နိရဥ္စရာ၊ ဖေဖော်ဝါရီ၁၈/၂၀၂၃

ရခိုင်ပြည်နယ်သံတွဲမြို့နယ်တွင် တစ်ဘက်ဘင်္ဂလားဒေ့ရှ်နိုင်ငံသို့ပို့ရန်အတွက် အုန်းသီးများအဝယ်လိုက်နေ၍ ဈေးကောင်းရနေသည်ဟု အုန်းသီးရောင်းချသူများမှ သိ၇သည်။

သံတွဲမြို့နယ်အတွင်းဒေသခံကိုယ်စားလှယ်(ပွဲစား)များမှတဆင့် အုန်းသီးအကြီး/အသေးတစ်လုံးလျှင်ငွေကျပ် (၃၀၀)ဖြင့်ပေး၍ ပြီးခဲ့သည့် နိုဝင်ဘာလခန့်မှစတင်ကာလိုက်လံဝယ်ယူနေကြခြင်းဖြစ်ကြောင်း သံတွဲမြို့နယ် ဇာဒီပြင်ကျေးရွာမှအုန်းသီးရောင်းချသူ ဦးမြင့်စိုးက နိရဥ္စရာကိုပြောသည်။

“ရောင်းချသူတွေအနေနဲ့ရောင်းချငွေစုစုလုံးလုံးရတယ်။ အပင်တက်သမား တကူးတကမရှာရဘူး။ ဝယ်သူအိမ်သို့ တကူးတကသွားရောင်းစရာမလိုဘူး။ သူတို့ကိုယ်တိုင် လာဝယ်တော့ အခုလို ရောင်းချ၇တာ အဆင်ပြေတယ်”ဟု ပြောသည်။

၇ခိုင်မှ ဝယ်ယူသည့်အုန်းသီးများကိုဘင်္ဂလားဒေ့ရှ်နိုင်ငံတွင် တစ်လုံးလျှင် ကျပ် ၁ ထောင်တန်ဖိုးရှိဘင်္ဂလာငွေဖြင့် ပြန်လည်ရောင်းချကြကြောင်းလည်း သိ၇သည်။

ထိုသို့ဘင်္ဂလားဒေ့ရှ်နိုင်ငံသို့အုန်းသီးများတင်ပို့ရောင်းချနေမှုကြောင့်ဒေသခံလမ်းဘေးမုန့်လုပ်ရောင်းချသူများနှင့်အုန်းဆီထုတ်လုပ်ရောင်းချသူများအနေဖြင့်  အုန်းသီးများကို ဈေးကြီး ပေးဝယ်ယူနေ၇သည်ဟု ၎င်းက ပြောသည်။

သံတွဲမြို့နယ်၊ ကင်းမော်ကျေးရွာမှမုန့်လုပ်ရောင်းချသူတစ်ဦးက “ပြီးခဲ့တဲ့နှစ်ကအုန်းသီးအ သေးတစ်လုံးကို(၁၀၀)ကျပ်၊ အကြီး(၂၀၀)ကျပ်ရှိပြီး ဒီနှစ်မှာ အသေး(၂၀၀)ပေး၇ပြီးအလတ်(၃၀၀)၊ အကြီးကို(၅၀၀)လက်လီ ဈေး ပေါက်နေတယ်။ အုန်းသီးတွေကိုလည်းအရင်လို အလွယ်တကူဝယ်မရတော့စိတ်ပင်ပန်း၇တယ်”ဟုပြောသည်။

အဆိုပါအုန်းသီးများကို သံတွဲမြို့မှ၅ မိုင်ခန့်အကွာရှိ ကင်းမော်ရွာသင်္ဘောဆိပ်ကမ်းမှ ကုန်တင်သင်္ဘောငယ်များဖြင့်စစ်တွေသို့ ပို့ဆောင်ပြီး စစ်တွေမှတဆင့် ဘင်္ဂလားဒေ့ရှ်နိုင်ငံသို့နယ်စပ်ကုန်သွယ်ရေးဖြင့် ပို့ဆောင်ပေးခြင်းဖြစ်သည်။

ရခိုင်မှအုန်းသီးများကို တစ်ဘက်ဘင်္ဂလားဒေ့ရှ်နိုင်ငံသို့ ပြီးခဲ့သည့် ၂၀၂၂ခုနှစ်မှအစောပိုင်းမှစတင်ကာ နယ်စပ်ကုန်သွယ်ရေးလမ်းကြောင်းဖြင့်ပို့ဆောင်ရောင်းချနေခြင်းဖြစ်သည်ဟု သိ၇သည်။

ဓာတ်ပုံ- သံတွဲမြို့ကင်း မော်ရွာဆိပ်ကမ်းတွင် အုန်းသီးများထုပ်ပိုးသယ်ဆောင်ရန်ပြင်ဆင်မှုအားတွေ့၇စဉ်။ (သတင်းပေးပို့သူ- သံတွဲ  CJ)