ကျောက်ဖြူတွင် အိမ်သာတွင်းအသစ်အားပြုပြင်စဉ် အောက်စီဂျင်ပြတ်၍ အမျိုးသား ၁ ဦးသေဆုံး

ရေးသူ: Web Master
| ရက်စွဲ: ၂၁ မတ် ၂၀၂၃
| ကြည့်ရှုသူ: 6.8k

နိရဥ္စရာ၊ မတ် ၂၁ / ၂၀၂၃

ရခိုင်ပြည်နယ်၊ ကျောက်ဖြူမြို့၊ စေတီတောင်ရပ်ကွက်ရှိ နေအိမ်တစ်အိမ်တွင် ယနေ့နံနက်က အိမ်သာတွင်းအသစ်အားပြုပြင်စဉ် အောက်စီဂျင်ပြတ်တောက်၍ အမျိုးသား ၁ ဦးသေဆုံးခဲ့ကြောင်း သိရသည်။

သေဆုံးသူမှာ ကျောက်ဖြူမြို့နယ်၊ စိုင်ခြုံကျေးရွာမှ လက်သမားလုပ်ငန်းလုပ်ကိုင်သူ ဦးချစ်လွင်(၄၅)နှစ်ဖြစ်ကြောင်း သိရသည်။

သူသည် ယနေ့ နံနက် ၉ နာရီခန့်က စေတီတောင်ရပ်ကွက်၊ ခေမာလမ်းမှ ၄င်းအလုပ်လုပ်နေသည့် ဦးကျော်ဝင်း၏နေအိမ်တွင် အိမ်သာကျင်းကွန်ကရစ်အဖုံးမှ သစ်သားဒေါက်တိုင်များ ဖြုတ်ယူစဉ် အောက်စီဂျင်ပြတ်တောက်ပြီး သေဆုံးခဲ့ခြင်းဖြစ်ကြောင်း စေတီတောင်ရပ်ကွက်အုပ်ချုပ်ရေးမှူး ဦးသန်းလှိုင်က ပြောသည်။

"အိမ်သာတွင်းက အသစ်လောင်းထားတာပါ။ အဲဒီအိမ်သာတွင်း ကွန်ကရစ်အဖုံးမှာ ထည့်ထားတဲ့ သစ်သားဒေါက်တိုင်တွေကို ဖြုတ်ယူဖို့ဆင်းတဲ့အချိန် အသက်ရှူကျပ်ပြီး သေသွားတာပါ" ဟု ပြောသည်။

သေဆုံးသူ ဦးချစ်လွင်မှာ လူတစ်ကိုယ်စာဆံ့သည့် ကွန်ကရစ်အဖုံးပေါ်ရှိ အပေါက်မှ အိမ်သာကျင်းထဲဆင်းကာ သစ်သားဒေါက်တိုင်များပြန်ဖြုတ်ယူရန်ကြိုးစားရာမှ ကျင်းထဲတွင်လေနည်းပါးပြီး အသက်ရှူပြတ်တောက်ကာ စတင်သတိမေ့သွားခဲ့ကြောင်း စေတီတောင်ရပ်ကွက်အုပ်ချုပ်ရေးမှူး ဦးသန်းလှိုင်က ပြောသည်။

"ကျင်းထဲရောက်တာနဲ့ သိပ်မကြာလိုက်ဘူး။ ထိုးလဲသွားတာပါ။ အိမ်သာကျင်းက လူတစ်ကိုယ်စာအပေါက်ဖွင့်ထားတယ်ဆိုလည်း လေမှမရတာ။ ပြီးတော့ ကျင်းအောက်မှာလည်း ရေက တစ်ပေလောက်ရှိတယ်"ဟု ပြောသည်။

ယင်းသို့ ဦးချစ်လွင် အိမ်သာကျင်းထဲတွင် လဲကျမေ့မြောသွားသည်နှင့် နေအိမ်ပိုင်ရှင် ဦးကျော်ဝင်းအပါအဝင် တစ်ဖွဲ့တည်းအလုပ်လုပ်နေသည့် အမျိုးသားသုံးဦးက ဆင်းပြီးဆယ်ယူခဲ့ရာ ထိုသုံးဦးမှာလည်း ကျင်းပေါ်ပြန်အရောက်တွင် သတိလစ်မေ့မြောသွားခဲ့ကြောင်း သူက ပြောသည်။

"ကျန်တဲ့သုံးယောက်ကတော့ အခုသက်သာနေပါပြီ။ ဆေးရုံတွေဘာတွေမတင်လိုက်ရပါဘူး" ဟု ပြောသည်။

ဦးချစ်လွင်ကို အဆိုပါ အိမ်သာကျင်းထဲမှဆယ်ယူပြီး လေးဝတီကုလရက္ခိတပရဟိတအသင်းက ဆေးရုံသို့ အလျင်အမြန်ပို့ခဲ့သော်လည်း လမ်းတွင်သေဆုံးခဲ့ကြောင်း သိရသည်။ (NN-23)
ဓာတ်ပုံ- လေးဝတီကုလရက္ခိတပရဟိတအသင်း