နိရဥ္စရာ၊ မတ် ၂၀/၂၀၂၃
 
ရခိုင်ပြည်နယ်မှအင်အားကြီး ပါတီတစ်ခုဖြစ်သည့် ၇ခိုင်အမျိုးသားပါတီ(ANP)သည် တစ်ပတ်အတွင်းနိုင်ငံရေးပါတီအဖြစ် စစ်ကောင်စီရွေးကောက်ပွဲ ကော်မရှင်ထံတွင် မှတ်ပုံတင်သွားမည်ဟု ပါတီဥက္ကဋ္ဌ ဦးသာထွန်းလှက ပြောသည်။

“နိုင်ငံရေးအရဆွေးနွေးမှုတွေ၊ နိုင်ငံရေးအ၇ ပြောခွင့်ဆိုခွင့်လည်း ရှိဖို့လိုအပ်တယ်လို့ ယူဆတယ်။ နောက်တစ်ချက်က ရခိုင်ပြည်မှာရှိတဲ့ရခိုင်တိုင်းရင်းသားမျိုးနွယ်စုဝင်လူမျိုးများ မျိုးနွယ်စုဝင်တိုင်းရင်းသားတွေနဲ့ အနာဂတ်ရခိုင်ပြည်နယ်ရေးအတွက် နိုင်ငံရေးအရတွေ့ဆုံးဆွေးနွေးမှုတွေ၊ ဆက်စပ် ဆောင်ရွက်မှုတွေ၊ လုပ်ကိုင်ဆောင်ရွက်ဖို့လိုအပ်တယ်လို့လည်း ယုံကြည်တယ်။ အဲဒီအချက်တွေကြောင့် ၇ခိုင်လူမျိုးတွေနဲ့ ၇ခိုင်ပြည်နယ်ကိုကိုယ်စားပြုတဲ့ ပါတီတစ်ရပ်အနေနဲ့ ဆက်လက်ရပ်တည်ဖို့ လိုအပ်တယ်လို့ယူဆတာကြောင့် အခုလိုမှတ်ပုံတင်ဖို့ ဆုံးဖြတ်တာဖြစ်ပါတယ်”ဟု ဆိုသည်။

ယင်းအပြင်မြန်မာနိုင်ငံထဲတွင် ရှိသည့် တခြားညီနောင် အင်အားစုများနှင့်လည်း စစ်မှန်သည့်ဖက်ဒရယ်ပြည်ထောင်စုပေါ်ပေါက်ရန်အတွက် အတူ လက်တွဲကာဆွေးနွေးလုပ်ဆောင်မှုများကိုဆက်လက်လုပ်ရန် လိုအပ်သဖြင့်  မှတ်ပုံတင်ခြင်းဖြစ်ကြောင်း၎င်းက ဆက်ပြောသည်။

စစ်ကောင်စီအနေဖြင့် ရွေးကောက်ပွဲဝင်ပြိုင်မည်ပါတီများအနေဖြင့် မှတ်ပုံတင်၇မည်ဖြစ်ပြီး တစ်နိုင်ငံလုံးအတိုင်းအတာဖြင့်ဝင်ပြိုင်မည့် ပါတီများမှာ ရန်ပုံငွေ သိန်း (၁၀၀၀)ရှိ၇မည်ဖြစ်ကာတိုင်းနှင့်ပြည်နယ်များတွင် ဝင်ပြိုင်မည့် ပါတီများအနေဖြင့်ရန်ပုံငွေ သိန်း(၁၀၀) ရှိ၇မည်ဖြစ်ကြောင်း ပါတီမှတ်ပုံတင်းခြင်းဥပဒေသစ်တွင်ဖော်ပြထားသည်။

၇ခိုင်အမျိုးသားပါတီ(ANP)မှာစစ်ကောင်စီထုတ်ပြန်သည့် ဥပဒေများအ၇ ပြည်ထောင်စုအနေဖြင့် မှတ်ပုံတင်ရန်အခက်အခဲများရှိသည့်အတွက် ပြည်နယ်အဆင့်သာ မှတ်ပုံတင်ခြင်းဖြစ်ကြောင်းဦးသာထွန်းလှက ဆက်ပြောသည်။

တစ်ဘက်တွင်လည်း ပါတီရပ်တည်ရေးအတွက်မှတ်ပုံတင်ခြင်းဖြစ်ပြီး ရွေးကောက်ပွဲဝင်ပြိုင်ရန် ရှိ/မရှိကို ပါတီတွင်ဆွေးနွေးမှုများ မလုပ်၇သေးကြောင်း ၎င်းက ဆက်ပြောသည်။

“ကျနော်တို့ ရွေးကောက်ပွဲကိုဝင်ရောက်ယှဉ်ပြိုင်ဖို့အတွက်မှတ်ပုံတင်တာမဟုတ်ပါဘူး။ ကျနော်တို့ ရခိုင်အမျိုးသားပါတီမှာရွေးကောက်ပွဲဝင်ဖို့/မဝင်ဖို့ကို တစ်စုံတစ်ရာ ဆွေးနွေးထားတာမရှိပါဘူး။ကျနော်တို့ ရခိုင်အမျိုးသားရေးအတွက် လိုအပ်တာကြောင့် ရှင်းရှင်းလင်းလင်း မှတ်ပုံတင်တာသာ ဖြစ်ပါတယ်” ဟု ပြောသည်။

လက်ရှိမှာ စစ်ကောင်စီလက်အောက်ခံ ပြည်ထောင်စု ရွေးကောက်ပွဲကော်မရှင် (UEC)ထံတွင် ၇ခိုင်မှမှတ်ပုံတင်ထားသော ပါတီများမှာ ဒေါက်တာအေးမောင်ဦးဆောင်သော ၇ခိုင့်ဦးဆေင်ပါတီ (AFP)၊ ၇ခိုင်ပြည်နယ်အမျိုးသားအင်အားစုပါတီနှင့် ခမီအမျိုးသားဖွံ့ဖြိုးတိုးတက်ရေးပါတီတို့ဖြစ်သည်။

ရခိုင်ဒီမိုကရေစီအဖွဲ့ချုပ်ပါတီ(ALD) အနေဖြင့် စစ်ကောင်စီကပြဋ္ဌာန်းလိုက်သည့် ရွေးကောက်ပွဲဥပဒေနှင့် ပတ်သက်ပြီးအယုံအကြည်မရှိ၍ ပါတီအားလည်း မှတ်ပုံတင်ရန် မရှိကြောင်း ပြောဆိုထားသည်။

အလားတူ ၇ခိုင်မျိုးနွယ်စုဝင်ဒိုင်းနက်ပါတီအနေဖြင့် မှတ်ပုံတင်ရန်ငွေကြေးအခက်အခဲရှိသည့်အတွက် မှတ်ပုံတင်သွားမည်မဟုတ်ကြောင်း သိ၇သည်။  

စစ်ကောင်စီထံတွင်မတ်လ (၁၄)ရက်အထိ နိုင်ငံရေးပါတီများမှတ်ပုံတင်ခြင်းဥပဒေပုဒ်မ ၃အ၇ လျှောက်ထားသော ပါတီ ၆ ပါတီရှိပြီး နိုင်ငံရေးပါတီများ မှတ်ပုံတင်ခြင်းဥပဒေပုဒ်မ၂၅ အ၇ လျှောက်ထားသော ပါတီ ၁၇ ပါတီဖြစ်ပြီး စုစုပေါင်း ၂၃ပါတီရှိသည်ဟု သိ၇သည်။

ယင်း ၂၃ ပါတီတွင်လည်း ပြည်ထောင်စုတစ်ဝန်းလုံးစည်းရုံးမည့်ပါတီ ၅ ပါတီနှင့် တိုင်းဒေသကြီးသို့မဟုတ်ပြည်နယ်တစ်ခုအတွင်း၌သာ စည်းရုံးမည့်ပါတီ ၁၈ ပါတီဖြစ်ပြီး အဆိုပါပါတီများကို တည်ထောင်ခွင့်နှင့် မှတ်ပုံတင်ခွင့်ပြုနိုင်ရေး ပြည်ထောင်စုရွေးကောက်ပွဲ ကော်မရှင်က ဆက်လက်ဆောင်လျက်ရှိကြောင်းစစ်ကောင်စီပိုင်သတင်းစာများတွင် ဖော်ပြထားသည်။

စစ်ကောင်စီအနေဖြင့်ပြီးခဲ့သည့် ဇန်နဝါရီလအတွင်းက နိုင်ငံရေးပါတီ မှတ်ပုံတင်ရေးဥပဒေသစ်ကို ပြဋ္ဌာန်းလိုက်ခြင်းဖြစ်သည်။

ရက်ပေါင်း ၆၀အတွင်း ပါတီများ မှတ်ပုံတင်ကြရန်နှင့် သတ်မှတ်ကာလအတွင်း မှတ်ပုံမတင်သည့်ပါတီများသည်အလိုအလျောက် ဖျက်သိမ်းပြီးသားဖြစ်သွားမည်ဟုလည်း စစ်ကောင်စီက ထုတ်ပြန်ထားသည်။(NN-18)