စစ်တွေတွင် ယနေ့ နံနက်က နှင်းများ ဆိုးဝါးစွာကျဆင်းခဲ့၍ ရန်ကုန်-စစ်တွေလေယာဉ်ခရီးစဉ်အားလုံး အချိန်ရွေ့ဆိုင်းခဲ့ရ

နိရဉ္စရာ၊ ဖေဖော်ဝါရီ ၂၁/၂၀၂၂

ရခိုင်ပြည်နယ်၊ စစ်တွေမြို့တွင် ယနေ့နံနက်အစောက နှင်းများထူထပ်စွာကျဆင်းနေမှုကြောင့် နံနက်ပိုင်းထွက်ခွာမည့် ရန်ကုန်-စစ်တွေလေယာဉ်ခရီးစဉ်အားလုံးကို အချိန်ရွေ့ဆိုင်းခဲ့ရသည်ဟု ခရီးသည်များက ပြောသည်။

ယနေ့ ဖေဖော်ဝါရီလ ၂၁ ရက်၊ နံနက်အစောပိုင်းတွင် စစ်တွေမြို့၌ နှင်းများ ဆိုးဝါးစွာ ထူထပ်ကျဆင်းနေသည့်အတွက် ရန်ကုန်အပြည်ပြည်ဆိုင်ရာလေဆိပ်မှတဆင့် ယနေ့နံနက်ပိုင်းကထွက်ခွာမည့် ရန်ကုန်-စစ်တွေလေယာဉ်ခရီးစဉ်များအားလုံးကို နံနက် ၁၀ နာရီမှ စတင်ထွက်ခွာရန် အချိန်ရွေ့ဆိုင်းလိုက်ရခြင်းဖြစ်သည်ဟု လေယာဉ်စီး ခရီးသည်းများက နိရဉ္စရာကို ပြောသည်။

စစ်တွေမှ ရန်ကုန်သို့လိုက်ပါမည့် လေယာဉ်စီးခရီးသည်တစ်ဦးက “ဒီနေ့က ရာသီဥတုဆိုးရွားတယ်ပြောရမလားပဲ။ နှင်းတွေတအားကျတယ်။ မိုးမှုန်တွေကျသလိုမျိုးကို ကျနေတာ။ ရန်ကုန်လေဆိပ်က အသိတစ်ယောက်ဆီ ဖုန်းဆက်မေးကြည့်တော့ နှင်းတွေကျနေတယ်။ Weather က မကောင်းလို့ ရန်ကုန်လေဆိပ်ကနေ စစ်တွေကိုထွက်ခွာလာမဲ့အချိန်ကို ရွေ့ဆိုင်းလိုက်ရတယ်လို့သိရတယ်” ဟု ပြောသည်။

နှင်းများထူထပ်စွာကျဆင်းနေ၍ လေယာဉ်ခရီးစဉ်များအချိန်ရွေ့ဆိုင်းလိုက်ရခြင်းမှာ ခရီးသည်များ၏ အသက်အန္တရာယ်လုံခြုံရေးနှင့် ခရီးသည်များ အန္တရာယ်ကင်းကင်းဖြင့် လိုက်ပါစီးနင်းနိုင်ရန်ဖြစ်သည်ဟုလည်း စစ်တွေလေဆိပ်မှ တာဝန်ရှိသူတစ်ဦးက နိရဉ္စရာကို ပြောသည်။

“Weather ကမကောင်းတော့ လေယာဉ်အထက်မှာပျံသန်းရာမှာလည်း စိုးရိမ်မှုတွေရှိနိုင်တယ်။ နှင်းတွေတအားကျနေလို့လေ။ ပြေးလမ်းနဲ့လွဲချော်သွားတာတွေလည်း ရှိချင်ရှိနိုင်မယ်။ ဒါကြောင့်မလို့ ရန်ကုန်လေဆိပ်က ၁ဝ နာရီလောက်မှ စထွက်ရင် စစ်တွေကို ၁၁ နာရီလောက် လေယာဉ်ဆိုက်မယ်။ အဲ့ကလေယာဉ်ဆိုက်မှ ဒီကထွက်ခွာရမှာပါ” ဟု ပြောသည်။

ယင်းအပြင် နောက်ထပ်ခရီးသည်တစ်ဦးကလည်း ရာသီဥတုကြောင့် လေယာဉ်ခရီးစဉ်များအချိန်ရွေ့ဆိုင်းလိုက်ရခြင်းအပေါ် နားလည်ပေးနိုင်သည်ဟု ပြောသည်။

“အချိန်ရွေ့ဆိုင်းလိုက်တာက အဓိကမဟုတ်ပါဘူး။ အဓိကက အန္တရာယ်ကင်းကင်းနဲ့လိုက်ပါစီးနင်းရဖို့ပဲဖြစ်ပါတယ်။ အချိန်နောက်ကျသွားလို့တော့ ဘာမှမဖြစ်ပါဘူး” ဟု ပြောသည်။

စစ်တွေအပါအဝင် ရခိုင်မြို့အချို့တွင် ယခုရက်ပိုင်းအတွင်း နံနက်အစောပိုင်းတွင် နှင်းများထူထပ်စွာကျဆင်းနေမှုကြောင့် ကုန်းလမ်း၊ ရေလမ်းခရီး ယာဉ်မောင်းသူများအနေဖြင့်လည်း သတိဝိရိယဖြင့် မောင်းနှင်ရန်လိုအပ်သည်ဟု ဒေသခံများက ပြောသည်။ (NN-12)

ဓာတ်ပုံ - ယနေ့နံနက်ပိုင်းက စစ်တွေလေဆိပ်အတွင်း နှင်းများ ထူထပ်စွာကျဆင်းနေသည်ကို မြင်တွေ့ရစဉ်။