နွေစသည်နှင့် ရခိုင်ရှိ ကျေးရွာအချို့နှင့်စစ်ရှောင်စခန်းများတွင် ရေရှားပါးမှုကြုံတွေ့နေရပြီ

နိရဥ္စရာ ၊ ဖေဖော်ဝါရီ ၂၀ / ၂၀၂၃

နွေရာသီရောက်လာသည်နှင့်  တစ်ပြိုင်နက်တည်း ရခိုင်ပြည်နယ်အတွင်းရှိ ကျေးရွာများ အပါအဝင် စစ်ဘေးရှောင်စခန်းများတွင် သောက်သုံးရေ  ရှားပါးမှုကို စတင်ကြုံတွေ့နေရပြီဖြစ်ကြောင်း သတင်းရရှိသည်။

ပေါက်တောမြို့နယ် မြတဲကျေးရွာတွင်ဆိုလျှင် ကျေးရွာသားများအဓိကအသုံးပြုနေရသည့် ရေကန် ၃ ကန်ရှိရာ ယခုဖေဖော်ဝါရီလထဲတွင်ရေများစတင်ခမ်းခြောက်နေပြီဖြစ်၍ ရေများကို နည်းမျိုးစုံဖြင့် ကြိုတင်သိုလှောင်နေရပြီး ချွေတာသုံးစွဲနေရကြောင်းကျေးရွာသားများက ပြောသည်။

ယင်းသို့နွေရာသီမကျရောက်မီကပင် သောက်သုံးရေကန်များခြောက်ခမ်းနေသောကြောင့် နွေရာသီတွင် သောက်သုံးရေလုံးဝ ပြတ်လပ်သွားနိုင်ကြောင်းလည်း  မြတဲကျေးရွာသားတစ်ဦးက နိရဥ္စရာသို့ ပြောသည်။

"ကန်မှာကတော့ ရေခမ်းနေပါပြီ။ ရေကန်က မိုးရေကိုလှောင်ထားတဲ့ ကန်ပေါ့။ အောက်ကလည်း စုပ်ယူတယ်၊ အထက်ကလည်းနေပူကြောင့် ရေခမ်းသွားပြီ။ ဒီကန်ကရွာသားတွေ သုံးလို့မလောက်ဘူး။ အခြားကန်တွေတော့ရှိတယ်။ ဒါပေမယ့် နွံတွေများတော့ သုံးမကောင်းဘူး။ နွေရာသီရောက်ပြီဆိုရင် ရေပြသနာပေါ်ပြီ" ဟု ပြောသည်။

အဆိုပါ ပေါက်တောမြို့နယ်၊ မြတဲကျေးရွာတွင် ရေကန်တူးဖော်ရန် မြေအောက်တွင် ကျောက်သားထု ခံနေသဖြင့် အခက်အခဲရှိပြီး အဝီစိရေတွင်းလည်း တူးဖော်၍မရသလို ရေကန်နက်နက် တူးဖော်ပါကလည်း ဆားဓာတ်ပါသည့် ရေသာထွက်ရှိသဖြင့် သုံးစွဲရန်အဆင်မပြေကြောင်း ဒေသခံများက ပြောသည်။

အလားတူ နှစ်စဉ်ရေရှားပါးမှုဒဏ်ကို ကြုံတွေ့နေရသည့် တောင်ကုတ်မြို့နယ်၊ ကျောက်တံခါး ကျေးရွာတွင်လည်း ရွာသားများအသုံးပြုနေသည့် သောက်သုံးရေကန်ခြောက်ခမ်းသွားပြီး နေ့စဉ်သောက်သုံးရေကို ဝယ်ယူသုံးစွဲနေကြရကြောင်း ရွာသားများက ပြောသည်။

အချို့ရွာသားများမှာ ရွာမှ ၄ ဖာလုံခန့်ဝေးသည့် တောင်ကုတ်ချောင်းထဲမှရေကို ခပ်ယူသုံးစွဲနေကြရကြောင်း ကျေးရွာသားတစ်ဦးက ပြောသည်။

"ရွာက တယောက်က တောင်ကုတ်ချောင်းကရေကို ပိုက်သွယ်ပြီးစက်နဲ့တင်တယ်။ အဲဒီရေကို ပြန်ဝယ်သုံးနေရပါတယ်။ တချို့ဆိုင်ကယ်ရှိတဲ့သူတွေက တောင်ကုတ်ချောင်းထဲက သွားခပ်ကြတယ်။ တောင်ကုတ်ချောင်းက ရွာနဲ့ ၄ ဖာလုံလောက်ဝေးတယ်" ဟု ပြောသည်။

အလားတူ ကျောက်တော်မြို့နယ်၊ ပေါက်လေဝကျေးရွာနှင့် အနီးနားဝန်းကျင်ကျေးရွာများ၊ မင်းပြားမြို့နယ် ဖလောင်းပြင် ကျေးရွာရှိ သောက်သုံးရေကန်များမှာလည်း ရေများခြောက်ခမ်းနေပြီ ဖြစ်၍ သောက်သုံးရေအခက်အခဲနှင့် ရင်ဆိုင်နေရကြောင်း ကျေးရွာသားများက ပြောသည်။

ယင်းသို့ သောက်သုံးရေရှားပါးမှုကို ရခိုင်စစ်ဘေးရှောင်စခန်းအများစုတွင်လည်း ကြုံတွေ့နေရကြောင်း စစ်ဘေးရှောင်များက ပြောသည်။

ပုဏ္ဏားကျွန်းမြို့နယ်၊ ဂဏန်းတောင် စစ်ဘေးရှောင်စခန်း၊ ဗန်းဗွီးကျေးရွာနှင့် စစ်ရှောင်စခန်း တို့တွင်လည်း သောက်သုံးရေခမ်းခြောက်နေ၍ စခန်းရှိရေအခက်အခဲ ဖြစ်ပေါ်နေကြောင်း ဗန်းဗွီးကျေးရွာသားတစ်ဦးက နိရဥ္စရာ သတင်းဌာနသို့ ပြောသည်။

"ရေကန်တွေက လုံးဝခမ်းခြောက်နေပြီ။ ရေရှိသေးတဲ့ ကန်တွေကလည်း ရေတွေနောက်ကျိပြီးတော့ သောက်သုံးရအဆင်မပြေဘူး" ပြောသည်။

ယခုကိစ္စနှင့်ပတ်သက်ပြီး သောက်သုံးရေရှားပါးသည့်ဒေသများကို မည်သို့ ကူညီဆောင်ရွက် ပေးသွားမည်ကို သိလို၍ ရခိုင်ပြည်နယ် ကျေးလက်ဒေသဖွံ့ဖြိုးတိုးတက်ရေး ဦးစီးဌာနမှ ပြည်နယ်ဦးစီးမှူး ဦးဦးချစ်မောင်ကို ဆက်သွယ်ရာ ဖုန်းလက်ခံဖြေဆိုခြင်းမရှိခဲ့ပါ။

ဆက်လက်ပြီး ရခိုင်ပြည်နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဒုတိယညွှန်ကြားရေးမှူး ဦးစောဝင်းကို ဆက်သွယ်ရာ အလုပ်များနေသည်ဟုဆိုကာ ဖုန်းချသွားခဲ့သည်။

ရခိုင်မြို့နယ်အချို့ရှိ ကျေးရွာများနှင့် စစ်ဘေးရှောင်စခန်းများတွင် နှစ်စဉ်နွေရာသီ သောက်သုံး ရေရှားပါးမှု ဒဏ်ကို ကြုံတွေ့နေရပြီး မသန့်ရှင်းသည့် သောက်သုံးရေများကို သောက်သုံးရခြင်းကြောင့် ကလေးသူငယ်အများစုမှာ ဝမ်းရောဂါဖြစ်ပွားမှု၊ အဖုအပိန့်ယားနာများပေါက်ရောက်ပြီး သေဆုံးမှုများလည်းဖြစ်လေ့ရှိသည်ဟု စစ်ရှောင်စခန်းတာဝန်ရှိသူများက ပြောကြသည်။

စစ်ကောင်စီသည် ၂၀၂၂ ခုနှစ်အတွင်း ရခိုင်မှ သဘာ၀ဓာတ်ငွေ့ အမေရိကန်ဒေါ်လာ  ၁ ဒဿမ ၄၃ ဘီလီယံဖိုးထိ တရုတ်ကို ရောင်းချခဲ့သော်လည်း  ၎င်းငွေများကို ရခိုင်ပြည်နယ်ဖွံ့ဖြိုး တိုးတက်ရေးအတွက် ခွဲဝေသုံးစွဲခြင်းမရှိသလို လူနေမှုဘ၀ မြင့်မားအောင် ဆောင်ရွက်မှုလည်း တစ်စုံတစ်ရာ မရှိသည့်အတွက် ရခိုင်ပြည်နယ်သည်  နွေဆိုလျှင် ရေရှားပြီး  လျှပ်စစ်မီးလည်း အနည်းဆုံး သုံးစွဲနေရသည့် ပြည်နယ်တစ်ခုဖြစ်နေကြောင်း သိရှိရသည်။ (NN-23 / NN-7)