နိရဥ္စရာ၊ ဖေဖော်ဝါရီ
၁ဝ /၂ဝ၂၃
ပြီးခဲ့သည့်ရက်ပိုင်းက
စစ်ကောင်စီ ပြည်ထောင်စုအဆင့် ဝန်ကြီးများသည် စစ်တွေမြို့နယ် အတွင်းရှိ
မူဆလင်ဒုက္ခသည် စခန်းများသို့ လာရောက်ကြည့်ရှုခဲ့သော်လည်း စခန်းတာဝန်ရှိသူများအနေဖြင့် တစ်စုံတစ်ရာ တင်ပြဆွေးနွေးခွင့်မရခဲ့ဟု သိရှိရသည်။
၎င်းတို့သည် စခန်းတွင်းသို့
နာရီဝက်ခန့်အကြာ လှည့်လည်ကြည့်ရှုခဲ့ကြပြီးနောက် စခန်း တာဝန်ရှိသူများနှင့်
တစ်စုံတစ်ရာတွေ့ဆုံဆွေးနွေးခြင်းမရှိခဲ့ဘဲ ပြန်လည်ထွက်ခွာသွားခဲ့သည်ဟု
စခန်းတာဝန်ခံ ဦးညီပုက နိရဥ္စရာကို ပြောသည်။
“သူတို့ တစ်ခုမှ
မပြောခဲ့ဘူး။ ကျနော်တို့ကြိုတင်ပြင်ဆင်ထားတဲ့တင်ပြချက်တွေကိုလည်း တင်ပြခွင့်မရလိုက်လို့
စိတ်ညစ်နေပါတယ်။ တင်ပြဖြစ်မယ်ဆိုရင်တော့ နိုင်ငံသားဖြစ်ခွင့်ရရှိရေး၊
လမ်းပန်းဆက်သွယ်ရေး၊ ကျန်းမာရေး၊ ပညာရေးကဏ္ဍတွေမှာ လိုအပ်ချက်တွေကို
တင်ပြဖို့စီစဉ်ထားခဲ့တာပါ”ဟု
ပြောသည်။
ဖေဖော်ဝါရီလ ၈ ရက် နံနက် ၁ဝ နာရီခွဲက ရခိုင်ပြည်နယ်တည်ငြိမ်အေးချမ်းရေးနှင့်
ဖွံ့ဖြိုးတိုးတက်ရေးဆိုင်ရာလုပ်ငန်းများ ညှိနှိုင်းပေါင်းစပ်ရေးကော်မတီဥက္ကဋ္ဌ၊ နယ်စပ်ရေးရာဝန်ကြီး
ဒုတိယဗိုလ်ချုပ်ကြီး ထွန်းထွန်းနောင်၊ အပြည်ပြည်ဆိုင်ရာ
ပူးပေါင်းဆောင်ရွက်ရေးဝန်ကြီး ဦးကိုကိုလှိုင်၊ လူမှုဝန်ထမ်းကယ်ဆယ်ရေးနှင့် ပြန်လည် နေရာချထားရေးဝန်ကြီး
ဒေါက်တာသက်သက်ခိုင်၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြ
ဦးမြင့်ကြိုင်နှင့် ရခိုင်ပြည်နယ်ပြည်နယ်ဝန်ကြီးချုပ်
ဦးထိန်လင်းတို့ခေါင်းဆောင်သောအဖွဲ့သည် ပြီးခဲ့သည့် စစ်တွေမြို့နယ်ရှိ ဘောဒူဖမူဆလင်ဒုက္ခသည်စခန်းသို့
ရောက်ရှိခဲ့ခြင်းဖြစ်သည်။
အဆိုပါ ဒုက္ခသည် စခန်းတွင် ၈ ခန်းတွဲအဆောင် ၁၅၆
ဆောင်၊ ၁ဝ ခန်းတွဲအဆောင် ၈ ဆောင်ရှိပြီး အခန်းပေါင်း ၁၃၂၈ ခန်းရှိကာ
လူဦးရေ ရဝ၃၈ ဦးနေထိုင်လျက်ရှိသည်ဟု ဆိုသည်။
ယင်းနေ့က
ပြည်ထောင်စုဝန်ကြီးများလာရောက်မည်ဖြစ်၍ အဆိုပါဘောဒူဖစခန်းသို့
အခြား မူဆလင် ဒုက္ခသည်စခန်းများမှ စခန်းတာဝန်ခံများကိုလည်း သက်ဆိုင်ရာက
ခေါ်ယူထားခဲ့သော်လည်း သူတို့၏ စခန်းများအတွက်လိုအပ်ချက်များကို
တင်ပြခွင့်မရခဲ့ဟု ကိုယ်တိုင်သွားရောက်ခဲ့သည့် ဒါးပိုင်ဒုက္ခသည်စခန်းတာဝန်ခံ
ဦးသိန်းမောင်က နိရဥ္စရာကို ပြောသည်။
“သူတို့နဲ့ပြောခွင့်ရခဲ့မယ်ဆိုရင်
ကျနော်တို့ကို ရသင့်ရထိုက်တဲ့ နိုင်ငံသားအခွင့်အရေးကို ပေးဖို့အတွက် တောင်းဆိုမှာပါ။ ဒုတိယအချက်က
ကျနော်တို့ အခု ၉ ပေ ၁၁ ပေပတ်လည် ဒုက္ခသည်အဆောင်မှာ ခေတ္တခဏယာယီဆိုပြီးတော့
ဝန်ကြီးချုပ်ဦးလှမောင်တင်က ကျနော်တို့ကို ဒီမှာ နေရာချပေးထားခဲ့တယ်။
ကျနော်တို့ ဒီဘဝမှာ အခု ၁၁ နှစ်ရှိပြီ။ ဒုက္ခသည်ဘဝက လွတ်မြောက်ဖို့ အတွက် ကျနော်တောင်းဆိုဖို့စဉ်းစားခဲ့တာပါ။
အခုတော့ တစ်ခုမှ ကျနော်တို့ ပြောခွင့်မရလိုက်ဘူး”ဟု ပြောသည်။
ဒါးပိုင်ဒုက္ခသည်စခန်းတွင်
၈ ခန်းတွဲအဆောင် ၁၈၁ ဆောင်၊ ယာယီတဲ ၅ဝ၄ တဲရှိပြီး လူဦးရေ ၁ သောင်းကျော် နေထိုင်လျက်ရှိသည်ဟု
ဆိုသည်။
သူတို့အပါအဝင်
စစ်တွေမြို့နယ်အတွင်းမှ မူဆလင် ၁ သိန်းကျော်သည် ပြီးခဲ့သည့် ၁၁ နှစ်အကြာ ၂ဝ၁၂
ခုနှစ်က ဦးသိန်းစိန်အစိုးရလက်ထက်ဖြစ်ပွားခဲ့ သည့် ပဋိပက္ခအတွင်း စစ်တွေမြို့ထဲက နေအိမ်များကို စွန့်ခွာခဲ့ရပြီး
မြို့ပြင်ရှိ ဒုက္ခသည်စခန်းများတွင်
ခိုလှုံနေကြရခြင်းဖြစ်သည်။
သူတို့သည်
လက်ရှိအချိန်အထိ လွတ်လပ်စွာသွားလာခွင့်ကန့်သတ်ခံထားရဆဲဖြစ်သည်ဟု ဆိုကြသည်။
ပြည်ထောင်စုဝန်ကြီးများအဖွဲ့သည် ရခိုင်ပြည်နယ်မှ
နေရပ်စွန့်ခွာသူများ ပြန်လည်လက်ခံ နေရာချထားရေး အတွက် ဆောင်ရွက်ထားရှိမှုအခြေအနေများ၊
ပြည်တွင်းနေရပ်စွန့်ခွာသူများ မူလနေရပ်သို့ ပြန်လည်နေရာချထားရေးနှင့်
ယာယီစခန်းများပိတ်သိမ်းရေးဆိုင်ရာကိစ္စရပ်များ၊ ရခိုင်ပြည်နယ်ဖွံ့ဖြိုးတိုးတက်ရေးနှင့်စပ်လျဉ်းသည့်ကိစ္စရပ်များအား
ကွင်းဆင်းစစ်ဆေးရန်ဟုဆိုကာ ပြီးခဲ့သည့် ဖေဖော်ဝါရီလ ၅ ရက်မှစတင်ကာ စစ်တွေသို့
ရောက်ရှိခြင်းဖြစ်သည်။
ဓာတ်ပုံ
- စစ်တွေရှိ ဒါးပိုင်ဒုက္ခသည်စခန်းအား
၂ဝ၂၁ ခုနှစ်၊ သြဂုတ်လ ၂၆ ရက်က တွေ့ရစဉ်။