မြေပုံ ကမ်းထောင်းကြီးမြို့တွင် နေအိမ် ၁ လုံး ဓားပြခံရပြီး အိမ်ပိုင်ရှင်ပါ အသတ်ခံရ

နိရဥ္စရာ၊ ဖေဖော်ဝါရီ ၂၅ / ၂၀၂၃

ရခိုင်ပြည်နယ်၊ မြေပုံမြို့နယ်၊ ကမ်းထောင်းကြီးမြို့၊ တောင်ပိုင်းရပ်ကွက်တွင် ညဉ့်အချိန်နေအိမ်အတွင်း ဝင်ရောက်ဓားပြတိုက်ပြီး အိမ်ပိုင်ရှင်ကိုသတ်ဖြတ်ခဲ့၍ သေဆုံးမှုဖြစ်ပွားခဲ့ကြောင်း သတင်းရရှိသည်။

ထိုသို့ ဓားပြတိုက်သတ်ဖြတ်ခံရ၍ သေဆုံးခဲ့သူမှာ တောင်ပိုင်းရပ်ကွက်မှ မြတ်နိုးသူမိတ်ကပ်နှင့် အလှပြင်ဆိုင်ပိုင်ရှင်လည်းဖြစ်၊ မင်္ဂလာပွဲနှင့်ရှင်ပြုပွဲစသည့် ပွဲအခမ်းအနားပြင်ဆင်သည့်လုပ်ငန်းပိုင်ရှင် အသက် ၅၀ ကျော်အရွယ် ဦးမောင်မောင်တင်ဖြစ်ကြောင်း မြို့ခံများက ပြောသည်။

၄င်းနေအိမ်အတွင်း သေဆုံးနေသည်ကို ယနေ့ ဖေဖော်ဝါရီလ ၂၅ ရက်၊ နံနက်ပိုင်းက အလှပြင်ဆိုင်တွင် အလုပ်လုပ်နေသည့်ဝန်ထမ်းအမျိုးသမီးငယ် ဆိုင်လာဖွင့်စဉ် တွေ့ရှိခဲ့ခြင်းဖြစ်ကြောင်း ရပ်ကွက်သားတစ်ဦးက ပြောသည်။

"ကျွန်တော်တို့လည်း ဘယ်အချိန်ဖြစ်သွားတယ်ဆိုတာ အတိအကျမသိရသေးဘူး။ သူ့မှာ အိမ်နဲ့ တွဲပြီးတော့ အလှပြင်ဆိုင်ဖွင့်ထားတယ်။ ဒီနေ့မနက်က သူ့ဆိုင်မှာ လုပ်တဲ့ကောင်မလေးက ဆိုင်ဖွင့်ချိန်လာတော့မှ သေနေတာတွေ့တာလို့ သိရတယ်" ဟု ပြောသည်။

ယင်းသို့ သတ်ဖြတ်ခံရမှုမှာ ယမန်နေ့ ဖေဖော်ဝါရီလ ၂၄ ရက်၊ ညဉ့်အချိန်နှင့် မနက်အစောကြီးတွင် ဖြစ်နိုင်ကြောင်းလည်း သူက ပြောသည်။

"သူက တစ်ယောက်တည်းနေပြီး LGBT တယောက်ပါ။ သူ့မှာက အလှပြင်လုပ်ငန်းလည်းရှိတော့ ဝင်ငွေကောင်းပြီး ငွေတွေကြေးတွေရှိတယ်။ ပြီးရွှေတွေဘာတွေလည်း အသင့်အတင့်ရှိနိုင်ပါတယ်။ အဲဒါတွေကို ဓားပြတိုက်ဖို့လာရင်း သတ်ဖြတ်ခံရတာဖြစ်နိုင်တယ်" ဟု ဆက်ပြောသည်။

သူသေဆုံးမှုနှင့်ပတ်သက်ပြီး ယနေ့မနက်ပိုင်းက အခင်းဖြစ်ပွားရာနေအိမ်သို့ ရဲများကသွားရောက် စစ်ဆေးချိန် နေအိမ်ခြံဝတွင် အမျိုးသားစီးဖိနပ်တစ်ရံတွေ့ခဲ့သည်ဟု ကြားသိရကြောင်း သူက ပြောသည်။

အဆိုပါကိစ္စနှင့်ပတ်သက်၍ မည့်သည့်ပစ္စည်းများ ဓားပြတိုက်ခံရပြီး မည်သို့သတ်ဖြတ်ခံခဲ့ရသည်ကို အသေးစိတ်သိရှိနိုင်ရန် တောင်ပိုင်းရပ်ကွက်အုပ်ချုပ်ရေးမှူး ဦးစံသန်းဝင်းကို နိရဥ္စရာက အကြိမ်ကြိမ် ဆက်သွယ်ခဲ့သော်လည်း မအားသေးဟုဆိုကာ ဖုန်းပြန်ချသွားခဲ့သည်။

ဆက်လက်ပြီး ကမ်းထောင်းကြီးရဲစခန်းမှ  ဗိုလ်လေးနိုင်ဝင်းအား ဆက်သွယ်ခဲ့သော်လည်း အဆက်သွယ်မရရှိသည့်အတွက် အသေးစိတ်ကို မသိရှိနိုင်သေးပေ။

ယခုကဲ့သို့ ခိုးဆိုးလုယက်မှုနှင့် ဓားပြတိုက်သတ်ဖြတ်မှုများမှာ ပြည်နယ်မြို့တော်စစ်တွေ၊ သံတွဲ၊ တောင်ကုတ်နှင့် မြို့နယ်တချို့တွင် ခပ်စိပ်စိပ်ဖြစ်ပွားလာနေသည့်အတွက် ရပ်ကွက်နှင့်ကျေးရွာများတွင် ကိုယ်ထူကိုယ်ထ ကင်းစောင့်မှုများပြုလုပ်နေကြရကြောင်း ဒေသခံများက ပြောသည်။

ထိုသို့ ခိုးမှု၊ လုယက်မှု၊ ဓားပြမှု၊ လူသတ်မှုများ တစ်နေ့တစ်ခြားတိုးပွားလျက်ရှိပြီး ပြည်နယ်အစိုးရအဖွဲ့နှင့် ရဲတပ်ဖွဲ့တို့ကလည်း စုံစမ်းဖော်ထုတ်အရေးယူနိုင်မှု အားနည်းလျက်ရှိပြီး သက်ဆိုင်ရာမြို့နယ်များမှ ရဲတပ်ဖွဲ့ကလည်း ထိုအမှုများကို အရေးတယူဖော်ထုတ်အရေးယူမှုများမပြုလုပ်သည့်အတွက် ပြည်သူများမှာ အလွန်တရာ စိုးရိမ်မကင်းနေထိုင်နေကြရသည်ဟု  မြို့ခံများက နိရဥ္စရာသို့ ပြောသည်။ (NN-23)