(၎င်းကားလမ်းပိတ်ထားခြင်းမှာ ဒေသခံပြည်သူများသွားလာရေး ဒုက္ခရောက်ရန် စစ်ကောင်စီက တမင်ရည်ရွယ်ပုံ၇)

 နိရဥ္စရာ၊ဖေဖော်ဝါရီ ၂၅/ ၂၀၂၃

ဒေသခံပြည်သူများအတွက် ခရီးသွားလာရေးနှင့် ကူးသန်းရောင်းဝယ်ရေးအတွက် အရေးပါသည့်ကားလမ်းတစ်ခု ဖြစ်သည့် ၇သေ့တောင်-ပုဏ္ဏားကျွန်းကားလမ်းကိုစစ်ကောင်စီက ပိတ်ထားသည်မှာ (၉) လကျော် ရှိလာပြီဖြစ်ကာ ဒေသတည်ငြိမ်အေးချမ်းနေပြီဖြစ်၍ ၎င်းလမ်းကို ပြန်ဖွင့်ပေးရန်ဒေသခံများ ထပ်မံတောင်းဆိုနေကြကြောင်းသိ၇သည်။

ရခိုင်တွင်ရက္ခိုင့်တပ်တော်(AA)နှင့်အာဏာသိမ်းစစ်ကောင်စီတပ်တို့ တကျော့ပြန် တိုက်ပွဲ ဖြစ်ပွားခဲ့သည့် ၂၀၂၂ ခုနှစ် ၊ဇွန်လကပင် စတင်ပြီး ၇သေ့တောင်-ပုဏ္ဏားကျွန်းကားလမ်းကိုစစ်ကောင်စီတပ်က ပိတ်ထားခဲ့ရာ လက်ရှိတွင် ၉ လကျော်ထိကြာမြင့်နေပြီဖြစ်သည်။

ဒေသအတွင်း ပြည်သူများမှာ အဆိုပါကားလမ်းကိုပိတ်ထားသဖြင့် စစ်တွေမြို့သို့ သွားရောက်ရာတွင် ကုန်းတစ်တန်၊ ရေတစ်တန်သွားလာနေရသဖြင့်အချိန်ပိုကုန်ပြီး ငွေကြေးလည်း မလိုအပ်ဘဲ ကုန်ကျနေ၇သည်ဟု ဒေသခံများက ပြောဆိုသည်။

ဒေသခံ တစ်ဦးက “ အခုကနယ်မြေလည်း ငြိမ်းချမ်းနေပြီ။ စစ်တပ်နဲ့ အေအေ အကြားမှာလည်း ပြေလည်မှုတွေ ရှိနေပြီ။အခုလို အခြေအနေ မျိုးမှာ ဒီကားလမ်းပိတ်ထားတာက ဒေသခံပြည်သူတွေ သွားလာရေးဒုက္ခရောက်ရုံကလွှဲပြီး ဘာမှ အကျိုးမထူးဘူး” ဟုပြောဆိုသည်။

ပြီးခဲ့သည့် ၂၀၂၂ခုနှစ်၊ နိုဝင်ဘာလကပင် နှစ်ဘက်အပစ်အခတ်ရပ်စဲထားပြီး ပိတ်ထားသည့်လမ်းများကိုစစ်ကောင်စီက ပြန်ဖွင့်ပေးခဲ့သော်လည်း အဆိုပါ၇သေ့တောင်-ပုဏ္ဏားကျွန်းကားလမ်းကိုမူစစ်ကောင်စီက ဆက်လက်ပိတ်ထားသည့်အတွက် အမြန်ဆုံးပြန်ဖွင့်ပေးရန် ဒေသခံများကတောင်းဆိုနေကြခြင်းဖြစ်သည်။

ယနေ့ ဖေဖော်ဝါရီလ ၂၄ရက်အထိ အဆိုပါလမ်းတွင် ကားများပြေးဆွဲခွင့်မရသေးကြောင်း ၇သေ့တောင်ဒေသခံကားသမားတစ်ဦးက ပြောသည်။

"ဒီနေ့အထိ ကားတွေသွားခွင့်မရသေးဘူး။ဘေးတွဲနဲ့ ဆိုင်ကယ်တွေတော့ သွားခွင့်၇တယ်။ ကားမမောင်းရတော့ကြုံရာအလုပ်လုပ်စားနေရတယ်" ဟု နိရဥ္စရာသို့ ပြောသည်။

ပြီးခဲ့သည့် ၂၀၂၂ခုနှစ်၊ ဇွန်လ ၁၆ ရက်က ပုဏ္ဏားကျွန်းမြို့မှ စစ်ကောင်စီတပ်သားတစ်ဦးကိုရက္ခိုင့်တပ်တော်(AA)ကဖမ်းဆီးခဲ့ပြီးသည့်နောက် ယင်းလမ်းကို စစ်ကောင်စီဘက်က စတင်ပိတ်ပင်ထားခဲ့ခြင်းဖြစ်ကြောင်းဒေသခံများက ပြောသည်။

အဆိုပါပုဏ္ဏားကျွန်း-ရသေ့တောင်ကားလမ်းကာလရှည်ကြာပိတ်ထားသည့်အတွက် ဒေသတွင်း ကုန်စည်သယ်ယူပို့ဆောင်ရေးအခက်အခဲများရှိနေသကဲ့သို့ယင်းကားလမ်းကြားရှိကျေးရွာပေါင်း ၇၀ နီးပါးမှ ဒေသခံများ၏ ဆေးဝါးကုသရေးနှင့်အရေးပေါ်ပို့ဆောင်မှုများအတွက် ခက်ခဲနေကြောင်း နောက်ထပ် ၇သေ့တောင်ဒေသခံတစ်ဦးကပြောသည်။

"တပြည်လုံးကလမ်းတွေဖွင့်ပြီးတော့ ဒီလမ်းကျတော့သွားခွင့်မ၇သေးဘူး။အမြန်ဆုံး ပြန်ဖွင့်ပေးဖို့ တောင်း ဆိုပါတယ်။လမ်းပိတ်ထားတော့ ကုန်သည်တွေနဲ့ ကားသမားတွေလည်း အခက်အခဲ ဖြစ်နေတယ်။ ပြီးတော့ ကျနော်တို့ဒေသခံတွေ မကျန်းရေးမာရေးအရေးပေါ်ဆေးကုဖို့လည်းခက်တယ်။လူနာတွေဘာတွေ စစ်တွေဆေးရုံပို့မယ်ဆိုရင် ကားလမ်းကဆိုရင်သိပ်မကြာဘူးလေ"ဟု ပြောသည်။

ယခင်က အဆိုပါကားလမ်းတွင်လေးဘီးယာဉ်အစီး ၃၀ ဝန်းကျင်လောက် ပြေးဆွဲခဲ့ကြကြောင်း၊ လက်ရှိတွင်ကားလမ်းကိုပိတ်ထားသည့်အတွက် ယာဉ်ပိုင်ရှင်အများစုမှာ အလုပ်အကိုင်ရှားပါးပြီးပြည်ပသို့ ထွက်ခွာ အလုပ်လုပ်သွားကြသည်ဟု ပုဏ္ဏားကျွန်း-၇သေ့တောင်ကားလမ်းတွင်ပြေးဆွဲခဲ့သည့် ဒေသခံကားသမားတစ်ဦးက ပြောသည်။

"စစ်တပ်က ဘာကြောင့်ဒီလမ်းပိတ်ထားတယ်ဆိုတာကျွန်တော်တို့နားမလည်ဘူး။ မသုံးသပ် တတ်ပါဘူး။ ဒီလောက် အလုပ်အကိုင်ကျပ်ပြီးလူတွေ ဒုက္ခရောက်နေတဲ့ အချိန်မှာ ဒေသခံပြည်သူတွေ စားဝတ်နေရေး ရှောင်လည်ဖို့  ဒီကားလမ်းကိုတော့ ဖွင့်ပေးသင့်တာပေါ့။ ခုလိုပိတ်ထားတော့ ကျနော်တို့တွေ အတွက် အလုပ်အကိုင်တွေရှားနေတယ်" ဟုပြောသည်။

အဆိုပါပုဏ္ဏားကျွန်း-၇သေ့တောင် ကားလမ်းပေါ်တွင် စစ်ကောင်စီကဂိတ်သုံးခုဖြင့် ပိတ်ဆို့ထားခဲ့ခြင်းဖြစ်ပြီး ယင်းဂိတ်များမှာ လက်ဝဲစာတိုက်ဂိတ်၊ပေါက်တောပြင်ဂိတ်၊ ဖက်ကျကျေးရွာနှင့် ပိန္နဲတောကျေးရွာကြားဂိတ်တို့ဖြစ်ကြောင်း ဒေသခံများက ပြောသည်။ (NN-23)