မြောက်ဦးမြို့ရှိ လက်ဆည်ကန် ရေခမ်းခြောက်လာ၍ ပုံမှန်ရေပေးဝေနိုင်ခြင်းမရှိဟုဆို
နိရဥ္စရာ၊ မတ်၁၈/၂၀၂၃
၇ခိုင်ပြည်နယ်၊ မြောက်ဦးမြို့ရှိဗန္ဓုလရပ်ကွက်တွင်ရှိသော လက်ဆည်ကန်ရေသည် ယခုအခါ ခမ်းခြောက်လာ၍ ပုံမှန်ရေးပေးဝေနိုင်ခြင်းမရှိသဖြင့် စစ်ဘေးရှောင်စခန်းများအပါအဝင် ရပ်ကွက်တချို့ သောက်သုံးရေအခက်အခဲဖြစ်နေကြသည်ဟုမြို့ခံများက ပြောသည်။
မြောက်ဦးမြို့ ရေပေါက်၀ရပ်ကွက်မှ ဦးမောင်ညွန့်စိန်က“မနှစ်ကနေ ရေကစခမ်းလာတာ။ ကြာလာလို့ နွံတွေနဲ့ တိမ်ကော လာတာလည်း ဖြစ်နိုင်တယ်။ ရေသုံးများလာတာလည်းဖြစ်နိုင်တယ်။ ပြီးရင် ဒီနှစ်မိုးရာသီတုန်းက မိုးနည်းတာနဲ့လည်းဆိုင်တယ်။ အရင်နှစ်တွေကဆိုရင် လက်ဆည်ကန်မှာ တံတိုင်းက ရေတွေ လျှံကျတယ်။အခုဆိုရင် ရေလျှံမကျတော့ဘူး။ ပြန်တူးပေးဖို့လည်း လိုအပ်တာပေါ့ ”ဟု နိရဥ္စရာ သတင်းဌာနကိုပြောသည်။
၎င်းကန်သည် မြောက်ဦးမြို့နယ်ရှိတစ်မြို့လုံးကို နှစ်စဉ်နှစ်တိုင်း ရေပေးဝေနိုင်သော်လည်း ပြီးခဲ့သည့်နှစ်မိုးရာသီက မိုးနည်းခဲ့သလို ယခုအခါ ကန်လည်း တဖြည်းဖြည်းတိမ်ကောလာနေသည့်အတွက် ရေများခမ်းခြောက်လာခြင်းဖြစ်သည်
ယင်းသို့ ရေခမ်းခြောက်နေသည့်အတွက်ပြီးခဲ့သည့် ဖေဖော်ဝါရီလမှစတင်ကာ ၃ ရက်တွင် တစ်ကြိမ်သာ မြို့ကိုသောက်သုံးရေဖြန့်ဝေပေးနေ၇သည်ဟု ဆက်ပြောသည်။
ယင်းသို့ ၃ ရက်လျှင်တစ်ကြိမ်စီဖြန့်ဝေပေးနေရာတွင်
“ရေက မီးလာတဲ့အချိန်ပေးတော့လေ။မနက်လာချင်လာတယ်။ ညနေလာချင်လာတယ်။ ညဥ့်ဘက်လာချင်လာတယ်။ တော်တော်အခက်အခဲဖြစ်၇တယ်။ ချွေတာပြီးလည်း သုံးနေ၇တာပေါ့” ဟု ပြောသည်။
မြောက်ဦးမြို့တွင်ရှေးခေတ်က ရခိုင်ရှင်ဘုရင်လက်ထက်ကတည်းကပင် ရေတွင်း၊ ရေကန်များစွာ တူးဖော်ပြီးရှိခဲ့သော်လည်းလက်ဆည်ကန်ရေကို ပိုက်သွယ်၍ရရှိလာသည့်အချိန်ကပင် ၎င်းကန်ရေကိုသာအားကိုးပြီး သောက်သုံးနေ၇ခြင်းဖြစ်သည်ဟု မြို့ခံများက ပြောသည်။
ဗန္ဓုလရပ်ကွက်မှ ဒေါ်နွယ်ချေက“ ၃ ရက်နေမှ ရေလာတော့ရေပေးတဲ့အချိန်မှာ အုတ်ကန်တွေ၊ ပုံးကြီးတွေမှာထည့်ထားလိုက်တယ်။ အရင်လိုရေမကြည်တော့ဘူး။ အနည်တွေပါတယ်။ တစ်ညဥ့် သိပ်ထားပြီး သုံးနေတယ်” ဟု ပြောသည်။
လက်ဆည်ကန်သည် တောင်ဂျိုင်ကြားပတ်ပတ်လည်တွင်ရှိနေပြီး အခြားရေကန်အမျိုးအစားကဲ့သို့ လေးထောင့်ပုံသဏ္ဍာန်မျိုးမဟုတ်ဘဲ မြောင်ကဲ့သို့ ရှည်လျားသည့်သဏ္ဍာန်ရှိကြောင်း သိ၇သည်။
လက်ဆည်ကန်ရေသည် ယခင်က သုံးနှစ်သုံးမိုးမိုးခေါင်မည်ဆိုလျှင်လည်း မြောက်ဦးတစ်မြို့လုံးကို ရေပေးဝေနိုင်သောကြာင့်သောက်သုံး၍ မကုန်နိုင်သည့် ဆည်ဖြစ်သည်ဟုလည်း ရှေ့မီနောက်မီ လူကြီးတစ်ဦးက ပြောသည်။
“အရင်က တောင်ပေါ်မှာ ရေလှောင်ကန်၂ ကန်ရှိတယ်။ အဲ့ဒီရေလှောင်ကန်ကို လက်ဆည်ကန်က ရေဖြည့်ထားတယ်။အခုက တစ်မြို့လုံးကိုရေပေးဖို့စက်တင်အားက လိုက်မမှီဘူး။ ဒီအတွက် အခုလို အချိန်နဲ့ပေး၇တာ။ လက်ဆည်ကန်ကရေတစ်ခါမှမခမ်းဖူးဘူး” ဟုပြောသည်။
မြောက်ဦးတွင်သောက်သုံးရေအတွက် လက်ဆည်ကန်နှင့် တောင်ဖြူဆည်များမှ ရေကိုသာ အဓိက အားထားနေကြရသည်ဟုသိ၇သည်။ (NN-13)
လှူရန်