စစ်တွေရှိ ဖွဲရာကုန်းဒုက္ခသည်စခန်းမှ မူဆလင်အမျိုးသမီး ၄၀ ကျော်အား အဓမ္မပြုကျင့်ခဲ့သည်ဟု စွပ်စွဲခံထားရသူ စခန်းတာဝန်ခံအားရဲကဖမ်းဆီးထားပြီး ထိရောက်စွာအပြစ်ဒဏ်ပေးရန်ကာယကံရှင်အမျိုးသမီးများတောင်းဆို

နိရဥ္စရာ၊ ဖေဖော်ဝါရီ၂၀/၂၀၂၃

၇ခိုင်ပြည်နယ်၊ စစ်တွေမြို့နယ်ဆေးသမားကြီးအုပ်စုရှိ ဖွဲရာကုန်းဒုက္ခသည်စခန်း(IDP Camp)မှ မူဆလင်အမျိုးသမီး ၄၀ကျော်အား အဓမ္မပြုကျင့်ပြီး လူသတ်ရန်ကြံစည်မှုတို့ဖြင့် စွပ်စွဲဖမ်းဆီးခံထားရသူကို ရဲက စစ်တွေတွင် ဖမ်းဆီးထားပြီး ၎င်းအား ထိရောက်စွာ အရေးယူဆောင်ရွက်ပေးရန်ကာယကံရှင်များက တောင်းဆိုထားကြောင်း သတင်းရရှိသည်။

အဆိုပါ ဖွဲရာကုန်းIDP Camp မှစခန်းတာဝန်ခံ ဦးအုစ်ဖာန်ဂေါ်နီသည် ပြီးခဲ့သည့် ၂၀၁၂ ခုနှစ်မှ ၂၀၂၂ခုနှစ် သြဂုတ်လ ၂ ရက်အထိ စခန်းအတွင်းမှ လင်ရှိ၊ သားသမီးရှိအမျိုးသမီးများ၊ စိတ်ရောဂါသည်အမျိုးသမီးများ ၊ အသက်မပြည့်သေးသည့်အမျိူးသမီးငယ်များ၊ စသည့် အမျိုးသမီး (၄၅) ဦးကို တုတ်၊ ဓားပြခြိမ်းခြောက်မှုများပြုလုပ်ကာ အတင်းအဓမ္မပြုကျင့်ခဲ့ကြောင်း ကာယကံရှင်များ၏ ပြောပြချက်အရ သိ၇သည်။

အဆိုပါအဓမ္မပြုကျင့်ခံခဲ့၇သည့်အမျိုးသမီးအထဲမှ တစ်ဦးက၎င်းဦးအုစ်ဖာန်ဂေါ်နီအား ပြီးခဲ့သည့် ၂၀၂၂ ခုနှစ်က စစ်တွေမြို့နယ်တရားရုံးတွင်ရာ/ကြီးအမှုအမှတ် ၉၂၃ ပုဒ်မနှင့် ပုဒ်မ ၃၇၆ တို့ဖြင့် တရားစွဲဆိုခဲ့ပြီးအမှုမှန်ပေါ်ပေါက်လာသည့်အချိန်တွင် ပြုကျင့်သူ၏အစ်ကိုဖြစ်သူဦးမောင်မောင်သန်းက ငွေကြေးပေးကာ အမှုကျေအေးခိုင်းသဖြင့် ယင်းအမျိုးသမီးကအမှုရုပ်သိမ်းခွင့်တင်ခဲ့ကြောင်း ထိုအမှုအား ကူညီဆောင်ရွက်ပေးနေသည့်အမျိုးသမီး တက်ကြွလှုပ်ရှားသူများကပြောသည်။

ထို့နောက်တွင် ဦးအုစ်ဖာန်ဂေါ်နီနှင့်၎င်း၏အစ်ကိုဖြစ်သူ အပေါင်းအပါတို့သည် မတော်မတရား ပြုကျင့်ရသည့်ကျန်အမျိူးသမီးငယ်များအား ရဲစခန်းတွင်တိုင်ကြားပါက စခန်းမှထုတ်ပြီးသတ်ပစ်မည်ဟု ခြိမ်းခြောက်ပြောဆိုမှုများရှိခဲ့သဖြင့် ကျန်အမျိုးသမီးများမှာနှုတ်ပိတ်နေခဲ့ရကြောင်း သိ၇သည်။

ထို့ကြောင့်အဓမ္မပြုခံထား၇သည့် အမျိုးသမီး ၉ ဦးမှာ အမျိုးသမီးများအပေါ်အလိုမတူဘဲအဓမ္မပြုကျင့်ပြီး ဂုဏ်သိက္ခာညှိုးနွမ်းအောင်လုပ်ဆောင်ခဲ့သည့် ဦးအုစ်ဖာန်ဂေါ်နီကိုတရားဥပဒေအရ အရေးယူနိုင်ရေးအတွက် စစ်တွေမြို့ မရဲစခန်းတွင် ၂၀၂၂ခုနှစ် စက်တင်ဘာလ ၃ ရက်တွင် တိုင်တန်းထားကြောင်း သိ၇သည်။

သို့ရာတွင် ကျူးလွန်သူကိုဖမ်းဆီးထားသော်လည်း လက်ရှိအချိန်ထိ အရေးယူပေးခြင်းမရှိသေး၍ ယခုကဲ့သို့တောင်းဆိုနေရခြင်းဖြစ်သည်ဟု ကျူးလွန်ခံ၇သည့် အမျိုးသမီးတစ်ဦးကပြောသည်။

" အုစ်ဖာန်ဂေါ်နီတစ်ယောက်ပဲလုပ်နေတာပါ။ ဦးမောင်မောင်သန်းကတော့ အားပေးတယ်။ နင်တို့အမှုဖွင့်မယ်ဆိုရင်နင့်အိမ်တွေကို သိမ်းမယ်၊ နင်တို့ကိုနှင်ထုတ်မယ်၊သတ်မယ်ဆိုပြီးတော့ ခြိမ်းခြောက်တယ်။ နင်တို့ဘာမှမလုပ်နဲ့ငါကကော်မတီခေါင်းဆောင်ပဲ။ နင်တို့ငါ့ကို ဘာလုပ်လို့၇မှာလဲဆိုပြီး ပြောတယ်။ ကျမတို့ကတော့ မောင်မောင်သန်းဆိုတာကိုထောင်ကျ အောင်လုပ်ချင်တယ်။ ကျမတို့ဘ၀ကပျက်စီးသွားပြီ။သူ့ကို ကျမတို့စခန်းအထဲမှာမရှိအောင် လုပ်စေချင်တယ်" ဟုပြောသည်။

အဆိုပါဖွဲရာကုန်းစခန်းတွင် စခန်းတာဝန်ခံ ဦးအုစ်ဖာန်ဂေါ်နီ၏ အဓမ္မပြုကျင့်ခံ၇သည့် အမျိုးသမီးသည် ၄၅ ဦးထက်မနည်းရှိနေသေးပြီး ဦးအုစ်ဖာန်ဂေါ်နီနှင့် ၎င်း၏အစ်ကိုဖြစ်သူ ဦးမောင်မောင်သန်းအပေါင်းအပါတို့ကိုကြောက်လန့်ရသဖြင့် ထုတ်ဖော်ပြောဆိုကြခြင်းမရှိကြောင်း ပြုကျင့်ခံ၇သူများကပြောသည်။

သူတို့အတွက် အရေးဆိုပေးနေသူ ရခိုင်အမျိုးသမီးများအဖွဲ့ချုပ်မှ သဘာပတိဖြစ်သူတစ်ဦးက"သူတို့ပြောစကားအရ ဒီလိုမုဒိမ်းကျင့်ခံထား၇တဲ့အမျိုးသမီးက ဒီ ၉ ယောက်ပဲမဟုတ်သေးဘူး။နောက်ထပ် အိမ်ထောင်နဲ့ကွဲမှာကြောက်လို့တစ်မျိုး၊ အပျိုလေးတွေဖြစ်လို့တစ်မျိုးထုတ်မပြောကြတာရှိတယ်တဲ့။ ဒီလိုဖြစ်နေတာက လေးငါးရှစ်ဆယ်လောက်တောင်ရှိတယ်ဆိုတော့ ကျမတို့အနေနဲ့ဝန်းရံသင့်တယ်။ ကျမတို့အမျိုးသမီးထုမှာ ဘာသာ လူမျိုးဆိုတာမရှိဘူး။ အမျိုးသမီးဟာ အမျိုးသမီးပါဘဲ။ဒါတွေကို မျက်ကွယ်ပြုလို့လည်း ၇မှာ မဟုတ်ဘူး။ အမျိုးသမီးတွေကအမျိုးသမီးတွေအတွက် အလုပ်လုပ်ဖို့ လိုအပ်တယ်။ အမျိုးသမီးဆိုလို့ရှိရင်ကျမတို့ရင်ဘက်ချင်းတူရမယ်။ ကျမတို့ရင်ထဲမှာလည်း သူတို့ငိုပြီးကျမတို့ကိုတိုင်တဲ့အခါ ကျမတို့လည်း တကယ်ခံစားချက်ဖြစ်ပြီး မူဆလင်အမျိုးသမီးဆိုတာမျိုးကိုမစဉ်းစားဘူး။အမျိုးသမီးတွေဟာ အမျိူးသမီးတွေ အားနည်းတဲ့နေရာမှာ အမျိုးသမီးတွေဒုက္ခရောက်ပါလားဆိုပြီးကျမတို့ဝန်းရံဖို့လုပ်တာပါ" ဟုပြောသည်။

အဆိုပါ စခန်းတာဝန်ခံ၏အဓမ္မပြုကျင့်ခံ၇သည့်အမျိုးသမီးများသည် ၎င်းတို့ကို အဓမ္မပြုကျင့်ခဲ့သည့်စခန်းတာဝန်ခံနှင့်အပေါင်းအပါများကို တရားဥပဒေအတိုင်းအမှန်ပေါ်ပေါက်စေချင်ပြီး သေဒဏ်ပေးစေလိုကြောင်း အသက်မပြည့်သေးဘဲအဓမ္မပြုကျင့်ခံခဲ့၇သည့် နောက်ထပ်အမျိုးသမီးတစ်ဦးကလည်း ပြောသည်။

"ကျမဘ၀ကပျက်စီးသွားပြီ။ သူ့ကိုထောင်ကျစေချင်ပါတယ်။ သေဒဏ်ပေးစေချင်ပါတယ်" ဟုပြောသည်။

ဖွဲရာကုန်းဒုက္ခသည်စခန်းနှင့်နီးစပ်သူများကလည်း ယခုကိစ္စသည်ဟုတ်မှန်ပြီး ကျူးလွန်ခံရသူများက သူတို့၏အသက်အန္တရာယ်ကြောင့်နှုတ်ပိတ်နေရခြင်းများလည်းရှိနေသည်ဟု ပြောကြသည်။

ယခုကိစ္စနှင့်ပတ်သက်ပြီးစစ်တွေမြို့မရဲစခန်းအား ဆက်သွယ်ခဲ့သော်လည်း ဆက်သွယ်မ၇ခဲ့ပါ။

ထိုကဲ့သို့ ဖြစ်ရပ်များသည်ရခိုင်ရှိ အခြား IDP စခန်းများတွင်လည်း ဖြစ်ရပ်တူများရှိနေသေးပြီးအကြောင်းအမျိုးမျိုးကြောင့် ထုတ်ဖော်မပြောရဲကြသည့် မူဆလင်အမျိုးသမီးစွာလည်း ရှိနေသေးသည်ဟု ပြုကျင့်ခံ၇သူများကပြောသည်။

ယင်းကြောင့် ယခုကဲ့သို့ဖြစ်ရပ်များထပ်မံမဖြစ်ပွား၇အောင် ဤအမှုကို သေချာအမှန်တရား ပေါ်ပေါက်လာစေရန် စစ်ဆေးအရေးယူမှု လုပ်ဆောင်သင့်သည်ဟုမူဆလင်အမျိုးသမီးများက ပြောသည်။ (NN-8/12)

ဆက်စပ် အကြောင်းအရာများ

နောက်ဆုံးရသတင်းများ