ရမ်းဗြဲတွင် မိဖုရားစောမဲကျီတည်ထားခဲ့သည့် သမိုင်းဝင်နားမွေးတော်ဓာတ်စေတီပူဇော်ပွဲ ရိုးရာဓလေ့အစဉ်အလာများနှင့်အညီစည်ကားသိုက်မြိုက်စွာကျင်းပပြုလုပ်

နိရဉ္စရာ၊ ဧပြီ ၁၈ / ၂၀၂၃

ရခိုင်ပြည်၊ ရမ်းဗြဲမြို့နယ်၊ ကန်ဒိုင်းတိုက်နယ်တွင် မိဖုရား ပတ္တမြားဒေဝီစောမဲကျီ တည်ထားခဲ့သည့် ရှေးဟောင်း သမိုင်းဝင် နားမွေးတော်ဓာတ်စေတီပူဇော်ပွဲ (ဒေသအခေါ် ဓာတ်တက်ပွဲ) ကို ယမန်နေ့ ဧပြီလ ၁၇ ရက်၊ နံနက်က အထူး စည်ကားစွာ ကျင်းပခဲ့သည်။

အဆိုပါဓာတ်တက်ပွဲကို ကန်ဒိုင်းတိုက်နယ်ဂေါပကအဖွဲ့က ကြီးမှူးကျင်းပခြင်းဖြစ်ပြီး ကန်ဒိုင်းတိုက်နယ်ရှိ ကျေးရွာ ၁၄ ရွာမှ လူပျိုအပျိုများက ကျေးရွာအလိုက် ရခိုင်ရိုးရာဝတ်စုံများကို တူညီဝတ်ဆင်ပြီး နားမွေးတော်စေတီသို့ သွားရောက် ပူဇော်ခဲ့ခြင်းဖြစ်ကြောင်း စိုးမဲကျီလူငယ်အသင်း ဥက္ကဋ္ဌ ကိုမောင်မောင်ကြီးက ပြောသည်။

"မနက် ၇ နာရီလောက်မှာ ကျွန်တော်တို့ ကန်ဒိုင်းတိုက်နယ် လမ်းမကြီးကနေပြီးတော့ စထွက်ပါတယ်။ ကျွန်တော်တို့မဲနှိုက်လို့ကျတဲ့ ကျေးရွာနံပါတ်စဥ်အလိုက် တန်းစီပြီ ညီညီညာဘာ ဘုရားကို ပူဇော်ဖို့ သွားရတာပါ။ ယောကျ်ားပျိုတွေကတော့ ဗုံ၊မောင်း ဆိုင်း၊ တူရီယာတွေတီးပြီးလိုက်ကြပါတယ်။ အလွန်ပျော်စရာကောင်းတဲ့ ရိုးရာဓလေ့တစ်ခုပါ "ဟု ပြောသည်။

ယခုနှစ်ဓာတ်တက်ပွဲကို အတွင်းပြင်(ရွာဟောင်း)၊ အတွင်းပြင်(၁)၊ တောင်ရွာ၊ မီးကျောင်းတက်၊ ကညင်ကောက်၊ သပြီကျွန်း၊ အချွိန်ပြင်၊ မှက်ချောင်း၊ လောင်းချွိန်၊ စည်ရင်း၊ တောင်ရင်း၊ အချောင်ပြင်၊ ကုန်ဘောင်နှင့် လေးတောင်ချောင်း စသည့် ကျေးရွာ ၁၄ ရွာမှ အပျိုလူပျိုများက ပါဝင်ပူဇော်ခဲ့ကြောင်း သူက ပြောသည်။

ယင်းသို့သွားရောက်ပူဇော်ရာတွင် ကျေးရွာများအနေဖြင့် မဲနှိုက်ဆုံးဖြတ်ထားသည့် နံပါတ်စဥ်အလိုက် စီတန်းကာ နားမွေးတော်ဓာတ်စေတီသို့ တညီတညာသွားရောက်ရပြီး ရခိုင်ရိုးရာဝတ်စားဆင်ယင်ထုံးဖွဲ့မှုများဖြင့် စေတီတော်ကို လှည့်ပတ်ပူဇော်ခဲ့ကြောင်း သရသည်။

ကျေးရွာအလိုက်ဝတ်စားဆင်ယင်မှုများကို အကဲဖြတ်၍ ပထမ၊ ဒုတိယ၊ တတိယဟူ၍ ဆုများချီးမြှင့်လေ့ရှိကြောင်း သိရသည်။

ယင်းသို့ချီးမြှင့်ရာတွင် ပထမဆုကို အချွိန်ပြင်ရွာ၊ ဒုတိယဆုကို အချောင်ပြင်ရွာနှင့် တတိယဆုကို လောင်းချွိန်ရွာတို့က ရရှိခဲ့သည်ဟု သိရသည်။

နားမွေးတော်စေတီဓာတ်တက်ပွဲကို ရှေးဘိုးဘွားများလက်ထက်ကပင် နှစ်ဆန်းတစ်ရက် နေ့တိုင်း ရိုးရာမပျက်ကျင်းပလာခဲ့ပြီး မိဖုရားစောမဲကျီပြုလုပ်ခဲ့သည့်
ကုသိုလ်ကောင်းမှုများကို အောက်မေ့သတိရသည့်အနေဖြင့် စေတီတော်ကို ပူဇော်ခြင်းဖြစ်ကြောင်း စိုးမဲကျီလူငယ်အသင်း ဥက္ကဋ္ဌ ကိုမောင်မောင်ကြီးက ပြောသည်။

"မိဖုရားစောမဲကျီကျွန်တော်တို့ကန်ဒိုင်းနွယ်ဖွားဖြစ်ပါတယ်။ ကန်ဒိုင်းနယ်မှာ မိဖုရားတည်ထားခဲ့တဲ့ စေတီကို ကျွန်တော်တို့က နှစ်ဆန်းတစ်ရက်နေ့မှာပေါ့နော်။ မိဖုရားစောမဲကျီတည်ထားကိုးကွယ်ခဲ့တာကို ကျွန်တော်တို့ အောက်မေ့သတိရတဲ့အနေနဲ့ ကျေးရွာကလူတွေက ဖူးမြော်ပူဇော်ကြပါတယ်။ ဘိုးဘေးဘီဘင်လက်ထက်ကပဲ ဒီလိုကျင်းပလာခဲ့တာပါ" ဟု ပြောသည်။

မိဖုရားစောမဲကျီသည် ရမ္မာဝတီ၊ ကန်ဒိုင်းနယ်ဖွားမြင်ပြီး  ဘုန်းကံထူးသည့် အမျိုးသမီးတစ်ဦးဖြစ်ကာ  ရခိုင်ဘုရင်မင်းဘာကြီး၏ မြောက်စားခြင်းကို ခံခဲ့ရသည့် မိဖုရားတစ်ပါးဖြစ်ကြောင်း ရခိုင်သမိုင်းမှတ်တမ်းများ အရ သိရသည်။

အဆိုပါ နားမွေးတော်ဓာတ်စေတီတော်ကို  သက္ကရာဇ် ၈၇၅ ခုနှစ်တွင် မိဖုရားစောမဲကျီက တည်ထားကိုးကွယ်ခဲ့ကြောင်း သိရသည်။ (NN-23)