ဖေဖော်ဝါရီ ၂၁/၂၀၂၃
Facebook နှင့် Instagram
အသုံးပြုသူများ အပြာရောင်အသိအမှတ်ပြု
အမှတ်အသားကို ဝယ်ယူသုံးစွဲနိုင်ပြီဟု မိခင်ကုမ္ပဏီ Meta က ထုတ်ပြန်ကြေညာလိုက်သည်။
Meta အသိအမှတ်ပြု အပြာရောင် အမှတ်အသားရရှိရန် ပုံမှန်အသုံးပြုသူများက တစ်လ အမေရိကန်ဒေါ်လာ(၁၁.၉၉) နှင့် iPhones အသုံးပြုသူများက (၁၄.၉၉)ဒေါ်လာ ပေးသွင်းရမည်ဟု သိရသည်။
ဩစတြေးလျ နှင့် နယူးဇီလန်နိုင်ငံများတွင် ယခုတစ်ပတ်အတွင်း စတင်အသုံးပြုနိုင်မည်ဖြစ်ပြီး အခြားနိုင်ငံများ လောလောဆယ် မရရှိနိုင်သေးဟုဆိုသည်။
Meta ကုမ္ပဏီ၏ စီအီးအို မာ့ခ် ဇူကာဘတ်က ယခုလုပ်ဆောင်ချက်မှာ Facebook နှင့် Instagram တို့၏ လုံခြုံရေးကို ပိုမိုတိုးမြှင့်စေရန် နှင့် စစ်မှန်စိတ်ချရသော ဆိုရှယ်မီဒီယာ အက်ပလီကေးရှင်းတစ်ခု ဖြစ်လာစေရန် ရည်ရွယ်သည်ဟုဆိုသည်။
ပြီးခဲ့သည့် ၂၀၂၂ခုနှစ်၊ နိုဝင်ဘာလက Twitter ကုမ္ပဏီပိုင်ရှင် အီလွန်မတ်စ်က ၄င်း၏ twitter အပြာရောင်အမှတ်အသားကို သုံးစွဲသူများက ဝယ်ယူနိုင်ကြောင်း ကြေညာခဲ့ပြီးနောက် ဇူကာဘတ်က ယခုအစီအစဉ်ကို စတင်ကြေညာလာခြင်းဖြစ်သည်။
Meta အသိအမှတ်ပြု အပြာရောင်အမှတ်အသား ဝယ်ယူခြင်းကို စီးပွါးရေးလုပ်ငန်းများ မရရှိနိုင်သေးဘဲ တစ်ဦးချင်းအသုံးပြုသူများသာ လျှောက်ထားရယူနိုင်မည်ဟုသိရသည်။
အပြာရောင် အမှန်ခြစ် အမှတ်အသားပါရှိသော Facebook နှင့် Instagram အကောင့်မှာ စစ်မှန်ပြီး အဆင့်မြင့် တရားဝင်အသိအမှတ်ပြုခံရသော အကောင့်အဖြစ် လက်ခံကြသည်။
လစဉ်ကြေးပေး၍ လျှောက်ထားသူများသည် Meta က အသိအမှတ်ပြုသည့်
အပြာရောင် အမှန်ခြစ်အမှတ်အသား ရရှိမည်ဖြစ်ပြီး မိမိ၏ ပို့စ်အား မြင်တွေ့နိုင်မှု
ပိုမိုများပြားလာစေမည်ဖြစ်သလို အခြားသူတစ်ဦးဦးက မိမိအကောင့်အား
ဝင်ရောက်နှောက်ယှက်ခြင်းမပြုနိုင်သည့်အပြင် စီးပွါးရေးလုပ်ငန်းများနှင့်
ချိတ်ဆက်ရာတွင် ပိုမိုလွယ်ကူချောမွေ့မှု ရရှိလာစေမည်ဟုလည်း ဆိုသည်။
ref: Reuters