နိရဥ္စရာ၊ မတ်၂၅/၂၀၂၃

ရက္ခိုင်အမျိုးသားအဖွဲ့ချုပ်/ရက္ခိုင့်တပ်တော်(ULA/AA)က ဦးဆောင်၍ ကျောက်တော်မြို့နယ်၊ ဇီးချောင်းသင်္ကြန်ပွဲတော်ကိုဒုတိယအကြိမ်အဖြစ် ၃ ရက်တိုင်တိုင် စည်ကားသိုက်မြိုက်စွာကျင်းပသွားမည်ဖြစ်ကြောင်း ပွဲဖြစ်မြောက်ရေးကော်မတီမှ သိ၇သည်။

အဆိုပါဇီးချောင်းသင်္ကြန်ပွဲတော်ကိုဧပြီလ ၁၄ ရက်မှ ၁၆ ရက်အထိ ၃ ရက်တိုင်တိုင် ကျင်းပ သွားမည်ဖြစ်ပြီးရခိုင့်အဆိုတော်များကလည်း သီဆိုဖျော်ဖြေသွားမည်ဖြစ်ကြောင်း ပွဲဖြစ်မြောက်ရေးကော်မတီမှတာဝန်ရှိသူတစ်ဦးက ပြောသည်။

"အစီအစဉ်တွေကတော့ ရေလောင်းမဏ္ဍပ်ပါမယ်။နောက်ပြီးတော့ စတိတ်ရှိုးပါမယ်၊ ၇ခိုင့်အဆိုတော်တွေနဲ့လေ။ ဒီနှစ်မှာတော့ကားပါကင်ကို ပွဲလုပ်မယ့်နေရာနဲ့အနီးမှာလုပ်ထားတယ်။ ဒါကြောင့် လာမယ့်သူတွေအနေနဲ့ သက်တောင့်သက်သာနဲ့လာလို့ရတယ်။ပင်ပန်းစရာအကြောင်းမရှိတော့ဘူး။ မနှစ်ကလောက်မစည်ရင်တောင်မနှစ်ကနီးပါးလောက်ဖြစ်လာမယ်လို့တော့ မျှော်မှန်းထားတယ်" ဟုပြောသည်။

ပြီးခဲ့သည့် ၂၀၂၂ခုနှစ်ကကျင်းပခဲ့သည့် ဇီးချောင်းသင်္ကြန်ပွဲတော်တွင် ပွဲကျင်းပသည့်နေရာနှင့်ကားပါကင်အလှမ်းဝေးသဖြင့် လာရောက်အားပေးသည့် ပြည်သူများခြေကျင်လျှောက်လာရ၍ပင်ပန်း၇သဖြင့် ယခုနှစ်တွင်မူ ကားပါကင်ကို ပွဲကျင်းပမည့်နေရာနှင့်အနီးတွင်လုပ်ပေးသွားမည်ဖြစ်ကြောင်း သိ၇သည်။

ယခုနှစ်ဇီးချောင်းသင်္ကြန်ပွဲတွင် အလျားပေ ၂၀၀ ရှိသည့် ရေလောင်းမဏ္ဍပ်ကိုလည်း ထည့်သွင်း စီစဉ်ထားကြောင်း သိ၇သည်။

ပွဲလာရောက်ရမည့်လက်မှတ်ကိုယခုတစ်ပတ်အတွင်းရောင်းချနိုင်ရန်စီစဉ်နေပြီး လက်မှတ် တစ်စောင်လျှင် ၃၀၀၀ကျပ်နှင့် ရောင်းချသွားမည်ဖြစ်ကြောင်း သိ၇သည်။

ပြီးခဲ့သည့်နှစ်က ကျင်းပခဲ့သည့်ဇီးချောင်းသင်္ကြန်ပွဲတော်တွင် ၇ခိုင်အဆိုတော်များဖြင့် သီဆိုဖျော်ဖြေမှုများနှင့်ရေလောင်းမဏ္ဍပ်အစီအစဉ်များလည်း ပါဝင်ပြီး သွားရောက်ဆင်နွှဲခဲ့သည့်ဒေသခံပေါင်း သိန်းနှင့်ချီရှိခဲ့ကြောင်း သွားရောက်ဆင်နွှဲခဲ့သူများကပြောသည်။

ပြီးခဲ့သည့်နှစ်က ဇီးချောင်းသင်္ကြန်ပွဲတော်သို့သွားရောက်ခဲ့သည့် လူငယ်အမျိုးသမီးတစ်ဦးက "မနှစ်ကတော့ အရမ်းစည်တယ်။ ပျော်လည်းပျော်ခဲ့၇တယ်။နေပူတော့ ပင်တော့ ပင်ပန်းတယ်။ မနှစ်ကတော့ ပွဲနေရာကို ရောက်ဖို့တော်တော်လမ်းလျှောက်ခဲ့၇တယ်။ ဒီနှစ်တော့ အဆင်ပြေအောင်လုပ်ပေးရင်ကောင်းပါမယ်" ဟု ပြောသည်။

ရခိုင်တွင်စစ်ကောင်စီကလည်း သင်္ကြန်ပွဲတော်ကို မြို့ကြီးများတွင် မဏ္ဍပ်ကြီးများဖြင့်စည်ကားသိုက်မြိုက်စွာကျင်းပနိုင်ရန် စီစဉ်နေကြောင်း သိ၇သည်။ (NN-8)

ပုံစာ- ယခင်ဇီးချောင်းသကြန်ပွဲ/ ဓာတ်ပုံ-ခိုင်မင်းသျှင်