နိရဥ္စရာ၊ ဧပြီ ၄/၂၀၂၃

၇ခိုင်ပြည်နယ်၊ မောင်တောမြို့နယ်နှင့်မြောက်ဦးမြို့နယ်တို့တွင် ယာဉ်တိုက်မှုဖြစ်၍ အမျိုးသား ၃ ဦးပွဲချင်းပြီးသေဆုံးသွားကြောင်း သိ၇သည်။

မောင်တောမြို့နယ်တွင်သေဆုံးသွားသူများမှာရသေ့တောင်မြို့နယ်၊ စေတီပြင်ကျေးရွာ၊ အနောက်တောင်ရပ်ကွက်မှဦးအောင်လှထွန်း(၅၅)နှစ်နှင့် ကိုမောင်ခင်သန်း(၃၃)နှစ်တို့ဖြစ်သည်။

မြောက်ဦးမြို့နယ်တွင်သေဆုံးသွားသူများမှာမြောက်ဦးမြို့နယ် အုတ်ဖိုကန်ရွာမှ ဦးစံညွန့် (၅၈)နှစ်ဖြစ်သည်။

မောင်တောမြို့နယ်တွင်သေဆုံးသွားသူ ၂ဦးမှာ မောင်တောနယ်ရှိ တောင်ပေါ်တွင် ရာသီပေါ်သီးနှံများရှာဖွေပြီး ၇သေ့တောင်သို့ဆိုင်ကယ်ဖြင့်ပြန်လာစဉ် ယနေ့ ဧပြီလ ၄ ရက်၊ ညနေ ၃ နာရီခန့်က မောင်တောမြို့နယ်၊ကိုင်းကြီးကျေးရွာအနီးရှိ ကားလမ်းမတွင် ကုန်ကားတစ်စီးဖြင့်တိုက်မိ၍ပွဲချင်းပြီးသေဆုံးသွားခြင်းဖြစ်သည်ဟု ရသေ့တောင်မြို့နယ်၊ စေတီပြင်ကျေးရွာမှကိုအာင်မင်းစိုးက ပြောသည်။

"ကုန်ကားနဲ့တိုက်မိတာပါ။နှစ်ယောက်စလုံးက အဲ့ဒီနေရာမှာပဲ ပွဲချင်းပြီးသေဆုံးသွားပါတယ်" ဟု ပြောသည်။

သေဆုံးသွားသည့်အမျိုးသား ၂ ဦးမှာ သမီးယောက္ခမတော်စပ်ကြပြီး လက်ရှိတွင် သူတို့အလောင်းကိုမောင်တောဆေးရုံသို့ပို့ဆောင်ထားသည်ဟုလည်း သိ၇သည်။

ယင်းဖြစ်စဉ်အတွင်းကုန်ကားမောင်းသူကို မောင်တောမြို့နယ် ရွာသစ်ကေ နခခ ကင်းစခန်းက ဖမ်းဆီးထားကြောင်းသိ၇သည်။

မြောက်ဦးမြို့နယ်တွင်သေဆုံးသွားသည့် ဦးစံညွန့်မှာယမန်နေ့ ဧပြီလ ၃ ရက်၊ ည ၁၀ နာရီကျော်တွင် သူ၏ဘေးတွဲဆိုင်ကယ်ဖြင့်စစ်ဘေးရှောင်ခရီးသည်နှစ်ဦးအား မြောက်ဦးမြို့ လက်ကောက်ဈေးစစ်ဘေးရှောင်စခန်းသို့ပို့ရန်သွားစဉ် အုတ်ဖိုကန်ရွာအလွန်ရှိလမ်းကွေ့အနီးတွင် အိမ်စီးကားတစ်စီးနှင့် သူ၏ ဘေးတွဲဆိုင်ကယ်တို့တိုက်မိပြီး ပွဲချင်းပြီး သေဆုံးသွားခြင်းဖြစ်သည်ဟု ဒေသခံများက ပြောသည်။

ဘေးတွဲဆိုင်ကယ်ဖြင့်လိုက်ပါလာသောစစ်ဘေးရှောင်ခရီးသည်သားဖနှစ်ဦးမှာလည်း ထိခိုက်ဒဏ်ရာရရှိသွားသောကြောင့်မြောက်ဦးဆေးရုံတွင် ဆေးကုသမှုခံယူနေကြရသည်ဟု သိ၇သည်။

ပြီးခဲ့သည့် မတ်လ၂၆ ရက်နေ့ကလည်း ကျောက်တော်မြို့နယ်တွင် ခရီးသည်တင်ကားတစ်စီးနှင့် အိမ်စီးကားတစ်စီးတိုက်မိ၍အပေါက်၀ကျေးရွာ၊ ရန်တားရပ်ကွက်မှ အသက် ၃၀ ခန့်အရွယ်အိမ်စီးကားမောင်းသူ ကိုစိုးလင်းအောင်သေဆုံးသွားခဲ့ကာ အမျိုးသမီး ၂ ဦးမှာလည်းပွန်းပဲ့ဒဏ်ရာများရရှိခဲ့သည်ဟု သိ၇သည်။

ထိုသို့ယာဉ်တိုက်မှုများလျော့နည်းစေရန်အတွက် ယာဉ်မောင်းနှင်သူများအနေဖြင့်လည်းယာဉ်စည်းကမ်း၊ လမ်းစည်းကမ်းကိုလိုက်နာရန်နှင့် အရှိန်ပြင်းပြင်းမမောင်းရန်လိုအပ်ပြီး ဆိုင်ကယ်မောင်းနှင်သူများအနေဖြင့်လည်းဘေးကင်းစေရန် ဆိုင်ကယ်စီးဦးထုပ်ကို ဆောင်းသင့်ကြောင်း ဒေသခံများက ပြောသည်။(NN-12, NN-8)

ဓာတ်ပုံ- မောင်တောမြို့နယ်အတွင်း ယာဉ်တိုက်မှုအား တွေ့၇စဉ်။
Photo - CJ