နိရဥ္စရာ၊ မတ် ၂၉/၂၀၂၃

၇ခိုင်ဒေသတွင်နေထိုင်ကျက်စားသည့် ငှက်မျိုးစိပ်များမျိုးတုံးပျောက်ကွယ်မှုအန္တရာယ်မှကာကွယ်စောင့်ရှောက်ရေး အသိပညာပေးသည့်အနေဖြင့် ရမ်းဗြဲကျွန်းမှ တောင်တန်း ၂ ခုတွင်ပထမဆုံးငှက်အိမ်များကို စတင်ချိတ်ဆွဲခဲ့ကြောင်း သိ၇သည်။

ရမ်းဗြဲကျွန်း၊ လေးတောင်မြို့အနီးရှိကျောင်းတောင်နှင့် တန်းဖိုခါးတောင်တန်းနှစ်ခုရှိ သစ်ပင်ကြီးများတွင်ငှက်အိမ်အလုံး ၁၂၀ ကို မတ်လ ၂၇ ရက်တွင် စတင်ချိတ်ဆွဲခဲ့ကြောင်းငှက်အိမ်ချိတ်ဆွဲရန် စတင်အကောင်ထည်ဖော်ခဲ့သည့် စာရေးဆရာအောင်ဇေမင်းကပြောသည်။

"မနေ့ကတန်းဖိုခါးတောင်နဲ့ ကျောင်းတောင်တွေမှာငှက်အိမ်တွေစတင်ချိတ်ဆွဲပါတယ်။သစ်ပင်ကြီးတွေမှာ အဓိကချိတ်ဆွဲတာပါ" ဟု ပြောသည်။

ရမ်းဗြဲကျွန်းပေါ်တွင်ရှိသည့်ငှက်မျိုးစိပ်များမှာ တဖြည်းဖြည်းမျိုးတုံးပျောက်ကွယ်လာ၍ယင်းသို့ငှက်အိမ်ချိတ်ဆွဲကာ အသိပညာပေး နှိုးဆော်ရန်စိတ်ကူး၇သည့်အတွက်ငှက်အိမ်များ ချိတ်ဆွဲခြင်းဖြစ်ကြောင်းသူက ပြောသည်။

အဆိုပါငှက်အိမ်တစ်လုံး၏တန်ဖိုးမှာ အနည်းဆုံး ၄၀၀၀ ကျပ်ရှိပြီး လေးတောင်ဒေသထွက်သစ်၊ ဝါးများဖြင့်ပြုလုပ်ခဲ့ခြင်းဖြစ်ကြောင်း သိ၇သည်။

စာရေးဆရာအောင်ဇေမင်းအပါဝင်စေတနာရှင်များ၏ အလှူငွေများဖြင့် ယင်းငှက်အိမ်များကို ချိတ်ဆွဲခဲ့ခြင်းဖြစ်သည်။

ကျေးငှက်မျိုးစိပ်များ ထိန်းသိမ်းစောင့်ရှောက်မှုအသိပညာပေးအနေဖြင့် ချင်းတောင်တန်း ပေါ်တွင်လည်း ငှက်အိမ်အလုံး၄၀၀ ခန့်ကို သဘာ၀ပတ်ဝန်းကျင်ထိန်းသိမ်းစောင့်ရှောက်ရေးနှင့်ကျေးငှက်တိရစ္ဆာန်မျိုးတုံးပျောက်ကွယ်မသွားရေးဆောင်ရွက်နေသည့် ချင်းအမျိုးသားဆလိုင်းအောင်မြင့်က ချိတ်ဆွဲထားပြီး ၇ခိုင်တွင် ယခုပထမဆုံးငှက်အိမ်များချိတ်ဆွဲအသိပညာပေးမှု ပြုလုပ်လာခြင်း ဖြစ်သည်။

ရခိုင်ဒေသတွင်နှစ်စဉ်လာရောက် ကျက်စားလေ့ရှိသည့် ဆောင်းခိုငှက်မျိုးစိပ်များအပါအဝင်ငှက်များကို ဖမ်းဆီးသတ်ဖြတ်ကာ ဈေးကွက်တွင်ရောင်းချမှုများရှိနေ၍တချို့ရှားပါး ငှက်မျိုးစိပ်များမှာ တဖြည်းဖြည်းမျိုးတုံးပျောက်ကွယ်လာကြောင်းသဘာ၀ပတ်ဝန်းကျင်ထိန်းသိမ်းစောင့်ရှောက်ရေးလုပ်ကိုင်နေသူများထံမှသိ၇သည်။

ရခိုင်ပြည်ထဲမှအဏ္ဏဝါအမျိုးသားဥယျာဉ်အဖြစ် သတ်မှတ်ထားသည့် နံ့သာကျွန်းတွင်လည်းကမ္ဘာ့ရှားပါးဆောင်းခိုငှက်မျိုးစိပ်တချို့ အပါအဝင် ငှက်မျိုးစိပ်ပေါင်း ၅၀ခန့်ကျက်စား နေထိုင်လျက်ရှိသည်ဟုသိ၇သည်။

အဆိုပါငှက်များမှာ မဆင်မခြင် ဖမ်းဆီးသတ်ဖြတ်ရောင်းချခံရမှုကြောင့်မျိုးတုန်းပျောက်ကွယ်လာပြီး သစ်တောပြုန်းတီးမှုစသည့်ခြိမ်းခြောက်မှုအန္တရာယ်များကိုကြုံတွေ့နေရကြောင်း၇ခိုင့်သဘာ၀ပတ်ဝန်းကျင်ထိန်းသိမ်းစောင့်ရှောက်ရေးအဖွဲ့ဥက္ကဋ္ဌဦးရန်နောင်စိုးက နိရဥ္စရာသို့ ပြောသည်။ (NN-23)

ဓာတ်ပုံ- ရမ်းဗြဲကျွန်းတွင် ငှက်အိမ်များချိတ်ဆွဲသည့် မြင်ကွင်းများ

Photos - စာရေးဆရာအောင်ဇေမင်း