နိရဥ္စရာ၊ဖေဖော်ဝါရီ ၁၁ /၂၀၂၃

ရခိုင်ပြည်နယ်၊ပုဏ္ဏားကျွန်းမြို့၊ စံပြရပ်ကွက်ရှိ ဓမ္မမဏ္ဍိုင်ဘုန်းကြီးကျောင်းဝင်းတွင်ယနေ့နံနက်က မီးလောင်မှု တစ်ခုဖြစ်ပွားခဲ့ပြီး အသက် ၇၂ နှစ်အရွယ် ဆရာတော်တစ်ပါးမီးထဲပါသွားပြီး ပျံလွန်တော်မူသွားကြောင်း သိ၇သည်။

မီးထဲပါသွား၍ပျံလွန်တော်မူသွားသည့်ဆရာတော်မှာကျောက်တော်မြို့နယ်၊ သာဒါဆိပ်ကျေးရွာမှဦးပဏ္ဍ၀ဖြစ်သည်။

ဆရာတော်ဦးပဏ္ဍ၀သည် ခန္ဓာကိုယ်ညာဘက်တစ်ခြမ်းလေဖြန်းထား၍ ဓမ္မမဏ္ဍိုင်ဘုန်းကြီးကျောင်းဝင်းရှိသွပ်မိုး၊ ဝါးထရံကာ၊ ပျဉ်ခင်းထားသည့် သံဃာဆောင်တစ်ခုတွင် နောက်ထပ်ရဟန်းတစ်ပါးနှင့်အတူနေထိုင်ကာ ဆေးကုသမှုခံယူနေ၇သူဖြစ်သည်။

ယနေ့ဖေဖော်ဝါရီလ ၁၁ ရက်၊ နံနက် ၉ နာရီခန့်တွင် အဆိုပါသံဃာဆောင်၌ ဆရာတော် တစ်ပါးတည်း ရှိနေချိန်မီးလောင်မှုဖြစ်ပွားခဲ့မှုကြောင့် နေရာမှမထနိုင်ဘဲ မီးထဲပါသွားကာပျံလွန်တော်မူသွားခဲ့ခြင်းဖြစ်သည်ဟု အဆိုပါကျောင်းမှ ကျောင်းတကာတစ်ဦးက ပြောသည်။

“မီးလောင်မှုဖြစ်တာက မနက်ကတည်းကနေဖြစ်တာပါ။အစတော့ အဲဒီဆရာတော် မီးထဲပါသွားတာ မသိကြဘူး။ မီးငြိမ်းသွားလို့သွပ်တွေကို ခွာပြီး ရှင်းလင်းရေးလုပ်မှ ဆရာတော့်ရုပ်အလောင်းကိုတွေ့တာ”ဟုပြောသည်။

လက်ရှိတွင်ဆရာတော်၏ရုပ်ကလပ်ကို ပုဏ္ဏားကျွန်းမြို့ ပြည်သူ့ဆေးရုံသို့ ပို့ဆောင်ထားသည်ဟုဆိုသည်။

ပျံလွန်တော်မူသွားသည့်ဆရာတော်သည်အဆိုပါကျောင်းတွင်နေထိုင်လာသည်မှာ ၆ နှစ်ခန့်ရှိပြီဟုလည်း သိ၇သည်။

အဆိုပါဆရာတော်နေထိုင်ခဲ့သည့်သံဃာဆောင်တွင်လျှပ်စစ်မီးသွယ်တန်းထားခြင်းလည်း မရှိသည့်အတွက် ယနေ့နံနက်ကလောင်ကျွမ်းခဲ့သည့်မီးမှာ ယင်းအဆောင်အနီး မီးလှုံခဲ့ရာမှ ကျန်ရှိခဲ့သည့်မီးကြွင်းမီးကျန်များမှတဆင့် လောင်ကျွမ်းခဲ့ခြင်းဖြစ်နိုင်သည်ဟုလည်းသုံးသပ်ခန့်မှန်းနေကြသည်။

မီးလောင်မှုကြောင့်ကျောင်းဝင်းအတွင်းရှိ ယင်းသံဃာဆောင်တစ်ခုတည်းသာ မီးလောင်ပြာကျသွားခဲ့သည်ဟုဒေသခံများက ပြောသည်။

ယခုကိစ္စနှင့်ပတ်သက်ပြီးပုဏ္ဏားကျွန်းမြို့နယ်မီးသတ်တပ်ဖွဲ့ကို ဖုန်းဖြင့် ဆက်သွယ်ခဲ့သော်လည်း လက်ခံဖြေဆိုခြင်း မရှိသေးပါ။