ဘက်ပေါင်းစုံအကျပ်အတည်းများကြောင့် ရခိုင်ရှိ စစ်ဘေးရှောင်များ မုန်တိုင်းကာကွယ်ရန် မပြင်ဆင်နိုင်ဘဲဖြစ်နေ

ဘင်္ဂလားပင်လယ်အော်အရှေ့တောင်ပိုင်းတွင်ဖြစ်ပေါ်နိုင်သည့် မိုချာမုန်တိုင်းငယ်နှင့်ပတ်သက်ပြီးရခိုင်မှ စစ်ဘေးရှောင်များအနေဖြင့် ဘက်ပေါင်းစုံ အကျပ်အတည်းကြောင့် ကြိုတင် ပြင်ဆင်ကာကွယ်မှုများမလုပ်နိုင်သေးကြောင်းစစ်ဘေးရှောင်များက ပြောသည်။

လက်ရှိစစ်ဘေးရှောင်များနေထိုင်နေသည့်စခန်းများမှာ ပြိုပျက်နိုင်သော်လည်းစစ်ဘေးရှောင်များအနေဖြင့် ငွေကြေးအခက်အခဲကြောင့် တစ်စုံတစ်ရာမုန်တိုင်းဒဏ်မှ ကာကွယ်ရန် မပြင်ဆင်နိုင်သေးကြောင်းဘူးသီးတောင်မြို့၊ အမှတ်(၅)ရပ်ကွက်ရှိ ရန်အောင်မြေစစ်ဘေးရှောင်စခန်းမှစစ်ဘေးရှောင်တစ်ဦးက ပြောသည်။

“မုန်တိုင်းရှိတာတော့ သိပါတယ်။ဒါပေမဲ့ တစ်ခုမှ ပြင်ဆင်တာမရှိပါဘူး။ မုန်တိုင်းရှိတာကို သိထားပေမဲ့ အိမ်တွေကို မပြင်နိုင်ဘူး။ စားနပ်ရိက္ခာတွေ ကြိုတင်မဝယ်ထားနိုင်ဘူး။ ဆင်းရဲတဲ့လူတွေက များပါတယ်။ ကြိုတင်ပြင်ဆင်ဖို့အတွက်ငွေကြေးလည်း မရှိပါဘူး။အခုကတော့ အရင်ကနေတဲ့အတိုင်းကြုံသလို နေနေ၇ပါတယ်” ဟု ဆိုသည်။

ရန်အောင်မြေစစ်ဘေးရှောင်စခန်းကို ၂၀၁၉ ခုနှစ်၊မတ်လမှစတင်တည်ထားခဲ့ခြင်းဖြစ်ပြီး လက်ရှိ ထိုစခန်းတွင်ဘူးသီးတောင်မြို့နယ်မှ စံဂိုးထောင်ရွာ၊ နွားရုံတောင်၊ သျှစ်ရှားတောင်၊ဥယျာဉ်သာ၊ သရက်ပြင်နှင့် စပါးထားရွာ စသည့် ကျေးရွာ ၆ ရွာမှ အိမ်ထောင်စု၁၅၃ စု၊ လူဦးရေ ၅၀၃ ဦး ခိုလှုံနေထိုင်ကြသည်ဟု သိ၇သည်။

ကျောက်တော်မြို့နယ်ရှိ တောင်မင်းစစ်ဘေးရှောင်စခန်းမှစစ်ဘေးရှောင်တစ်ဦးက “ကျမတို့အနေနဲ့ကတော့ မုန်တိုင်းရှိတာသိပါတယ်။ အခုနေတဲ့ စခန်းတွေကိုတော့ ကြိုတင်ပြင်ဆင်ထားတာမရှိပါဘူး။ပြင်ဆင်ဖို့အတွက် စခန်းမှာ အစည်းအဝေးတွေ လုပ်ပါတယ်။ ငွေကြေးအခက်အခဲရှိတော့ တစ်ခုမှ ဆက်မလုပ်နိုင်ပါဘူး။ ဒါပေမဲ့ မုန်တိုင်းတိုက်လာရင်တော့ စခန်းမှာရှိတဲ့ မသန်စွမ်းတွေ၊ သက်ကြီးရွယ်အိုတွေ၊ကလေးတွေကိုတော့ လုံခြုံတဲ့နေရာတွေကို ပြောင်းဖို့ပြောထားပါတယ်” ဟု ဆိုသည်။

တောင်မင်းကုလားစစ်ဘေးရှောင်စခန်းတွင်မြို၊ ခမီတိုင်းရင်းသားအများစု နေထိုင်ပြီး စစ်ဘေးရှောင် ၅၀၀ ကျော်ရှိသည်ဟုသိ၇သည်။

သူတို့သည် ၂၀၁၈ ခုနှစ်မှ ၂၀၂၀ ပြည့်နှစ်အတွင်းရက္ခိုင့်တပ်တော်(AA)နှင့် မြန်မာစစ်တပ်တို့တိုက်ပွဲများဖြစ်ပွားပြီးနောက် ကျောက်တော်မြို့နယ် ပညာ၀၊ ငစွယ်နှင့် ပါချေစသည့်ကျေးရွာတို့မှ ထွက်ပြေးခိုလှုံနေကြခြင်း ဖြစ်သည်။

ရခိုင်ရှိ စစ်ဘေးရှောင်စခန်းများသည် လက်ရှိတွင်ခိုင်ခံ့မှုမရှိဘဲ ပြိုကျနိုင်သည့်အခြေအနေရှိရာ မုန်တိုင်းပါတိုက်ခတ်ခံရပါကရစရာမရှိအောင် ပြိုပျက်စီးသွားနိုင်ပြီး စစ်ဘေးရှောင်များသည်လည်းနေထိုင်စရာနေရာ ဒုက္ခအကြီးအကျယ်ကျရောက်သွားနိုင်သည်ဟု စစ်ဘေးရှောင်များကပြောကြသည်

ယနေ့မေလ ၈ ရက်၊ မွန်းလွဲ ၁၂ နာရီခွဲအချိန်တိုင်းထွာချက်အ၇ ဘင်္ဂလားပင်လယ်အော် အရှေ့တောင်ပိုင်းနှင့် ယင်းနှင့်ဆက်စပ်လျက်ရှိသော ကပ္ပလီပင်လယ်ပြင် တောင်ပိုင်းတို့တွင်လေဖိအားနည်းရပ်ဝန်းတစ်ခုဖြစ်ပေါ်နေကြောင်း မိုးလေ၀သနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။

ယင်း လေဖိအားနည်းရပ်ဝန်းမှာပိုမိုအားကောင်းလာနိုင်ပြီး မေလ ၉ ရက်တွင် မုန်တိုင်းငယ်အဖြစ်သို့ရောက်ရှိလာနိုင်ကာ မြောက်ဘက်သို့ ဆက်လက်ရွှေ့လျားနိုင်သည်ဟု ဆိုသည်။

မေလ၁၀ ရက်တွင် ဘင်္ဂလားပင်လယ်အော်အလယ်ပိုင်းနှင့်ဆက်စပ်လျက်ရှိသော ကပ္ပလီပင်လယ်ပြင်မြောက်ပိုင်းတို့တွင် တစ်နာရီလျှင် မိုင် (၇၀)မှ (၈၀)ခန့် အထိ တိုက်ခတ်နိုင်သည့်ဆိုင်ကလုန်းမုန်တိုင်းအဖြစ်သို့ အားကောင်းလာနိုင်သည်ဟုလည်း မိုး/ဇလကခန့်မှန်းထားသည်။

မုန်တိုင်းအရှိန်ကြောင့်မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင်မေလ ၉ ရက်မှ ၁၄ ရက်အတွင်း မကြာခဏ မိုးသက်လေပြင်းများ ကျရောက်နိုင်ပြီးလှိုင်းကြီးနိုင်သည်ဟု ဆိုသည်။

ယင်းမုန်တိုင်းအရှိန်ကြောင့် လေပြင်းတိုက်ခတ်ခြင်း၊မိုးကြီးခြင်း၊ ရုတ်တရက်ရေကြီးခြင်းနှင့်အတူ မြေပြိုခြင်းများဖြစ်ပေါ်နိုင်ပါသဖြင့် ကုန်းမြင့်ဒေသအနီးတွင် နေထိုင်ကြသူများအနေဖြင့်မြေပြိုမှု အန္တာရာယ်ကိုလည်းကောင်း၊ မြန်မာ့ကမ်းရိုးတန်းတစ်လျှောက်နှင့်မြစ်ငယ်၊ချောင်းငယ်များအနီးတွင် နေထိုင်ကြသူများအနေဖြင့် ရေကြီး၊ ရေလျှံမှုများဖြစ်ပေါ်နိုင်သောကြောင့်ကြိုတင်သတိပြု နေထိုင်ကြရန်နှင့်ပြည်တွင်း လေကြောင်း ပျံသန်းရေးနှင့် မြန်မာ့ကမ်းရိုးတန်းတစ်လျှောက်နှင့်ကမ်းလွန်ပင်လယ်ပြင်တို့ရှိ ကမ်းနီး၊ ကမ်းဝေး ငါးဖမ်းရေယာဉ်များ၊သင်္ဘောများအနေဖြင့်လည်း ကြိုတင်သတိပြုရှောင်ရှားနိုင်ရန် မိုး/ဇလကသတိပေးထုတ်ပြန်ထားသည်။

ရခိုင်ပြည်နယ်တွင် မြန်မာစစ်ကောင်စီတပ်နှင့်ရက္ခိုင့်တပ်တော်(AA)တို့တိုက်ပွဲဖြစ်ပွားခဲ့ရာတောတောင်နှင့် ရပ်ရွာများအနီး မိုင်းနှင့် စစ်လက်နက်အကြွင်းအကျန်ပစ္စည်းများအား စစ်ကောင်စီကရှင်းလင်းမပေးသေးသည့်အတွက် လက်ရှိအချိန်ထိ နေရပ်သို့မပြန်နိုင်သေးသည့် စစ်ဘေးရှောင် ရသောင်းကျော်ခန့်ရှိနေသေးကြောင်း သိ၇သည်။ (NN-18)

ဘက်ပေါင်းစုံအကျပ်အတည်းများကြောင့် ရခိုင်ရှိ စစ်ဘေးရှောင်များ မုန်တိုင်းကာကွယ်ရန် မပြင်ဆင်နိုင်ဘဲဖြစ်နေ

ဆက်စပ် အကြောင်းအရာများ

နောက်ဆုံးရသတင်းများ