နိရဉ္စရာ၊ ဖေဖော်ဝါရီ ၂၁/ ၂၀၂၃

ရက္ခိုင့်တပ်တော်(AA)နှင့်ဆက်စပ်သည်ဟုဆိုကာ ရေတပ်သင်္ဘောပေါ်နှိပ်စက်ခံ၇ပြီးထောင်ဒဏ် ၃ နှစ် မတရားချမှတ်ခံခဲ့ရသည့် ရခိုင်ပြည်နယ်၊ ပုဏ္ဏားကျွန်းမြို့နယ်၊ကျောက်ဆိပ်ကျေးရွာမှ ရွာသား (၅)ဦးသည် လွတ်ရက်စေ့၍ ယနေ့နံနက်တွင်လွတ်မြောက်လာကြပြီဟု သိ၇သည်။

ယနေ့လွတ်မြောက်လာသူများမှာကိုညီညီအောင် (၂၄) နှစ်၊ ကိုမျိုးလှိုင်ဦး (၂၄) နှစ်၊ ကိုမောင်ချေ(၂၄) နှစ်၊ကိုမင်းစိုး (၃၈) နှစ်နှင့် ကိုကျော်ဝင်းဟိန်း (၂၂)နှစ်တို့ဖြစ်သည်။

သူတို့ကို ယနေ့ ဖေဖော်ဝါရီလ ၂၁ရက်၊ နံနက် ၉ နာရီကျော်တွင် စစ်တွေအကျဉ်းထောင်မှ လွှတ်ပေးကာစစ်တွေမြို့မရဲစခန်းသို့ ယူဆောင်သွားပြီး နံနက် ၁၀ နာရီခန့်တွင်စစ်တွေမြို့မရဲစခန်းမှတဆင့် လွှတ်ပေးလိုက်ခြင်းဖြစ်သည်။ 

သူတို့သည် AA နှင့်ဆက်စပ်သည်ဟုဆိုကာ မဟုတ်မမှန်ဘဲစစ်တပ်၏မတရားစွပ်စွဲမှုကြောင့် စစ်တွေအကျဉ်းထောင်တွင် ၃ နှစ်တိုင်တိုင်ထောင်ဒဏ်ချမှတ်ခံခဲ့ရမှုကြောင့် ၎င်းတို့၏ လူမှုစီးပွားရေးအဖက်ဖက်နစ်နာမှုများဖြစ်ခဲ့၇သည်ဟု လွတ်မြောက်လာသည့် ကိုညီညီအောင်က မီဒီယာများကိုပြောသည်။

“မဟုတ်မမှန်ဘဲနဲ့ပေးဆပ်ခဲ့ရတာကိုတော့ ဝမ်းနည်းမိတယ်။ ဒါပေမဲ့ ကိုယ့်လူမျိုးအတွက်ကိုယ်ပေးဆပ်ခဲ့၇တာကိုတော့ ဂုဏ်ယူပါတယ်”ဟု ပြောသည်။

 သူတို့ ၅ ဦးအပါအဝင်ကျောက်ဆိပ်ကျေးရွာမှ လူပေါင်း ၃၈ ဦးသည် ပြီးခဲ့သည့် ၂၀၂၀ ပြည့်နှစ်၊ ဧပြီလ ၁၉ရက်တွင် စစ်တပ်၏ဖမ်းဆီးခြင်းကို ခံခဲ့၇ပြီး ယင်းအထဲမှ (၃၃) ဦး ပြန်လည်လွတ်ပေးခဲ့သော်လည်း သူတို့ ၅ ဦးကို လွှတ်ပေးခဲ့ခြင်းမရှိဘဲ ရေတပ်သင်္ဘောပေါ်တွင်အကြီးအကျယ် ညှဉ်းပမ်း နှိပ်စက်ကာ နောက်ပိုင်းတွင် ရက္ခိုင့်တပ်တော်(AA)နှင့် ဆက်စပ်သံသယဖြင့် အမှုဖွင့်တရားစွဲဆိုခဲ့သည်။

သူတို့ကို စစ်ကောင်စီတပ်ကဗိုလ်ကြီးတင့်နိုင်ထွန်းက အကြမ်းဖက်မှု တိုက်ဖျက်ရေး ဥပဒေပုဒ်မ ၅၀(ည)၊ ၅၂(က)ဖြင့်တရားလိုလုပ်ကာ တရား စွဲဆိုခဲ့ခြင်း ဖြစ်သည်။

အမှုကို ၂ နှစ်ကျော်အကြာစစ်တွေထောင်ထဲမှ ရင်ဆိုင်ခဲ့၇ပြီး ပြီးခဲ့သည့် ၂၀၂၂ ခုနှစ်၊ ဇူလိုင်လ ၆ ရက်တွင်စစ်တွေခရိုင်တရားသူကြီးက အကြမ်းဖက်မှု တိုက်ဖျက်ရေးဥပဒေပုဒ်မ ၅၂ (က)ဖြင့် ထောင်(၃) နှစ်ချမှတ်ခဲ့ခြင်းဖြစ်သည်။ (NN-8)

Photo - Narinjara and Wai Hun Aung