ရခိုင်ပြည်နယ်တရားလွှတ်တော် တရားသူကြီးအဖြစ် ဒေါ်မြအေးကို စစ်ကောင်စီခန့်အပ်

ရခိုင်ပြည်နယ် တရားလွှတ်တော်တရားသူကြီးအဖြစ် ဒေါ်မြအေးကို စစ်ကောင်စီက မေလ ၇ ရက်တွင် ခန့်အပ် တာဝန်ပေးလိုက်ကြောင်း သိရသည်။

ယနေ့မေလ ၈ ရက်ထုတ် စစ်ကောင်စီ၏ ကြေးမုံသတင်းစာတွင် ဒေါ်မြအေးကို ဖွဲ့စည်းပုံအခြေခံဥပဒေ ပုဒ်မ ၄၁၉ အရ ရခိုင်ပြည်နယ်တရားလွှတ်တော် တရားသူကြီးအဖြစ်ခန့်အပ်လိုက်ကြောင်း ထည့်သွင်း ဖော်ပြထားသည်။

ယခင် ရခိုင်ပြည်နယ်တရားလွှတ်တော် တရားသူကြီး ဒေါ်နွယ်နွယ်ခိုင်မှာ ဧပြီလကုန်ပိုင်းခန့်က အသက်ပြည့်ပင်စင်ယူသွားပြီးနောက် ပြည်နယ်တရားလွှတ်တော်တရားသူကြီးအသစ်အဖြစ် ဒေါ်မြအေးကို ခန့်အပ်ခြင်းဖြစ်ကြောင်း စစ်တွေမြို့မှ တရားလွှတ်တော်ရှေ့နေ ဦးကျော်ညွန့်မောင်က နိရဥ္စရာသို့ပြောသည်။

သူမသည် ပြည်နယ်တရားဦးစီးမှူးအဖြစ်တာဝန်ထမ်းဆောင်နေသူဖြစ်ပြီး ထက်မြက်သည့် အမျိုးသမီးတစ်ဦးဖြစ်၍ တရားစီရင်ရေးတွင် အမှားနည်းရန် မျှော်လင့်လို့ရကြောင်း သူက ဆက်ပြောသည်။

"တရားသူကြီးတစ်ယောက် ထက်မြက်တာ၊ ညံ့တာနဲ့ တရားစီရင်ရေးစနစ်နဲ့ကတော့ မဆိုင်ပါဘူး။ စနစ်ဆိုတာက စီမံခန့်ခွဲရေးနဲ့သွားနေတာလေ။ ကျွန်တော်တို့နိုင်ငံမှာက တရားစီရင်ရေး၊ ဥပဒေပြုရေး၊ အုပ်ချုပ်ရေးတွေဟာ သီးခြားဒီမိုကရေစီနိုင်ငံတွေမှာလို သီးသန့်ခွဲခြားပြီးသွားနေတာမဟုတ်ပါဘူး။ အဲဒီအတွက် ထက်ထက်မြက်မြက်ရှိလို့ တရားစီရင်ရေးစနစ်ကို ပိုပြီးထိရောက်ဖို့ဆိုတာထက် ထက်ထက်မြက်မြက်ပုဂ္ဂိုလ်ရှိတော့ အမှားနည်းဖို့လောက်ပဲ မျှော်လင့်ရမှာပါ" ဟု ပြောသည်။

ပြည်နယ် သို့မဟုတ် တိုင်းဒေသကြီးတစ်ခုခုတွင် တရားလွှတ်တော် တရားသူကြီး ခန့်အပ်ခံရမည့်သူသည် ခရိုင်တရားသူကြီးအဖြစ် အနည်းဆုံး ၃ နှစ်တာဝန်ထမ်းဆောင်ဖူးပြီး ပြည်နယ်တရားဦးစီးမှူးအဖြစ် တာဝန်ထမ်းဆောင်ဖူးရမည်ဟုလည်း သူက ပြောသည်။

ဒေါ်မြအေးသည် ဒုတိယမြို့နယ်တရားသူကြီး၊ တွဲဖက်မြို့နယ်တရားသူကြီး၊ မြို့နယ်တရားသူကြီး၊ ခရိုင်တရားသူကြီး၊ ဒုခရိုင်တရားသူကြီး၊ ခရိုင်တရားသူကြီး၊ ပြည်နယ်တရားရုံးဦးစီးမှူး တာဝန်များကို လုပ်ကိုင်ခဲ့ပြီးနောက် ပြည်နယ်တရားလွှတ်တော်တရားသူကြီးအဖြစ် ခန့်အပ်ခံရခြင်းဖြစ်ကြောင်း သိရသည်။

ရခိုင်တွင် စစ်တပ်အာဏာသိမ်းပြီးနောက်ပိုင်း တရားရုံးအသီးသီး၌ ရက္ခိုင့်တပ်တော် (AA)နှင့်ဆက်စပ်ပြီး တရားစွဲဆိုထားသည့်အမှုများမှာ တရားလိုနှင့် လိုပြသက်သေမရောက်ရှိဟု အကြောင်းအမျိုးမျိုးပြကာ တရားစီရင်မှုကြန့်ကြာနေသည်ဟု မိသားစုဝင်များက ပြောဆိုကြသည်။

တရားရုံးအသီးသီးမှ တရားစီရင်မှုများမှာ လက်ရှိနိုင်ငံအာဏာသိမ်းယူထားသည့် စစ်ကောင်စီ၏ သြဇာလွှမ်းမိုးနေပြီး မျှတပြီးလွတ်လပ်သည့်တရားစီရင်ရေးစနစ်မရှိသည်ကို တွေ့မြင်ရကြောင်း ရခိုင်လူ့အခွင့်အရေးကာကွယ်မြှင့်တင်သူများအဖွဲ့မှ တာဝန်ရှိသူတစ်ဦးက ရှုမြင်သုံးသပ်သည်။

"မြန်မာစစ်ကောင်စီလက်ထက်မှာ တရားစီရင်မှုညံ့ဖျင်းတဲ့အပြင် ဥပဒေကိုလက်တလုံးခြားလုပ်ပြီး ပြည်သူတွေကို အကြောင်းအမျိုးမျိုးပြ ညှဉ်းဆဲနေတယ်လို့ မြင်တယ်။ စစ်ကောင်စီက အာဏာလွှမ်းမိုးနေတော့ စစ်ကောင်စီကိုကျော်ပြီးတော့ လုပ်လို့မရဘူး။ တရားစီရင်ရေးကို လွတ်လွတ်လပ်လပ်မလုပ်နိုင်ဖြစ်နေတယ်လို့ မြင်တယ်" ထောက်ပြပြောဆိုသည်။

ရခိုင်တွင် ၂ဝ၂၂ ခုနှစ်ကဖြစ်ပွားခဲ့သည့် တကျော့ပြန်တိုက်ပွဲကာလအတွင်း အပြစ်မဲ့အရပ်သားပြည်သူ ၅၉၄ ဦးကို မတရားဖမ်းဆီးချုပ်နှောင်ခဲ့ပြီး ယင်းအနက် ၃၉၁ ဦးသာ လွှတ်ပေးသေးကာ ကျန် ၂၀၃ ဦးဖမ်းဆီးချုပ်နှောင်ခံထားရဆဲဖြစ်ကြောင်း ULA/ AA ပြောခွင့်ရသူ ဦးခိုင်သုခက ပြီးခဲ့သည့် ဖေဖော်ဝါရီလအတွင်း ပြောဆိုထားသည်။

တရားရုံးများတွင် ကျန်ရှိနေသေးသည့် စစ်ဆေးဆဲပြစ်မှုဆိုင်ရာမှုခင်းများအား ယခုလာမည့် ဇူလိုင်လ နောက်ဆုံးထား၍ ပြီးပြတ်အောင် ဆောင်ရွက်သွားမည်ဟု စစ်ကောင်စီ၏ တရားရုံးစစ်ဆေးဆဲပြစ်မှုဆိုင်ရာမှုခင်းများ တရားစီရင်ရေး အထောက်အကူပြုအဖွဲ့ ဥက္ကဋ္ဌ၊ ဒုတိယဝန်ကြီးချုပ်နှင့် ပြည်ထောင်စုဝန်ကြီး ဒုတိယဗိုလ်ချုပ်ကြီး စိုးထွဋ်က ပြီးခဲ့သည့် ဧပြီလ ၃ဝ ရက်တွင် ပြောဆိုထားသည်။ (NN-23)