ်တော်တွင် တွေ့ရစဉ်/နိရဉ္စရာ