- Web Master
- ၁၇ မေ ၂၀၂၄
သူ့အိတ်ထဲက “ကျနော် မြန်မာနိုင်ငံသား တစ်ယောက်ပါ။ ကျနော် လိပ်စာမရှိပါ။ စားစရာ နေစရာလည်း မရှိပါ။ စားစရာ နည်းနည်းကျွေးလို့ရမလား” စာတစ်စောင်တွေ့ရှိ
နိရဥ္စရာ၊ ဖေဖော်ဝါရီ ၂၂/ ၂၀၂၃
ထိုင်းနိုင်ငံ၊ နခွန်ပထုံခရိုင်၊ ဘန်လင်းမြို့နယ်ရှိ ရေမြောင်းအတွင်းကနေ ရခိုင်အမျိုးသားတစ်ဦး၏ သေဆုံး ရုပ်အလောင်းကို တွေ့ရှိခဲ့ကြောင်း ထိုင်းဒေသသတင်းဌာနများနှင့် မြန်မာရွှေ့ပြောင်း အလုပ်သမားများထံကသိရှိ ရသည်။
“သေဆုံးရုပ်အလောင်းဆယ်ယူပြီးတော့ သူ့အိတ်တွေ့တယ်လေ။ သူ့အိတ်ထဲက သူ့မှတ်ပုံတင်မှာ လူမျိုးက ရခိုင်လို့ ရေးထားတော့ ရခိုင်လူမျိုးပဲပေါ့။ အလုပ်မရှိ စိတ်ဓာတ်ကျပြီး သေတာလား။ ဘယ်လို သေတာလဲတော့ မသိရသေးဘူး” ဟု ထိုင်းနိုင်ငံရောက်ရွှေ့ပြောင်းလုပ်သား တစ်ဦးက ပြောသည်။
၎င်း သေဆုံးရုပ်အလောင်းကို ဖေဖော်ဝါရီ ၂၀ ရက်နေ့ ထိုင်းစံတော်ချိန် နံနက် ၁၁ နာရီခန့်တွင် ရေမြောင်းဘေးနား ကမ်းစပ်၌ မှောက်လျက်မျောနေသည်ကို အမျိုးသမီး တစ်ဦးကစတင်တွေ့ရှိခဲ့ပြီး သက်ဆိုင်ရာ အာဏာပိုင်တွေကို ဆက်သွယ်အကြောင်းကြားခဲ့ခြင်းဖြစ်ကြောင်း ထိုင်းသတင်းဌာနများ၏ ဖော်ပြချက်အရ သိရှိရသည်။
သေဆုံးသူသည် ဘောင်းဘီတို၊ တီရှပ်အပြာရောင်ဝတ်ဆင်ထားပြီး လွယ်အိတ် (၁)လုံး လွယ်ထားကြောင်း သိရှိရသည်။
လွယ်အိတ်အတွင်းမှ နိုင်ငံသားစစ်ဆေးရေးကတ်ပြားနှင့် အခြား ကတ်ပြား (၂)ခုကိုတွေ့ရှိခဲ့ပြီး မြန်မာနိုင်ငံသားစစ် ဆေးရေးကတ်ပြားတွင် အမည် - မောင်သန်းရွှေ၊ အဖအမည် - ဦးမောင်ကျန်ထွန်း၊ လူမျိုး/ဘာသာ - ရခိုင် /ဗုဒ္ဓဘာသာဟု ဖော်ပြထားကြောင်းတွေ့ရှိရသည်။
၎င်းအပြင် “ကျနော် မြန်မာနိုင်ငံသား တစ်ယောက်ပါ။ ကျနော် လိပ်စာမရှိပါ။ စားစရာ နေစရာလည်း မရှိပါ။ စားစရာ နည်းနည်းကျွေးလို့ရမလား၊ ထိုင်းစကားလည်း ကျနော် မပြောတက်ပါ။ ကျနော်ကို သနားပါ။ စားစရာနဲ့ ရေ ရနိုင်မလား”ဟု ထိုင်းဘာသာဖြင့်ရေးသားထားသည့် စာတစ်စောင်ကိုလည်း တွေ့ရှိခဲ့ကြောင်း သိရှိရသည်။
သေဆုံးမှုနှင့် ပတ်သက်ပြီး ထိုင်း ဒေသအာဏာပိုင်များမှ စစ်ဆေးမှုများပြုလုပ်ခဲ့ပြီး Nakhon Pathom ဆေးရုံသို့ ပို့ဆောင် စစ်ဆေးမှုများ ဆက်လက်ပြုလုပ်နေကြောင်း သိရှိရသည်။
(NN – 25)
ဓာတ်ပုံ - သေဆုံးရုပ်အလောင်း (Prayun Noibuangam)