စစ်ကောင်စီဥက္ကဋ္ဌ စစ်တွေကိုရောက်မည်ဟုသတင်းထွက် လုံခြုံရေးတင်းကျပ်ပြီး လမ်းဘေးစျေးဆိုင်များကိုပိတ်ခိုင်း၍ အခက်အခဲဖြစ်ကြရ

နိရဥ္စရာ၊ ဖေဖော်ဝါရီ ၂၆/ ၂ဝ၂၃

 စစ်ကောင်စီ ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် စစ်တွေမြို့သို့ ဖေဖော်ဝါရီ ၂၆ ရက်နေ့ တွင် ရောက်ရှိလာမည်ဟု သတင်းထွက်နေပြီး စစ်တွေမြို့နေရာအနှံ့အပြားကို လုံခြုံရေးတင်းကျပ်ထားကာ လမ်းဘေး စျေးဆိုင်များကိုလည်း ပိတ်ခိုင်းထားသဖြင့် တစ်နေ့ရောင်းမှ တစ်နေ့စားသောက်ကြရသည့် စျေးဆိုင် ဖွင့်လှစ်ရောင်းချသူများအနေဖြင့် အခက်ကြုံနေရသည်ဟု သိရသည်။  

 စစ်တွေ ဒေသခံတစ်ဦးက “ကျနော် နေ့လယ်က မြို့ထဲက လာတော့ မီးစက်လမ်းဆုံနားမှာရဲတွေ လက်နက်အပြည့်အစုံနဲ့ ရပ်နေတာတွေ့တယ်။ စစ်ကားတွေလည်း သွားနေကြတယ်။ ပုံမှန်နဲ့တော့ မတူဘူး။ ကြားတာက ဗိုလ်ချုပ်မှူးကြီး မင်းအောင်လှိုင် စစ်တွေကို လာမယ်လို့တော့ ကြားတယ်”ဟု ပြောသည်။

 စစ်တွေရှိ အထင်ကရနေရာများနှင့် လမ်းဆုံလမ်းခွများတွင် စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင်တို့က လုံခြုံရေးအထူးတင်းကျပ်ထားသည်ဟု မျက်မြင်များက ပြောသည်။

 ယင်းအပြင် စစ်တွေမြို့ လမ်းမကြီးများဘေးရှိ စျေးဆိုင်များကိုလည်း လူကြီးခရီးစဉ်ရှိ၍ ယာယီ ပိတ်ထားကြရန် မြို့နယ်စည်ပင်နှင့် ရဲတပ်ဖွဲ့က လာရောက်တားမြစ်မှုများလည်း ရှိနေသည်ဟုလည်း စျေးသည်များက ပြောသည်။

 “လမ်းဘေးက သစ်သီးဆိုင်တွေ၊ မုန့်တီဆိုင်တွေ၊ ဆေးရုံကြီးရှေ့က ဆေးဆိုင်တွေကအစ လမ်းတစ်လျှောက် အကုန်လုံး ပိတ်ခိုင်းထားပါတယ်။ ဒီနေ့လည်းပိတ်၊ မနက်ဖြန်လည်း ပိတ်ရမယ်ဆိုရင် တစ်နေ့လုပ်မှ တစ်နေ့စားရသူတွေအတွက် အခက်အခဲတွေတော့ ရှိနေပါတယ်”ဟု မုန့်ဆိုင်းရောင်းသူ တစ်ဦးက ပြောသည်။

ဗိုလ်ချုပ်မှူးကြီး မင်းအောင်လှိုင်သည် မနက်ဖြန် ဖေဖော်ဝါရီလ ၂၇ ရက်တွင် စစ်တွေရှိ ဦးဥတ္တမခန်းမ၌ ပြည်နယ်တွင်းရှိ စီးပွားရေးလုပ်ငန်းရှင်များနှင့်လည်း တွေ့ဆုံမည်ဟု သတင်းများထွက်ပေါ်နေသည်။

ယင်းကြောင့် ဦးဥတ္တမခန်းမတွင် ယနေ့မှစတင်ကာ ကြိုတင်ပြင်ဆင်မှုများပြုလုပ်နေ၍ လုံခြုံရေးကိုလည်း အထူးတင်းကျပ်ထားပြီး ပြည်သူများ ဝင်ထွက်သွားလာခွင့်ကို တားမြစ်ထားသည်ဟု မြို့ခံတစ်ဦးက ပြောသည်။

ယခုကိစ္စနှင့်ပတ်သက်ပြီး ရခိုင်ပြည်နယ်အစိုးရအဖွဲ့မှ ပြောခွင့်ရသူ ပြည်နယ်ဥပဒေချုပ်ဦးလှသိန်းကို ဆက်သွယ်ခဲ့သော်လည်း ဆက်သွယ်မရခဲ့သဖြင့် စစ်ကောင်စီဥက္ကဋ္ဌ မင်းအောင်လှိုင်ရောက်ရှိလာမည့် အပေါ် အတည်ပြုနိုင်ခြင်းတော့ မရှိသေးပါ။

ဗိုလ်ချုပ်မှူးကြီး မင်းအောင်လှိုင်သည် ပြီးခဲ့သည့် ဇန်နဝါရီလအတွင်းကလည်း ရခိုင်ပြည်နယ်၊ သံတွဲမြို့နယ်သို့ လာရောက်ခဲ့သေးသည်။

မြန်မာနိုင်ငံက အိမ်ရှင်အဖြစ် (၃)ရက်ကြာလက်ခံကျင်းပသည့် (၈)ကြိမ်မြောက် မြန်မာ-ထိုင်း တပ်မတော်နှစ်ရပ်အကြား အဆင့်မြင့်အရာရှိကြီးများအစည်းအဝေးကို ထိုင်းဘုရင့်တပ်မတော်ကာကွယ်ရေးဦးစီးချုပ် General Chalermphon Srisawasdi ဦးဆောင်သောအဖွဲ့နှင့်အတူ တက်ရောက်ရန် ရောက်ရှိခဲ့ခြင်းလည်းဖြစ်သည်။