- Web Master
- ၂၁ စက်တင်ဘာ ၂၀၂၄
နိရဉ္စရာ၊ ဖေဖော်ဝါရီ ၉/၂၀၂၃
ရက္ခိုင့်တပ်တော် (AA) ကို သတင်းပေးပို့သည်ဟုဆိုကာ
မတရားအသင်းဆက်သွယ်မှုဥပဒေပုဒ်မ ၁၇(၁) ဖြင့် တရားစွဲဆိုခံထားရသည့်
ကျောက်ဖြူမြို့နယ် မင်းတက်တောင်ကျေးရွာက ဒေသခံပြည်သူ ၂ ဦးကို ကျောက်ဖြူမြို့နယ် တရားရုံးတွင်
ရုံးထုတ်ခဲ့သော်လည်း စစ်ကောင်စီတရားလို မရောက်၍ အမှုကို မစစ်ဆေးရဘဲ
နောက်ထပ် ရုံးချိန်း ထပ်ရွှေ့လိုက်သည်ဟု သတင်းရရှိသည်။
ဖေဖော်ဝါရီ ၇ ရက် နေ့လယ် ၂ နာရီအချိန်ခန့်က ဦးသိန်းတန်(၄၇)နှစ်နှင့် ဦးတင်အောင်(၅၀)နှစ်တို့ ၂ ဦးကို ၉ ကြိမ်မြောက်ရုံးထုတ်ခဲ့သော်လည်း တရားလိုရောက်မလာ၍ ရုံးချိန်းရက်ကို ထပ်မံ ရွှေ့ဆိုင်းခံလိုက်ရသည်ဟု မိသားစုဝင်များက ပြောဆိုလိုက်သည်။
“မနေ့ကလည်း ဘာမှ
မစစ်ဘူး။ ဝင်ပြီးတာနဲ့ ထွက်လာပြီ။ တရားလိုမရောက်တာ ၉ ကြိမ်ရှိပါပြီ။ တရားလိုဘာလို့
မရောက်တာလဲ သိချင်ပါတယ်။ တရားလို လာချင်တဲ့အချိန်မှ လာပြီး၊ စစ်ချင်တဲ့ အချိန်မှ
စစ်မယ်ဆိုရင် တရားမရှိတော့ဘူးလားလို့ မေးချင်ပါတယ်။ နိုင်ငံမှာ ဥပဒေမရှိတော့ဘူးလား”ဟု ဆိုသည်။
သူတို့ ၂ ဦးကို
လာမည့် ဖေဖော်ဝါရီ ၂၁ ရက်ကို ထပ်မံရုံးချိန်းလိုက်သည်ဟု သိရသည်။
ထို့အပြင် ဖမ်းဆီးခံ
မိသားစုဝင်များမှာလည်း ရုံးချိန်းများကို တစ်ပတ်လျှင် တစ်ကြိမ်ဆိုသကဲ့သို့ မင်းတက်တောင်ကျေးရွာမှ
ကျောက်ဖြူမြို့ပေါ်သို့လာနေကြရသည့်အတွက် ခရီးစရိတ်များကုန်ကျနေကာ
သွားလာရေးအခက်အခဲများနှင့်ကြုံတွေ့နေရသည်ဟု ဆိုကြသည်။
“မနေ့ကဆိုရင်လည်း ကျောက်ဖြူမှာ
လိုင်စင်စစ်တယ်လေ။ ဒါကြောင့် သုံးဘီးတို့၊ ဆိုင်ကယ်တို့ တစ်စီးမှ မရှိဘူး။
ရုံးချိန်းပြီးလို့ အိမ်ပြန်ဖို့ သုံးဘီးရှာတာ မတွေ့ဘူး။ ၉ မိုင်ဝေးတဲ့ခရီးကို
၅ မိုင်လောက် ခြေလျင်လျောက်ပြီးပြန်လာခဲ့ရတယ်။ လမ်းထက်ဝက်ရောက်မှ
သုံးဘီးတစ်စီးတွေ့လို့ ငှားလာခဲ့ရတယ်။ ပုံမှန် ထက် ခရီးစရိတ်ကို
ထက်ဝက်အပိုပေးပြီးလာခဲ့ရပါတယ်”ဟုပြောသည်။
ဦးတင်အောင်ကို ပြီးခဲ့သည့်
၂၀၂၂ ခုနှစ် နိုဝင်ဘာ ၆ ရက် ညနေ ၃ နာရီခန့်က သူစာဖိုးမှူးလုပ်ကိုင်နေသည့်
နတလကျောင်းမှ ဖမ်းဆီးခဲ့ခြင်းဖြစ်ပြီး ဦးသိန်းတန်ကိုမူ ယင်းနေ့ ည ၉
နာရီအချိန်ခန့်က ကျောက်ဖြူအခြေစိုက် စစ်ကောင်စီ တပ်ရင်းမှ စစ်ကောင်စီတပ်သား
အင်အား ၁၀ ကျော်ခန့်က သူ့နေအိမ်အတွင်းမှ ဖမ်းဆီးသွားခဲ့ခြင်းဖြစ်သည်ဟု
ဖြစ်သည်။
ထို့နောက် သူတို့နှစ်ဦးကို
ပြီးခဲ့သည့်နှစ် နိုဝင်ဘာ ၁၃ ရက်က ကျောက်ဖြူမြို့နယ်တရားရုံးတွင် ပုဒ်မ
၁၇(၁) ဖြင့် ချုပ်ရက်ရမန်ယူခဲ့ပြီး ယင်းနောက်ပိုင်းရုံးချိန်များကို တရားလိုများက လုံးဝရောက်လာခဲ့ခြင်း မရှိဘဲ ရုံးချိန်းရက်များကို အကြိမ်ကြိမ်ရွေ့ဆိုင်းနေသည်မှာ
ယမန်နေ့က ရုံးချိန်းနှင့်ဆိုလျှင် ၉ ကြိမ်အထိ ရှိလာနေပြီဖြစ်သည်။
သူတို့နှစ်ဦးကို
လက်ရှိတွင် ကျောက်ဖြူအကျည်းထောင်၌
ဖမ်းဆီးထိန်းသိမ်းထားပြီး ဦးသိန်းတန်မှာ ဖမ်းဆီးခံရသည့်အချိန်က
ရိုက်နှက်စစ်ဆေးခံရသည့် ဒဏ်ကြောင့် နားထိုင်းနေသည်ဟု သိရကာ အကျည်းထောင်တွင်
ကျန်းမာရေးစောင့်ရှောက်မှုများလည်း မရဖြစ်နေသည်ဟုဆိုသည် သူ့၏
မိသားစုဝင်တစ်ဦးကပြောသည်။
ကျောက်ဖြူတွင်
စစ်ကောင်စီတပ်နှင့် ရက္ခိုင့်တပ်တော်(AA) တို့ တကျော့ပြန်တိုက်ပွဲပြင်းထန်ခဲ့သည့် ကာလအတွင်း စစ်ကောင်စီတပ်က ဒေသခံ ၃၀
ဦးထက်မနည်းကို ဖမ်းဆီးထားပြီး ဖမ်းဆီးခံရသည့်အထဲတွင် အစိုးရဝန်ထမ်းများလည်း
ပါဝင်နေသည်။(NN-3)