ရေနစ်သေဆုံးမှုများမကြာခဏဖြစ်ပွားသည့် စစ်တွေ ပွိုင့်ကမ်းခြေ၏ ရေဆွဲအားရှိသည့်နေရာတစ်ခုတွင် ရေဆင်းမကူးရသတိပေးဆိုင်းဘိုး ပြုလုပ်

Preview

ရေနစ်သေဆုံးမှုများမကြာခဏဖြစ်ပွားသည့် စစ်တွေ ပွိုင့်ကမ်းခြေ၏ ရေဆွဲအားရှိသည့်နေရာတစ်ခုတွင် ရေဆင်းမကူးရသတိပေးဆိုင်းဘိုး ပြုလုပ်

ဖေဖော်ဝါရီ ၂၀/ ၂၀၂၃ | ကြည့်ရှုသူ :4190

နိရဥ္စရာ၊ ဖေဖော်ဝါရီ၂၀/ ၂၀၂၃

၇ခိုင်ပြည်နယ်၊ စစ်တွေမြို့ရှိစစ်တွေပွိုင့်ကမ်းခြေတွင် ရေနစ်၍ လူသေဆုံးမှုများ မကြာခဏ ဖြစ်ပွားတတ် သည့် ပွိုင့်ကမ်းခြေ၏ ရေဆွဲအားရှိသည့် နေရာတစ်ခုတွင် ရေဆင်းမကူး၇ သတိပေးဆိုင်းဘိုး ပြုလုပ်နေသည်ဟု သိ၇သည်။

အဆိုပါဆိုင်းဘိုးကို ပြုလုပ်ရခြင်းသည်စစ်တွေပွိုင့်ကမ်းခြေတွင် ဒီရေအတက်အကျပေါ်မူတည်ပြီး ရေအောက်သို့ရေဆွဲအားများရှိနေသဖြင့် ရေဆင်းကူးသည့်သူများအတွက် အသက်သေဆုံးမှုအန္တရာယ်များဖြစ်ပေါ်နေ၍ ကြိုတင်ကာကွယ်သည့်အနေဖြင့် အသိပေးဆိုင်းဘိုးပြုလုပ်၇ခြင်း ဖြစ်သည်ဟု ဆိုင်းဘုတ်အားပြုလုပ်နေသည့်တာဝန်သိပြည်သူတစ်ဦးဖြစ်သူ ဦးကျော်အောင်စိန်က နိရဥ္စရာသတင်းဌာနကို ပြောသည်။

"စစ်တွေကမ်းခြေမှာ ရေအတက်အကျအလိုက်ရေအောက်သို့ရေဆွဲအားပြင်းတယ်။ ရေဆင်းကူး သူတွေက ဒီလိုအသိပေးဆိုင်းဘိုးမရှိလို့ရေဆင်းကူးရင်း သေဆုံးသွားတာရှိတယ်။ ဟိုတလောတုန်းကလည်း ကလေး ၃ ယောက်ကလည်းရေဆင်းကူးရင်း မသေသင့်ဘဲ သေသွားခဲ့ရတဲ့အတွက် အန္တရာယ်မရှိရအောင်အသိပေးဆိုင်းဘိုးပြုလုပ်၇တာပါ" ဟု ပြောသည်။

အန္တရာယ်ရှိနေရာအဖြစ်သတ်မှတ်ထားသည့်ပွိုင့်ကမ်းခြေ၏ ပွိုင့်အငူဘက်တွင် သတိပေးဆိုင်းဘိုး ၃ ခုကို မီတာ ၅၀အကွာအဝေးဖြင့် စိုက်ထူသွားမည်ဖြစ်ပြီး အောက်ခြေကြမ်းခင်းမှကုန်းအပေါ်ဆိုင်းဘိုးအထိ အမြင့်ပေ ၁၇ ပေခွဲရှိသည်ဟုလည်း ဆိုသည်။

"ဟိုတယ်ဘက်ထိတော့ မလုပ်တော့ဘူး။အဲဒီဘက်မှာက ရေအောက်မှာသဲတွေနဲ့ဆိုတော့ မာတဲ့နေရာမရှိရင်လုပ်လည်းအသုံးမဝင်ဘူး။ သဲတွေနဲ့ရေထဲ လျှောကျပါသွားမယ်။ ဒီအန္တရာယ်ရှိနေရာမှာပဲကာကွယ်အသိပေးဆိုင်းဘိုးလုပ်တာပါ" ဟု ပြောသည်။

အဆိုပါဆိုင်းဘိုးများကိုရခိုင်ပြည်ဝန်ကြီးချုပ်၏လမ်းညွှန်မှုဖြင့် ဖေဖော်ဝါရီလအစောပိုင်းခန့်မှစတင်ကာ RC တိုင်ဖြင့်ခိုင်ခန့်စွာပြုလုပ်နေခြင်းဖြစ်သည်။

ယခုကဲ့သို့သတိပေးဆိုင်းဘိုးများစိုက်ထူနေမှုအပေါ် စစ်တွေကမ်းခြေတွင်လာရောက်လာ်ပတ်နေသည့်အမျိုးသမီးတစ်ဦးကလည်း လုပ်သင့်လုပ်ထိုက်သည့်အလုပ်ဖြစ်သည်ဟု ပြောသည်။

"ဒီနေရာမှာ လူသေဆုံးမူတွေအများကြီးရှိခဲ့တယ်။ ဒီနားမှာရှိပါတယ်ဆိုတဲ့ CCTV တွေက ဘာမှလည်းအသုံးမဝင်ပါဘူး။ ဟိုးတလောကလည်း ကလေး ၃ ယောက် ရေဆင်းကူးရင်း၊ ရေနစ်သေတယ်။ဒါကြောင့်မလို့ ဒီလိုဆိုင်းဘိုးလုပ်လိုက်တော့ မြန်မာစာဖတ်တတ်တဲ့ကလေးသူငယ်ကအစ ဒီနေရာမှာ အန္တရာယ်ရှိတယ်။ ရေဆင်းမကူးရဘူးဆိုတာကိုဦးနှောက်ထဲစွဲသွားတယ်။ ကောင်းတဲ့လုပ်ရပ်လို့တော့ မြင်ပါတယ်" ဟုပြောသည်။

ယင်းဆိုင်းဘိုးပြုလုပ်ရာ၌ ဆိုင်းဘိုးစိုက်ထူရန်ကမ်းခြေရှိကျောက်တန်းအချို့အား တူးဖော်လိုက်၇သော်လည်း အတတ်နိုင်ဆုံး အပျက်အစီးနည်းအောင်ဆောင်ရွက်ခြင်းဖြစ်ပြီးကျောက်တန်းများအား ဖြိုဖျက်နေခြင်း မဟုတ်ဟု ၎င်းက ပြောဆိုသည်။

"ဒီနေရာမှာ ဒီဆိုင်းဘိုးတိုင်တွေကိုဒီအတိုင်းကြီးတည်ဆောက်လို့မ၇ဘူး။ ဒါကြောင့် ကျောက်တန်းကနေအောက်ကို ၄ ပေ၊ ၆ ပေ တူးလိုက်လို့ပြဿနာမဟုတ်ဘူး။ ဒီတိုင်တည့်မတ်ဖို့မိုးရာသီ လေဒဏ်၊ မိုးဒဏ်၊ လှိုင်းဒဏ်တွေခံနိုင်ဖို့အတွက် အောက်က Foundationချဖို့အတွက် တူး၇တာဖြစ်ပါတယ်။သဘာ၀ကိုဖျက်စီးရာလည်း မရောက်ပါဘူး။ ကောင်းတဲ့အမြင်နဲ့ ပေးကြည့်ပေးကြပါလို့ပြောချင်ပါတယ်။ ကျွန်တော်က အခကြေးယူပြီးလုပ်နေတာလည်း မဟုတ်ဘူး။တာဝန်သိပြည်သူတစ်ယောက်အနေနဲ့ ပါဝင်လုပ်ကိုင်နေတာပါ" ဟု၎င်းကပြောသည်။

စစ်တွေပွိုင့်အငူအနီးကမ်းခြေတွင်ရေဆွဲအားနှင့် ဒီရေအတက်အကျကို မသိ၍ ရေဆင်းကူးသူများအနေဖြင့် ရေနစ်သေဆုံးမှုများမကြာခဏဆိုသလို ဖြစ်ပေါ်လျက်ရှိသည်ဟု မြို့ခံများက ပြောသည်။

ပြီးခဲ့သည့် ၂၀၂၂ခုနှစ်အောက်တိုဘာလ ၂၂ ရက်၊ နံနက် ၁၁ နာရီခန့်ကလည်း စစ်တွေမြို့မှ စတုတ္ထတန်းကျောင်းသား၃ ဦးသည် ကမ်းခြေအတွင်း ရေဆော့ကစားရာမှ ရေနစ်သေဆုံးမှုဖြစ်ပွားခဲ့၍မြို့ခံများအကြား ဝမ်းနည်းကြေကွဲခဲ့ကြ၇သည်။ (NN-12)

#လူမှုရေးရာ

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ