ANP ပါတီ မှတ်ပုံတင်ရန်လျှောက်ထားလာကြောင်း ထုတ်ပြန်

နိရဥ္စရာ၊ မတ် ၂၁ / ၂၀၂၃

ယခင်ရွေးကောက်ပွဲများ၌ ရခိုင်ပြည်နယ်တွင် လွှတ်တော်ကိုယ်စားလှယ်အများစု အနိုင်ရရှိခဲ့သည့် ပါတီတစ်ခုဖြစ်သည့် ရခိုင်အမျိုးသားပါတီ (ANP)သည် ယမန်နေ့ မတ်လ ၂၀ ရက်တွင် မှတ်ပုံတင်လိုက်ပြီဖြစ်ကြောင်း စစ်ကောင်စီပိုင် မြန်မာ့အလင်းသတင်းစာက ယနေ့ ထုတ်ပြန် ဖော်ပြထားသည်။

ပါတီစုံ ဒီမိုကရေစီအထွေထွေရွေးကောက်ပွဲတွင် ဝင်ရောက်ယှဉ်ပြိုင်ရန်အတွက် နိုင်င့ရေးပါတီများမှတ်ပုံတင်ခြင်းဥပဒေ ပုဒ်မ ၂၅ အရ နိုင်ငံရေးပါတီအဖြစ် ဆက်လက်တည်ထောင်လိုသော ရခိုင်အမျိုးသားပါတီ (ANP)၊ အမျိုးသားနိုင်ငံရေး ဒီမိုကရက်တစ်ပါတီ (DNP)နှင့် ကချင်အမျိုးသား ကွန်ဂရက်ပါတီ (KNC)တို့သည် ဥပဒေ၊ နည်းဥပဒေများနှင့်အညီ နိုင်ငံရေးပါတီအဖြစ် ဆက်လက်တည်ထောင်ခွင့်နှင့် မှတ်ပုံတင်ခွင့်ကို ပြည်ထောင်စုရွေးကောက်ပွဲကော်မရှင်သို့ ယမန်နေ့တွင် လာရောက်လျှောက်ထားခဲ့သည်ဟု ယနေ့ မတ်လ ၂၁ ရက်ထုတ် စစ်ကောင်စီပိုင် မြန်မာ့အလင်းသတင်းစာက ထုတ်ပြန်ထားသည်။

ရခိုင်အမျိုးသားပါတီ (ANP)အနေဖြင့် နိုင်ငံရေးအရဆွေးနွေး လုပ်ကိုင်ရန်နှင့် နိုင်ငံရေးအရ ပြောဆိုခွင့်ရရှိရန်အတွက် ရည်ရွယ်ပြီး ပါတီမှတ်ပုံတင်ခြင်းဖြစ်ကြောင်း ရခိုင်အမျိုးသားပါတီ ဥက္ကဋ္ဌ ဦးသာထွန်းလှက ယမန်နေ့တွင် နိရဥ္စရာသတင်းဌာနကို ပြောဆိုထားသည်။

ယင်းအပြင် မြန်မာနိုင်ငံထဲရှိ တခြားညီနောင် အင်အားစုများနှင့်လည်း စစ်မှန်သည့် ဖက်ဒရယ် ပြည်ထောင်စု ပေါ်ပေါက်ရန်အတွက် အတူလက်တွဲကာ ဆွေးနွေးခြင်းများ လုပ်ဆောင်ရန် လိုအပ်သည့်အတွက် မှတ်ပုံတင်ခြင်းဖြစ်ကြောင်း သူက ပြောဆိုသည်။

ရခိုင်မှ ဒေါက်တာအေးမောင်ဦးဆောင်သော ရခိုင့်ဦးဆောင်ပါတီ (AFP)၊ ရခိုင်ပြည်နယ် အမျိုးသားအင်အားစုပါတီနှင့် ခမီအမျိုးသား ဖွံ့ဖြိုးတိုးတက်ရေးပါတီတို့သည်လည်း စစ်ကောင်စီ လက်အောက်ခံ ပြည်ထောင်စု ရွေးကောက်ပွဲကော်မရှင် (UEC)ထံတွင် မကြာသေးခင်က မှတ်ပုံတင်ခွင့်လျှောက်ထားခဲ့ကြပြီဖြစ်သည်။

ရခိုင်ဒီမိုကရေစီအဖွဲ့ချုပ်ပါတီ (ALD)အနေဖြင့် စစ်ကောင်စီက ပြဋ္ဌာန်းလိုက်သည့် ရွေးကောက်ပွဲဥပဒေနှင့် ပတ်သက်ပြီး အယုံအကြည်မရှိ၍ ပါတီအားလည်း မှတ်ပုံတင်ရန် မရှိကြောင်း ပြောဆိုထားသည်။

အလားတူ ရခိုင်မျိုးနွယ်စုဝင် ဒိုင်းနက်ပါတီအနေဖြင့် မှတ်ပုံတင်ရန် ငွေကြေးအခက်အခဲရှိသည့် အတွက် မှတ်ပုံတင်သွားမည်မဟုတ်ကြောင်း သိရသည်။ (NN-18)