"နေရပ်ပြန်လိုသူများကို ရိက္ခာ ၃ လစာအပြင်ငွေကျပ် ၅ သိန်းနှင့် မီးလောင်သွားသည့် အိမ်များကို ပြန်ဆောက်ပေးမည်ဟု မက်လုံးပေး" 

နိရဥ္စရာ၊ ဖေဖော်ဝါရီ၁၁ /၂၀၂၃

ရခိုင်ပြည်နယ်အတွင်းရှိစစ်ဘေးရှောင်များအား  မိုးမကျမီနေရပ်သို့ပြန်ကြရန် စစ်ကောင်စီနေပြည်တော်ဝန်ကြီးများက  ဖိအားပေးပြောဆိုမှုများရှိခဲ့သလိုနေရပ်ပြန်လိုသူများကိုလည်း မိသားစုတစ်စုကို ရိက္ခာ ၃ လစာ၊ ငွေကျပ် ၅ သိန်းနှင့် တိုက်ပွဲအတွင်း မီးလောင်သွားသည့် နေအိမ်များကိုလည်း  ပြန်ဆောက်ပေးမည်ဟု မက်လုံးပေးခဲ့သည်ဟု သတင်းရရှိသည်။

မြောက်ဦးမြို့သျှစ်သောင်းဘုန်းတော်ကြီးကျောင်း စစ်ဘေးရှောင်စခန်းတာဝန်ခံ ဦးလှစောအောင်က
 “ကျနော်တို့မှာ နေရပ်ကိုပြန်မယ်ဆိုရင်လည်းလုံခြုံရေးအခြေအနေက မကောင်းဘူး။သူတို့လည်း လုံခြုံရေးကို အာမခံချက်မပေးနိုင်ဘူး။ သူ့ရှေ့မှာလည်း ပြောလိုက်တယ်။ အားလုံး ပြန်ချင်တယ်။ဒါပေမယ့် စစ်သားတွေရွာအနီးဝန်းကျင်မှာ တပ်စွဲထားသလိုသွားလာမှုတွေရှိနေလို့  မပြန်ရဲကြဘူး။  ကြောက်လန့် နေ၇တယ်လို့ ပြောလိုက်တယ်။သူတို့ကတော့ တည်ငြိမ်အေးချမ်းစွာနဲ့ ဆောင်ရွက်နေတယ်လို့ ပြောခဲ့တယ်။ကျနော်တို့ကတော့ လုံခြုံရေးနဲ့ လုပ်ကိုင်စားသောက်နိုင်တဲ့ဘ၀အာမခံချက်ပေးမှအဲလိုမှလည်း ပြန်နိုင်မှာကိုး။သဘောက ဒီနေရာက ထပြန်သွားလို့ တစ်စုံတစ်ရာပြန်ဖြစ်လို့ရှိရင်မိမိနေရပ်က ပြန်စွန့်ခွာလာမယ်ဆိုတာက မလွယ်ဖြစ်သွားပြီ။ ဒါကြောင့်သူတို့တွေလည်း မပြန်ချင်ဘူးလို့ ပြောကြတယ်”ဟု ပြောသည်။

ယမန်နေ့ ဖေဖော်ဝါရီလ၁၀ ရက်က စစ်ကောင်စီပြည်ထောင်စုဝန်ကြီးများဖြစ်သော ရခိုင်ပြည်နယ်တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးဆိုင်ရာလုပ်ငန်းများ ညှိနှိုင်းပေါင်းစပ်ရေးကော်မတီဥက္ကဋ္ဌ၊ နယ်စပ်ရေးရာဝန်ကြီး ဒုတိယဗိုလ်ချုပ်ကြီးထွန်းထွန်းနောင်နှင့် လူမှုဝန်ထမ်းကယ်ဆယ်ရေးနှင့် ပြန်လည် နေရာချထားရေး ဝန်ကြီး ဒေါက်တာသက်သက်ခိုင်တို့ အပါအဝင် ပြည်နယ်အစိုးရအဖွဲ့မှသယံဇာတရေးရာဝန်ကြီး ဦးသန်းထွန်းတို့ ခေါင်းဆောင်သော အဖွဲ့သည် ကျောက်တော်၊ မြောက်ဦးနှင့်မင်းပြားမြို့များရှိ စစ်ဘေးရှောင် စခန်းများသို့ ရောက်ရှိလာကာ မိုးမကျမီနေရပ်သို့ပြန်ကြရန်ပြောဆိုခဲ့သည်ဟုစစ်ဘေးရှောင်များက ပြောသည်။

နယ်စပ်ရေးရာဝန်ကြီးဒုတိယဗိုလ်ချုပ်ကြီး ထွန်းထွန်းနောင်က စစ်ဘေးရှောင်များအား နေရပ်ပြန်ရန် တိုက်တွန်း ပြောဆိုခဲ့သော်လည်း  စစ်ဘေးရှောင်များကမူသူတို့၏ဘ၀အာမခံချက်ကို စစ်ကောင်စီက ပေးနိုင်မှသာ နေရပ်သို့ပြန်ကြမည်ဟုတစ်ညီတစ်ညွတ်တည်းပြောဆိုခဲ့ကြသည်ဟုဆိုသည်။

မြောက်ဦး သျှစ်သောင်းစစ်ဘေးရှောင်စခန်းတွင် မြောက်ဦးမြို့နယ်ရှိတောင်ဦး၊ ဝေသာလီ၊ ပေါက်တောပြင်၊ မောင်သာကုန်း၊ ရွာဟောင်းတောရွာနှင့်ရသေ့တောင်မြို့နယ် သမီးလှ၊ ဆောက်ခတ်စသည့်ကျေးရွာမှ ရွာသားများသည် ပြီးခဲ့သည့်၂၀၁၉ ခုနှစ်၊ မတ်လအတွင်း ရက္ခိုင့်တပ်တော်(AA)နှင့်စစ်ကောင်စီတပ်တို့တိုက်ပွဲပြင်းထန်ခဲ့မှုကြောင့် ထွက်ပြေးခိုလှုံနေကြ၇ခြင်းဖြစ်သည်။

စစ်ကောင်စီပြည်ထောင်စုဝန်ကြီးများအဖွဲ့သည်ယမန်နေ့က ကျောက်တော်မြို့ရှိ မဟာမုနိစစ်ဘေးရှောင်စခန်းနှင့်မဟာကံကြီးသျှင်စစ်ဘေးရှောင်စခန်းများသို့လည်း သွားရောက်ခဲ့ပြီးစစ်ဘေးရှောင်များနှင့်တွေ့ဆုံခဲ့သေးသည်။

ယင်းသို့တွေ့ဆုံရာတွင် နယ်စပ်ရေးရာဝန်ကြီးဒုတိယဗိုလ်ချုပ်ကြီး ထွန်းထွန်းနောင်က မိုးမကျမီ နေရပ်သို့ ပြန်သွားကြရန်နှင့်ရိက္ခာများထောက်ပံ့မည့်အကြောင်း မိနစ် ၂၀ ခန့်အကြာပြောဆိုခဲ့ပြီးစစ်ဘေးရှောင်များဘက်မှ တစ်စုံတစ်ရာ တင်ပြတောင်းဆိုခွင့်မရခဲ့ဟုတွေ့ဆုံရာတွင်ပါဝင်ခဲ့သည့် မဟာမုနိစစ်ဘေးရှောင်စခန်းမှစစ်ဘေးရှောင်တစ်ဦးက ပြောသည်။

“ကျနော်တို့အိမ်တွေကလည်းမီးရှို့ခံထား၇တဲ့အိမ်တွေဆိုတော့ ကျနော်တို့က နေရပ်ကိုပြန်လို့မရဘူးဖြစ်နေပါတယ်။ သူတို့စစ်ဆေးလာမှပဲ မင်းတို့ကဘယ်ရွာကလဲ။ ဘာတွေဆုံးရှုံးနစ်နာသွားလဲဆိုပြီးတော့မေးတော့မှ ကျနော်တို့ ဖြေရမဲ့အနေအထားရှိပါတယ်။ သူတို့ ရောက်လာပေမယ့် ဘာမှ တင်ပြခွင့်လည်း မရှိဘူး။ ကျနော်တို့အိမ်မီးလောင်သွားတဲ့သူတွေ၊ တကယ့်ကို နစ်နာတဲ့၊ ပြန်လို့မ၇တဲ့ သူတွေကိုတော့သူတို့ တစ်မျိုးတစ်ဖုံလုပ်ပေးဖို့ကို ကျနော်တို့ မျှော်လင့်ပါတယ်”ဟု ပြောသည်။

မဟာမုနိစစ်ဘေးရှောင်စခန်းတွင် စစ်ဘေးရှောင်၁၈၀၀ ကျော်ရှိပြီး ပြီးခဲ့သည့် ၂၀၁၉ ခုနှစ်၊ မတ်လအတွင်း AA နှင့် စစ်ကောင်စီတပ်တို့တိုက်ပွဲပြင်းထန်မှုကြောင့် ထွက်ပြေးလာခဲ့သူများ ဖြစ်ကြသည်။

သူတို့ထဲတွင်ကျောက်တော်မြို့နယ်ရှိ နဂရာ၊ ရွှေပြည်သစ်/ဟောင်း၊ ကျောက်ဂူစု၊မျောက်တောင်၊ သာစည်၊ အလယ်ကျွန်း၊ ပြိုင်းတိုင်း၊ မာလာ၊ ကွမ်းစည်း၊လောင်းရှည်၊ တင်းမနှင့် ချင်းပြည်နယ် ပလက်မြို့နယ်မှ သဌေးကုန်း၊ စိမ့်စင်း၊ရေချမ်း၀၊ လိပ်ဂေါင်းနှင့် ပလက်၀မြို့ပေါ်မှထွက်ပြေးလာသူများဖြစ်ကြသည်။

စစ်ကောင်စီပြည်ထောင်စုဝန်ကြီးများအဖွဲ့သည် ယမန်နေ့ကမင်းပြားမြို့ရှိ စစ်ဘေးရှောင်စခန်း ၁၁ ခုမှ စခန်းတာဝန်ခံများနှင့်ကိုယ်စားလှယ်များကို အမျိုးသမီးအိမ်တွင်းမှု သက်မွေးလုပ်ငန်း ပညာသင်တန်းကျောင်း၌ တွေ့ဆုံပြီးနေရပ်ပြန်ရေးနှင့် ထောက်ပံ့ပေးမည့်အကြောင်းတို့ကို ပြောဆိုသွားခဲ့သေးသည်။

ရခိုင်ပြည်နယ်အတွင်းရှိစစ်ဘေးရှောင်စခန်းများတွင် စစ်ဘေးရှောင်ဦးရေ ၆၆၀၀၀ ကျော်ရှိနေသေးသည်ဟုပြည်နယ်အစိုးရအဖွဲ့၏စာရင်းများအရ သိ၇သည်။

သူတို့သည် ပြီးခဲ့သည့်၂၀၁၈ ခုနှစ်မှ ၂၀၂၀ ပြည့်နှစ်အထိ AA နှင့် စစ်ကောင်စီတပ်တို့ တိုက်ပွဲများပြင်းထန်ခဲ့မှုကြောင့်နေရပ်စွန့်ခွာထွက်ပြေးလာသူများပါဝင်သလို ပြီးခဲ့သည့် ၂၀၂၂ ခုနှစ်ကလည်း AAနှင့်စစ်ကောင်စီတပ်တို့ တကျော့ပြန်တိုက်ပွဲများဖြစ်ပွားခဲ့မှုကြောင့်နေရပ်စွန့်ခွာထွက်ပြေးလာသူများလည်း ပါဝင်သည်။

ကနဦးတွင်စစ်ဘေးရှောင်ဦးရေ သိန်းနှင့်ချီရှိခဲ့သော်လည်း အချို့မှာတိုက်ပွဲများရပ်စဲထားမှုကြောင့် နေရပ်ပြန်သွားကြပြီဖြစ်သည်။

သို့သော် လက်ရှိရှိနေသေးသည့်စစ်ဘေးရှောင်များမှာ တိုက်ပွဲများပြင်းထန်ခဲ့သည့် သူတို့၏ ကျေးရွာများအနီးနှင့် တောတောင်များအတွင်းမိုင်းနှင့် စစ်လက်နက်အကြွင်းအကျန်ပစ္စည်းများကို စစ်ကောင်စီကတာဝန်ယူရှင်းလင်းမပေးသေးသည့်အတွက် ယခုကဲ့သို့ နေရပ်သို့မပြန်နိုင်ကြခြင်းဖြစ်သည်ဟု စစ်ဘေးရှောင်များက ပြောဆိုကြသည်။

ဓာတ်ပုံ - ရခိုင်ရှိစစ်ဘေးရှောင်စခန်းများတွင် ဖြစ်သလိုနေနေကြရသည့် စစ်ဘေးရှောင်အချို့အား တွေ့၇စဉ်။