ရခိုင်တွင် အစ္စလာမ်ဘာသာဝင်များ၏ အိဒ်ပွဲတော်ကျင်းပ

(ဘာသာခြားမိတ်ဆွေအပေါင်းအသင်းများလည်း ပါဝင်ဆင်နွှဲနေကြ)

နိရဉ္စရာ၊ ဧပြီ ၂၂/၂၀၂၃ (ဓာတ်ပုံသတင်း)

အစ္စလာမ်ဘာသာဝင်များ၏ အိဒ်ပွဲတော်ကို ယနေ့တွင် ရခိုင်ပြည်နယ်ရှိ အစ္စလာမ်ဘာသာဝင်များအပါအဝင် မြန်မာတစ်နိုင်ငံလုံးတွင် ကျင်းပနေကြောင်း သတင်းရရှိသည်။

ရခိုင်တွင်ပြုလုပ်သည့်အဆိုပါပွဲတော်တွင်လည်း ဘာသာခြားမိတ်ဆွေအပေါင်းအသင်းများပါ ပါဝင်ဆင်နွှဲခဲ့ကြောင်း သတင်းရရှိသည်။

အစ္စလာမ်ဘာသာဝင်များ၏ ရာမာဒန် ဥပုသ်လပြီးမြောက်သည့် ယနေ့ ဧပြီလ ၂၂ ရက်ကို အိဒ်နေ့အဖြစ်သတ်မှတ်ပြီး ဥပုသ်လတစ်လပြီးမြောက်သည့်အနေဖြင့် နံနက်ပိုင်းတွင် သက်ဆိုင်ရာဗလီများ၌ ဝတ်ပြုကြသည့်အပြင် ပျော်ပွဲရွှင်ပွဲများဖြင့်ပါ ဆင်နွှဲနေကြသည်ဟု သိသည်။

အဆိုပါပွဲတော်သို့ ခင်မင်ရင်းနှီးသည့်မိတ်ဆွေများကို မုန့်အချိုပွဲများ ပေးကမ်းခြင်းနှင့် လူကြီးမိဘများထံမှ အီတီ(မုန့်ဖိုး)တောင်းခြင်း၊ အမျိုးလည်ခြင်းများပြုလုပ်ကာ ဆင်နွှဲတတ်ကြောင်း သိရသည်။

အဆိုပါအိဒ်ပွဲတော်ကို ရခိုင်မှအစ္စလာမ်ဘာသာဝင်များသည်လည်း သူငယ်ချင်း အပေါင်းအသင်းများနှင့်အတူ ဆင်နွှဲကာ ဘာသာခြားမိတ်ဆွေများကိုလည်း အစ္စလာမ်ရိုးရာမုန့်အချိုများ ပြုလုပ် ကျွေးမွေးကာ ဆင်နွှဲနေကြောင်း သိရသည်။

ရာမာဒန်ဥပုသ်လသည် အစ္စလာမ်ဘာသာဝင်များ၏ ကြီးမြတ်သည့်လဖြစ်ပြီး ထိုလတစ်လအတွင်း နံနက်နေထွက်ချိန်မှ ညနေ နေဝင်ချိန်အထိ သက်ဆိုင်ရာဒေသအလိုက် သတ်မှတ်ထားသည့် အချိန်အတိုင်း ရေအပါအဝင် မည်သည့်အစားအသောက်မျှမစားဘဲ ဥပုသ်စောင့်ကြရသည်ဟု သိရသည်။

ညနေဥပုသ်စောင့်ပြီး တစ်လအကြာ လမြင်ရသည့်နေ့တွင်  ဥပုသ်ထွက်ကြရပြီး   ပုံမှန်အတိုင်း အစာအာဟာရများကို နေ့စဉ် မှီဝဲ စားသုံးရကြတော့ကြောင်း သိရသည်။ (NN-8)

ဓာတ်ပုံ- စစ်တွေမြို့နယ်အတွင်း အိဒ်ပွဲတော် ဆင်နွှဲနေပုံများ