မြန်မာတွင် နှစ်ဘက်ညှိနှိုင်းအဖြေရှာနိုင်မည့် နည်းလမ်းလည်းမရှိသေးကြောင်းကုလအထူးကိုယ်စားလှယ် နိုလင်းဟေဇာပြောကြား

(မြန်မာစစ်တပ်၏ ရက်စက်သော ဖိနှိပ်မှုများ နှင့် ပြည်သူများ၏ ကျယ်ပြန်သော ခုခံတော်လှန်မှုများကြောင့် မြန်မာနိုင်ငံ၌ ဖြစ်ပေါ်နေသော တိုက်ပွဲများ လျော့ကျသွားမည့် လက္ခဏာ မတွေ့ရသေး)

နိရဉ္စရာ၊ မတ် ၁၆/၂၀၂၃ (နိုင်ငံတကာ)

မြန်မာနိုင်ငံတွင် စစ်တပ်၏ ရက်စက်သော ဖိနှိပ်မှုများကြောင့် တစ်နိုင်ငံလုံးအတိုင်းအတာဖြင့် ပြည်သူများက ကျယ်ကျယ်ပြန့်ပြန့် ခုခံတိုက်ပွဲဝင်လျှက်ရှိရာ လက်ရှိဖြစ်ပေါ်နေသော ပစ်ခတ် သတ်ဖြတ်မှုများ၊ ရပ်ရွာလူနေအိမ်များအား မီးရှို့ဖျက်ဆီးမှု၊ ဗုံးကြဲမှု နှင့် အပြန်အလှန်တိုက်ပွဲများ လျော့ကျသွားမည့် လက္ခဏာ မမြင် မတွေ့ရသေးကြောင်း မြန်မာနိုင်ငံဆိုင်ရာ ကုလအထူးကိုယ်စားလှယ် နိုလင်းဟေဇာက မတ်လ(၁၅)ရက်က ပြုလုပ်သော ကုလသမဂ္ဂ အထွေထွေညီလာခံတွင် ပြောကြားလိုက်သည်။

အဖွဲ့ဝင်(၁၉၃)နိုင်ငံရှိ ကုလအထွေထွေညီလာခံ၌ နိုလင်းဟေဇာက မြန်မာနိုင်ငံတွင် ၂၀၂၁ခုနှစ်က စစ်တပ်က အာဏာသိမ်းလိုက်ချိန်မှ စ၍ အခြေအနေ ပိုမိုဆိုးရွားလာနေပြီး အကြမ်းဖက် တိုက်ခိုက်မှုများ ကြောက်ခမန်းလိလိ တိုးပွါးလာနေသည်ဟု ပြောကြားခဲ့သည်။

စစ်တပ်က ဖေဖော်ဝါရီလ(၁)ရက် အရေးပေါ်ကာလသက်တမ်းတိုးပြီး နောက်ပိုင်းမှစ၍ အရပ်သားပစ်မှတ်နှင့် လူနေအိမ်များကို ဗုံးကြဲတိုက်ခိုက်ခြင်းအပါအဝင် အင်အားသုံး ဖိနှိပ်များပိုမို ပြုလုပ်ပြီး အဆုံးစွန် လူ့အခွင့်အရေးချိုးဖောက်မှုများ ပြုလုပ်လာခဲ့သည်ဟု ဆိုသည်။

အထူးသဖြင့် ဖြတ် လေးဖြတ် စနစ် အသုံးပြု၍ ခုခံသူများနှင့် အရပ်သားများကို ဒဏ်ခတ်ခြင်းဖြစ်သည်။

 ဆယ်စုနှစ် ငါးစုကြာ တင်းကြပ်သော စစ်အုပ်ချုပ်မှုအောက်တွင် နေခဲ့ရသောမြန်မာနိုင်ငံတွင် စစ်တပ်၏ ဖြေလျှော့ပေးမှုဖြင့် ၂၀၁၅ခုနှစ်က ဒေါ်အောင်ဆန်းစုကြည်ဦးဆောင်သည့် အရပ်သားအစိုးရ ပေါ်ပေါက်လာခဲ့သော်လည်း ပြီးခဲ့သည့် နှစ် နှစ်က စစ်တပ်၏ တစ်ကျော့ပြန်အာဏာသိမ်းမှုနှင့်အတူ အတိုက်အခံတို့အား ရက်စက်စွာ နှိမ်နင်းမှု ပြုလုပ်လာခဲ့သည်။

ယခုအခါ တစ်ပြည်လုံးအတိုင်းအတာဖြင့် ပြည်သူများ၏ ခုံခံတော်လှန်မှုများကို စစ်တပ်က အလုံးအရင်းဖြင့် ထိုးစစ်ဆင်နွှဲနေရာ မြန်မာနိုင်ငံသည် ပြည်တွင်းစစ်နွံထဲ ကျရောက်နေပြီဟု အချို့က သုံးသပ်နေကြသည်။

နိုလင်းဟေဇာက ၂၀၁၅ခုနှစ်က နိုင်ငံ၏ ပွင့်လင်းလွတ်လပ်မှု အသီးအပွင့်များကို ခံစားခဲ့ရသော လူငယ်မျိုးဆက်များမှာ ယခုအခါ ကြမ်းတမ်းသောအခက်အခဲများ၊ မျှော်လင့်ချက်ပျောက်ဆုံးမှု နှင့်အတူ ရွေးချယ်စရာ မရှိတော့သည့်အဆုံး စစ်အာဏာရှင်စနစ်ကို တိုက်ဖျက်ရန် လက်နက်ကိုင်ရသည့် အခြေအနေသို့ ရောက်ရှိခဲ့ရသည်ဟု ဆိုသည်။

 နိုင်ငံအနှံ့ ပြင်းထန်သော တိုက်ပွဲများ ဖြစ်ပေါ်လာသည့်အတွက် ကုလသမဂ္ဂ လူသားချင်း အကူအညီအထောက်ပံ့ပေးရေး လုပ်ငန်းများကိုပင် မဆောင်ရွက်နိုင်ဟု နိုလင်းဟေဇာက ဆိုသည်။

ယခုအခါ တစ်နိုင်ငံးအနေနှင့် လူဦးရေ (၁၇.၆)သန်းမှာ အကူအညီ လိုအပ်လျှက်ရှိနေသည်။ ကုလသမဂ္ဂ အထွေထွေအတွင်းရေးမှူး ဂူတာရက်စ် က ပြည်သူများအနေနှင့် မိမိတို့၏ နိုင်ငံရေး ရပိုင်ခွင့်များကို ခြိမ်းခြောက်ဖိနှိပ်မှုမရှိ၊ လွတ်လပ်စွာ ကျင့်သုံး ဆောင်ရွက်ခွင့်မရဘဲ စစ်တပ်က ယခုနှစ်ကုန် ကျင်းပမည်ဆိုသော ရွေးကောက်ပွဲသည် အကြမ်းဖက်မှုကိုသာ ပိုမိုတိုးပွါးစေမည်ဟု နိုလင်းဟေဇာက ဆိုသည်။

 “ လူထုက လက်ရှိ စစ်ကောင်စီကို လုံးဝအယုံအကြည်မရှိဘူး။ စစ်တပ်ရဲ့ ရည်ရွယ်ချက်ကလည်း အရေးပေါ်အုပ်ချုပ်ရေးကနေ ရေရှည်စစ်တပ်ကျောထောက်နောက်ခံပြု အစိုးရအဖွဲ့တစ်ခု ဖြစ်ပေါ်လာဖို့ အာဏာကို အစွမ်းကုန်ချုပ်ကိုင်ဖို့ ကြိုးပမ်းနေတာပဲ ဖြစ်တယ်” ဟု နိုလင်းဟေဇာက ကုလသမဂ္ဂ အထွေထွေညီလာခံ မိန့်ခွန်းတွင် ပြောကြားခဲ့သည်။

NN- 27

Ref: Independent