တောင်ကုတ်ရဲစခန်းမှ ရဲအုပ်တစ်ဦးကို စစ်ကောင်စီဖမ်းဆီး

ရေးသူ: Web Master
| ရက်စွဲ: ၁၄ ဖေဖော်ဝါရီ ၂၀၂၃
| ကြည့်ရှုသူ: 5.4k

နိရဉ္စရာ၊ ဖေဖော်ဝါရီ ၁၄/၂၀၂၃

ရခိုင်ပြည်နယ်၊ တောင်ကုတ်မြို့နယ် ရဲတပ်ဖွဲ့မှ ရဲအုပ်ဝင်းခိုင်ကို ယနေ့ဖေဖော်ဝါရီလ ၁၄ ရက် နံနက်က စစ်ကောင်စီတပ်မှ ဖမ်းဆီးခေါ်ဆောင်သွားကြောင်း သိရသည်။

ဖမ်းဆီးခံရသည့် ရဲအုပ်ဝင်းခိုင်မှာ တောင်ကုတ်- ရန်ကုန် ကားလမ်းမပေါ်ရှိ တောင်ပေါ်ကြီး စစ်ဆေးရေးဂိတ်တွင် စခန်းမှူးအဖြစ်တာဝန်ထမ်းဆောင်နေသူဖြစ်ပြီး ယနေ့နံနက် ကိုးနာရီခွဲခန့်က စစ်တပ်မှဖမ်းဆီးခေါ်ဆောင်သွားခြင်းဖြစ်ကြောင်း နီးစပ်သူတစ်ဦးကပြောသည်။

"နိုင်ငံတော်နဲ့သက်ဆိုင်တဲ့ကိစ္စလို့တော့ ကြားတယ်။ ဘာအကြောင်းအရာလည်း သေချာ မကြားရသေးဘူး။ စစ်တပ်ကိုခေါ်သွားတယ်လို့ပဲ သိရတယ်။ တောင်ပေါ်ကြီးရဲကင်း စခန်းကနေခေါ်သွားတာ။ သူက ဗမာပြည်ကနေ ဒီမှာတာဝန်ကျနေတာ" ဟုပြောသည်။

လက်ရှိတွင် ၎င်းအား တောင်ကုတ်အခြေစိုက် စကခ တပ်မ (၅) ဌာနချုပ်သို့ စစ်ကောင်စီ တပ်သားများက ဖမ်းဆီးခေါ်ဆောင်သွားခြင်းဖြစ်ပြီး မည်သည့်အကြောင်းအရင်းကြောင့် ဖမ်းဆီးခေါ်ဆောင်သွားခြင်းကို မသိရသေးပေ။

၎င်းသည် တောင်ကုတ်မြို့နယ်ရဲတပ်ဖွဲ့တွင် တာဝန်ထမ်းဆောင်ရန်ရောက်ရှိနေသည်မှာ တစ်နှစ်ကျော်ခန့်ကြာမြင့်နေပြီဖြစ်သည်။

၎င်းအားစစ်ကောင်စီမှ ဖမ်းဆီးမှုသည် ပြီးခဲ့သည့်ဇန်နဝါရီလက ၎င်းတာဝန်ကျနေသည့် တောင်ပေါ်ကြီးရဲကင်းစခန်းတွင် သစ်မှောင်ခိုကားများ ဖမ်းဆီးရရှိသည်နှင့် ဆက်နွယ်နိုင်သည်ဟု သတင်းတစ်ပိုင်း တစ်စကြားရသိကြောင်း နီးစပ်သူက ပြောသည်။

(NN-8)