နိရဉ္စရာ၊ဧပြီ ၂၁/၂၀၂၃

ကမ္ဘာ့ဘောလုံးအဖွဲ့ချုပ်(FIFA)၏ လမ်းညွှန်မှုဖြင့်မြန်မာနိုင်ငံဘောလုံးအဖွဲ့ချုပ်သည် ၇ခိုင်ပြည်နယ်၊ စစ်တွေအပါအဝင် မြန်မာနိုင်ငံရှိ မြို့၁၃ မြို့တွင် အသက် ၁၁ နှစ်မှ ၁၅ နှစ်အတွင်း ဘောလုံးကျွမ်းကျင်လူငယ်များအားယခုလအတွင်း ရွေးချယ်သွားမည်ဖြစ်ကြောင်း သိ၇သည်။

အဆိုပါနိုင်ငံတဝန်းမှ မျိုးဆက်သစ်ထူးချွန်လူငယ်ဘောလုံးကစားသမားများအား ရွေးချယ်မည့် FIFA-MFFTDS Scouting tour အစီအစဉ်ကို မြန်မာနိုင်ငံရှိ မြို့ကြီး ၁၃ မြို့တွင် ပြုလုပ်သွားမည်ဖြစ်ပြီး၇ခိုင်ပြည်နယ်မှ လျှောက်ထားသူများကို စစ်တွေမြို့၊ ဝေသာလီအားကစားကွင်း၌ လာမည့်ဧပြီလ ၂၆ရက်၊ နံနက်ပိုင်းတွင် ရွေးချယ်သွားမည် ဖြစ်ကြောင်းသိ၇သည်။

ယင်းအစီအစဉ်တွင်ရွေးချယ်ခံယူရန် အသက် ၁၁ နှစ်မှ ၁၅ နှစ်အတွင်း ဘောလုံးဝါသနာရှင်မျိုးဆက်သစ်လူငယ်များလာရောက်လျှောက်ထားနိုင်ပြီး အရပ်အမောင်းသတ်မှတ်ထားခြင်းမရှိဘဲဘောလုံးအခြေခံကျွမ်းကျင်မှုများကိုသာ ကြည့်ပြီး ရွေးချယ်သွားမည်ဖြစ်ကြောင်းစစ်တွေမြို့နယ် အားကစားနှင့်ကာယပညာဦးစီးဌာနမှ အားကစားမှူး ဦးကောင်းခန့်ထူးကပြောသည်။

"အဲဒီအစီအစဉ်မှာရွေးချယ်ခံ၇တဲ့ ကလေးတွေကို တစ်ခါတည်း ဘောလုံးအကယ်ဒမီမှာ ထားပြီးတော့စာသင်ပေးမယ်။ ထမင်းကျွေးမယ်။အားလုံးကိုတာဝန်ယူပေးမယ်ပေါ့နော်။ အသက်နဲ့အရည်အချင်းရှိတာကိုပဲကြည့်ပါမယ်။ ဘောလုံးအဖွဲ့ချုပ်ကနေ ကျွမ်းကျင်တဲ့ပညာရှင်တွေကလာပြီးရွေးချယ်သွားပါမယ်။ FIFA ကနေ အကုန်အကျခံပြီးတော့အားလုံးသင်ပေးသွားပါမယ်။ အဲဒီကထူးချွန်တဲ့ကလေးတွေကတော့ မြန်မာ့လက်ရွေးစင် သက်တမ်းအလိုက်ပါမယ်။ကြိုးစားရင်ကြိုးစားသလောက်တော့ ဆက်ဖြစ်သွားပါမယ်"ဟုပြောသည်။

လာမည့်ဧပြီလ ၂၆ ရက်၊ စစ်တွေမြို့ ဝေသာလီအားကစားကွင်း၌ရွေးချယ်မည့်အစီအစဉ်တွင် ရွေးချယ်ခံ၇သည့် ဘောလုံးကျွမ်းကျင်လူငယ်များသည်အမျိုးသားဘောလုံးအကယ်ဒမီ (ရန်ကုန်) (သို့မဟုတ်)မြန်မာဘောလုံးအကယ်ဒမီ(မန္တလေး) တို့တွင်လည်း နောက်ဆုံးအဆင့်အနေဖြင့်ဆက်လက်ရွေးချယ်စိစစ်သွားမည်ဖြစ်ပြီး ယင်းကရွေးချယ်ခံ၇သည့် ဘောလုံးကျွမ်းကျင်လူငယ်များသည် ရန်ကုန်ဘောလုံးအကယ်ဒမီနှင့်မန္တလေးဘောလုံးအကယ်ဒမီတို့တွင် တက်ရောက်သင်ယူခွင့်၇မည်ဖြစ်ကြောင်း စစ်တွေမြို့နယ်အားကစားနှင့်ကာယပညာဦးစီးဌာနမှ အားကစားမှူး ဦးကောင်းခန့်ထူးက ဆက်လက် ပြောသည်။

"၇ခိုင်တစ်ပြည်နယ်လုံးက ဘောလုံးဝါသနာပါတဲ့ကလေးတွေကတော့လာလျှောက်ကြတာတွေ ရှိပါမယ်။ ဖြစ်ချင်တဲ့ကလေးတွေကတော့လာလျှောက်ကြမှာပါပဲ။ ဒါကအခွင့်အရေး ကောင်းတစ်ခုပဲလေ။ဒီလိုမျိုးလုပ်တာက တစ်နှစ်မှာတစ်ကြိမ်တောင်မရှိဘူး။ဘောလုံးအားကစားနဲ့ဆက်ပြီးတော့ လက်ရွေးစင်ဖြစ်ချင်တဲ့ ကလေးတွေကတော့ လာပြီးတော့လျှောက်ကြမယ်ထင်ပါတယ်" ဟု ဆက်ပြောသည်။

အဆိုပါအစီအစဉ်တွင်ရခိုင်မှ ရွေးချယ်ခံယူရန်အတွက် ဝင်ခွင့်လျှောက်လွှာကိုလာမည့် ဧပြီလ ၂၄ ရက်ကိုနောက်ဆုံးထားပြီး စစ်တွေမြို့နယ်အားကစားနှင့်ကာယပညာဦးစီးဌာနတွင် လာရောက်လျှောက်ထားစုံစမ်းနိုင်ကြောင်းလည်းသိ၇သည်။

စစ်တွေမြို့မှ ဘောလုံးဝါသနာရှင်လူငယ်တစ်ဦးက"အခုလိုမျိုးအစီအစဉ်က ဘောလုံးဝါသနာပါတဲ့ လူငယ်တွေအတွက်အခွင့်အလမ်းကောင်းတစ်ခုပါပဲ။ ကျနော်တို့တုန်းကဆိုရင် အားကာသိပ္ပံတို့ဘာတို့တက်မယ်ဆိုရင်သတ်မှတ်ချက်တွေ အရမ်းများခဲ့တယ်။စံချိန်မမီရင် မတက်ခဲ့ရတာရှိတယ်။ အခုဒီလိုမျိုးကျတော့ဘောလုံးကျွမ်းကျင်မှုနဲ့ပဲသက်ဆိုင်သွားတယ်လေ။ ဝါသနာပါတဲ့ ညီငယ်တွေကိုလည်းလျှောက်ဖြစ်စေချင်တယ်" ဟုပြောသည်။

အဆိုပါမျိုးဆက်သစ်ဘောလုံးကျွမ်းကျင်လူငယ်များ ရွေးချယ်မည့်အစီအစဉ်တွင်ရွေးချယ်ရေးနည်းစနစ်၊ စံနှုန်း ၈ ခုသတ်မှတ်ထားပြီးယင်းတို့သည် ဘောလုံးကစားရာတွင် အခြေခံကစားနည်းများဖြစ်ကြောင်းသိ၇သည်။

မြန်မာတစ်နိုင်ငံလုံးမှရွေးချယ်ထားသည့် မျိုးဆက်သစ် ဘောလုံးကျွမ်းကျင်လူငယ်စာရင်းကို လာမည့်မေလ ၂၄ ရက်တွင်တစ်ကြိမ်ထုတ်ပြန်သွားမည်ဖြစ်ပြီး အောက်တိုဘာလနှင့် နိုဝင်ဘာလအတွင်းတွင်လည်းဒုတိယအကြိမ်ထုတ်ပြန်သွားမည်ဖြစ်ကြောင်း သိ၇သည်။

ရွေးချယ်ပွဲ ပြုလုပ်မည့် မြို့ (၁၃) မြို့မှာ စစ်တွေ၊ ရန်ကုန်၊ မန္တလေး၊ ပဲခူး၊ ပုသိမ်၊မြစ်ကြီးနား၊ ဘားအံ၊ ပြည်၊ မော်လမြိုင်၊ တောင်ကြီး၊ လားရှိုး၊ ထားဝယ်နှင့် နေပြည်တော်တို့ဖြစ်ကြသည်။  (NN-8)

photo- Myanmar Football Federation